ఉపసర్పంచుల చెక్ పవర్ రద్దు చేస్తే మరో ఉద్యమమే

మల్లంపల్లి (ములుగు), : గ్రామాల అభివృద్ధి, ప్రజల సమస్యల పరిష్కారంలో కీలకంగా పనిచేస్తున్న ఉపసర్పంచులను ప్రభుత్వం చిన్నచూపు చూడటం సరికాదని ఉపసర్పంచుల ఫోరం ములుగు జిల్లా అధ్యక్షుడు అంకం సురేష్ ముదిరాజ్ అన్నారు. ఉప సర్పంచులకు ఉన్న చెక్ పవర్‌ను రద్దు చేసే ఆలోచనను ప్రభుత్వం విరమించుకోవాలని ఆయన డిమాండ్ చేశారు.చెక్ పవర్‌ను రద్దు చేస్తే రాష్ట్రవ్యాప్తంగా మరో ఉద్యమం తప్పదని హెచ్చరించారు.గ్రామపంచాయతీల పాలనలో సర్పంచులతో పాటు ఉపసర్పంచులు కూడా కీలక బాధ్యతలు నిర్వహిస్తున్నారని సురేష్ ముదిరాజ్ పేర్కొన్నారు.గ్రామాల్లో ప్రజలకు అవసరమైన మౌలిక వసతులు, పారిశుద్ధ్యం,తాగునీరు,అంతర్గత రహదారులు,వీధి దీపాలు, అభివృద్ధి పనులు తదితర అంశాల్లో ఉపసర్పం చులు నిరంతరం ప్రజలకు అందుబాటులో ఉంటూ తమ వంతు బాధ్యతను నిర్వర్తిస్తున్నారని తెలిపారు.అలాంటి ఉపసర్పంచుల అధికారాలను తగ్గించడం లేదా వారికి ఉన్న చెక్ పవర్‌ను రద్దు చేయడం వల్ల గ్రామపంచాయతీల పాలనలో సమన్వయం దెబ్బతినే అవకాశం ఉందన్నారు.ఉపసర్పంచులకు రాజ్యాంగబద్ధంగా,చట్టబద్ధంగా ఉన్న హక్కులు,అధికారాలను కాపాడాల్సిన బాధ్యత ప్రభుత్వంపై ఉందని స్పష్టం చేశారు.
హక్కులను హరించే ప్రయత్నాలను సహించం
ఉపసర్పంచుల హక్కులను హరించే విధంగా ప్రభుత్వం ఎలాంటి నిర్ణయం తీసుకున్నా సహించేది లేదని సురేష్ ముదిరాజ్ హెచ్చరించారు.రాష్ట్రంలోని ప్రతి ఉపసర్పంచ్ తమ హక్కుల పరిరక్షణ కోసం ఉద్యమానికి సిద్ధంగా ఉండాలని పిలుపునిచ్చారు. అవసరమైతే మండల,జిల్లా స్థాయిల్లో ఆందోళనలు చేపట్టి ప్రభుత్వంపై ఒత్తిడి తీసుకొస్తామని అన్నారు.ఉపసర్పంచుల సమస్యల ను ప్రభుత్వం వెంటనే పరిష్కరించడంతో పాటు, వారి అధికారాలు,విధులు, బాధ్యతలపై స్పష్టత ఇవ్వాలని కోరారు. గ్రామాల అభివృద్ధిలో ఉపసర్పంచుల పాత్రను గుర్తించి వారికి మరింత ప్రాధాన్యత కల్పించాల్సిన అవసరం ఉందన్నారు.
అమరణ నిరాహార దీక్షకైనా సిద్ధం
చెక్ పవర్ రద్దు నిర్ణయం తీసుకుంటే ఉద్యమాన్ని మరింత ఉధృతం చేస్తామని అంకం సురేష్ ముదిరాజ్ స్పష్టం చేశారు. ఉపసర్పంచుల హక్కుల కోసం అవసరమైతే అమరణ నిరాహార దీక్ష చేయడానికైనా సిద్ధంగా ఉన్నామని తెలిపారు. ప్రభుత్వం తమ హెచ్చరికను తీవ్రంగా పరిగణించి ఉపసర్పంచుల చెక్ పవర్ రద్దు ఆలోచనను విరమించుకోవాలని కోరారు. గ్రామ పంచాయతీల్లో ప్రజాస్వామ్యబద్ధమైన పాలన కొనసాగాలంటే సర్పంచులు, ఉపసర్పంచులు సమన్వయంతో పనిచేసే విధంగా ప్రభుత్వం చర్యలు తీసుకోవాలని ఆయన సూచించారు.ఉపసర్పంచులను బలహీనపరిచే నిర్ణయాల వల్ల గ్రామీణ ప్రాంతాల్లో పరిపాలనపై ప్రభావం పడే అవకాశం ఉందని తెలిపారు.
ఉపసర్పంచుల ఐక్యతను ఎవరూ అడ్డుకోలేరు
రాష్ట్రవ్యాప్తంగా ఉన్న ఉపసర్పంచులందరూ ఐక్యంగా ఉండాలని, హక్కుల పరిరక్షణ కోసం కలిసికట్టుగా పోరాడాలని సురేష్ ముదిరాజ్ పిలుపునిచ్చారు.ప్రభుత్వం వెంటనే స్పందించి ఉపసర్పంచుల సమస్యలపై చర్చించి న్యాయం చేయాలని డిమాండ్ చేశారు.లేనిపక్షంలో రాష్ట్రవ్యాప్తంగా ఉద్యమ కార్యాచరణను ప్రకటిస్తామని హెచ్చరించారు.