గాంధీజీ లో ఘనంగా ఉపాధ్యాయ దినోత్సవం 

నాంపల్లి: గురువుల పట్ల తమకున్న గౌరవాన్ని చాటుతూ శనివారం గాంధీజీ పాఠశాల విద్యార్థులు ఉపాధ్యాయులను ఘనంగా సన్మానించారు. ఉపాధ్యాయ దినోత్సవాన్ని పురస్కరించుకుని పాఠశాలలో నిర్వహించిన కార్యక్రమంలో విద్యార్థులు గురువులకు పుష్పగుచ్ఛాలు అందజేసి శాలువాలతో సత్కరించారు. ముందుగా ట్రస్మా జిల్లా అధ్యక్షుడు, గాంధీజీ విద్యాసంస్థల చైర్మన్ డాక్టర్ కోడి శ్రీనివాసులు ఆధ్వర్యంలో డాక్టర్ సర్వేపల్లి రాధాకృష్ణ  చిత్రపటానికి పూలమాలలు వేసి నివాళులర్పించారు.ఈ సందర్భంగా విద్యార్థులు మాట్లాడుతూ తమకు విద్యాబుద్ధులు నేర్పుతూ, మంచి మార్గంలో నడిపిస్తున్న ఉపాధ్యాయుల సేవలను కొనియాడారు. విద్యార్థుల భవిష్యత్తును తీర్చిదిద్దడంలో గురువుల పాత్ర ఎంతో కీలకమని పేర్కొన్నారు. ఉపాధ్యాయులు కేవలం పాఠ్యాంశాలను బోధించడమే కాకుండా, క్రమశిక్షణ, నైతిక విలువలు, సామాజిక బాధ్యత వంటి అంశాలను కూడా నేర్పుతున్నారని తెలిపారు.అనంతరం ట్రస్మా జిల్లా అధ్యక్షుడు డాక్టర్ కోడి శ్రీనివాసులు మాట్లాడుతూ  విద్యార్థులు క్రమశిక్షణతో చదువుకుని ఉన్నత లక్ష్యాలను సాధించాలని ఆకాంక్షించారు. గురువులను గౌరవించడం భారతీయ సంస్కృతిలో గొప్ప సంప్రదాయమని పేర్కొన్నారు.విద్యార్థులు చూపిన అభిమానం, ఆత్మీయత తమకు ఎంతో ఆనందాన్ని కలిగించిందన్నారు. ఈ కార్యక్రమంలో పాఠశాల డైరెక్టర్స్ కర్నాటి నాగరాజు, సరికొండ వెంకన్న, ప్రిన్సిపల్ సామల వెంకటేశం, చిలుకూరి రామేశ్వరి, పాఠశాల ఉపాధ్యాయులు, విద్యార్థులు తదితరులు పాల్గొన్నారు.