చౌటకూర్ : విద్యార్థుల్లో భారతీయ సంప్రదాయ కళలు, సంస్కృతి పట్ల ఆసక్తిని పెంపొందించేందుకు ‘స్పిక్ మెకే’ సంస్థ ఆధ్వర్యంలో మంగళవారం సంగారెడ్డి జిల్లా చౌటకూర్ జిల్లా పరిషత్ ఉన్నత పాఠశాల లో కథక్ నృత్య ప్రదర్శన నిర్వహించారు.‘విరాసత్ – 2026’ కార్యక్రమంలో భాగంగా విచ్చేసిన ప్రముఖ కథక్ నృత్య కళాకారిణి  ఆర్తి శంకర్ విద్యార్థులకు కథక్ నృత్యంపై ప్రత్యేక ప్రదర్శన ఇవ్వడంతో పాటు అవగాహన కల్పించారు.ఈ సందర్భంగా కథక్ నృత్య విశిష్టత, దాని ప్రాచీన చరిత్ర, భారతీయ శాస్త్రీయ నృత్య సంప్రదాయంలో దాని ప్రాముఖ్యతను ఆమె ప్రదర్శన ద్వారా వివరించారు. నృత్యంలోని విభిన్న హావభావాలు, లయ, తాళం, పాద విన్యాసాలను ప్రదర్శిస్తూ విద్యార్థులకు ఈ కళారూపంపై సమగ్ర పరిజ్ఞానాన్ని అందించారు.పాఠ్యాంశాలతో పాటు ఇలాంటి సాంస్కృతిక కార్యక్రమాల ద్వారా విద్యార్థుల్లో భారతీయ కళలు, సంస్కృతి, సంప్రదాయాలపై గౌరవం, అవగాహన పెరుగుతాయని నిర్వాహకులు పేర్కొన్నారు. ఈ కార్యక్రమంలో మండల విద్యాధికారి  అనురాధ, ఉపాధ్యాయులు మోహన్ రెడ్డి, భాస్కర్ రెడ్డి, ఉపాధ్యాయ బృందం, విద్యార్థినీ విద్యార్థులు తదితరులు పాల్గొన్నారు.

అందోల్ : మెదక్ జిల్లా అల్లాదుర్గంలో పోస్ట్ ఆఫీస్ వద్ద ఉన్న విద్యుత్ ట్రాన్స్ఫారంకు కప్పేసిన తీగలు ప్రమాదం జరిగే వరకు వేచి చూస్తున్న విద్యుత్ శాఖ అధికారులు ప్రమాదవశాత్తు మృతి చెందే వరకు వేచి చూస్తున్న అధికారులు తీరుకు ఇక్కడ నిదర్శంగా నిలుస్తుంది. ప్రమాదం భారీనా జరగకముందే వాటిని తొలగించి ప్రమాదం నుంచి విముక్తి చేయాలని ప్రజలు కోరుతున్నారు

కాటారం (భూపాలపల్లి) :  దీపావళి పండుగను పురస్కరించుకొని కాటారం సబ్ డివిజన్ పరిధిలోని ప్రజలకు సబ్ డివిజనల్ పోలీస్ అధికారి ఏ. సూర్యనారాయణ ముందస్తు శుభాకాంక్షలు తెలిపారు. ఈ సందర్భంగా దీపావళి పండుగకు సంబంధించి బాణసంచా విక్రయించే వ్యాపారస్తులు తప్పనిసరిగా ప్రభుత్వ నిబంధనలు పాటించాలని సూచించారు.కాటారం సబ్ డివిజన్ పరిధిలోని గ్రామాలు, మండల కేంద్రాల్లో బాణసంచా విక్రయ స్టాళ్లు ఏర్పాటు చేయాలనుకునే వ్యాపారులు ముందుగా సంబంధిత శాఖల నుంచి అనుమతులు పొందాలని స్పష్టం చేశారు. ముఖ్యంగా పోలీస్ శాఖ నుంచి ఎన్‌ఓసీ, అగ్నిమాపక శాఖ అనుమతి, వాణిజ్య పన్నుల శాఖ నుంచి జీఎస్టీ రిజిస్ట్రేషన్, విద్యుత్ శాఖ అనుమతి, గ్రామపంచాయతీ అనుమతి తప్పనిసరిగా తీసుకోవాలని తెలిపారు. ఎంత చిన్న మొత్తంలో బాణసంచా విక్రయించినా అన్ని అనుమతులు పొందిన తర్వాతే స్టాళ్లు ఏర్పాటు చేసుకోవాలని, నిబంధనలు ఉల్లంఘిస్తే చట్టపరమైన చర్యలు తీసుకుంటామని హెచ్చరించారు. అదేవిధంగా ప్రజలు బాణసంచా కాల్చే సమయంలో తగిన భద్రతా ప్రమాణాలు పాటించాలని, చిన్నారుల విషయంలో ప్రత్యేక జాగ్రత్తలు తీసుకోవాలని సూచించారు. ఎలాంటి అవాంఛనీయ సంఘటనలు చోటుచేసుకోకుండా ప్రతి ఒక్కరూ బాధ్యతగా వ్యవహరిస్తూ దీపావళి పండుగను ఆనందోత్సాహాల మధ్య సురక్షితంగా జరుపుకోవాలని ఎస్‌డీపీఓ ఏ. సూర్యనారాయణ కోరారు.

బాన్సువాడ : విద్యార్థులపై ఉపాధ్యాయులు ప్రత్యేక శ్రద్ధ వహించాలని మంగళవారం డిఆర్పి అయ్యల సంతోష్ తెలిపారు. బాన్సువాడ మండల పరిధి లోని బోర్లం జెడ్ పి హెచ్ ఎస్ కాంప్లెక్స్ లో ఎస్ జి టి ఉపాధ్యాయుల సమావేశం లో డి ఆర్ పి అయ్యాల సంతోష్ మాట్లాడుతూ. మిడ్ లైన్ టెస్ట్ వరకు విద్యార్థులు రావలసిన సామర్థ్యాలు విద్యార్థుల్లో వచ్చే విధంగా సన్నద్ధం చేయాలని విద్యార్థులు నవంబర్ నెల లో హాజరు శాతం ఎక్కువ ఉండే విధంగా చూడాలని, విద్యార్థుల లో తెలుగు ఆంగ్లం గణితం అంశాలలో తగిన సామర్థ్యాలు వచ్చే విధంగా ఉపాధ్యాయుల కృషి చేయాలని, ఎఫ్ ఎల్ ఎన్ లో భాగంగా కామారెడ్డి జిల్లాను ప్రథమ స్థానంలో ఉంచే విధంగా ఉపాధ్యాయుల కృషి చేయాలని, 2, 5వ తరగతి విద్యార్థుల పై ప్రత్యేక శ్రద్ద వహించాలని అన్నారు.ఈ కార్యక్రమం లో ఆర్.పి లు ప్రవీణ్ కుమార్, మహేందర్, సాయిరాం, సి ఆర్ పి జ్యోతి తదితరులు పాల్గొన్నారు

 ప్రజల కు మెరుగైన వైద్యం అందుతుందా లేదా అని స్వయం గా ఆరా తీసిన ఎమ్మెల్యే......  బాన్సువాడ : వర్ని మండల కేంద్రంలోని 30 పడగల ఆసుపత్రిని మంగళవారం సందర్శించిన బాన్సువాడ శాసనసభ్యులు పోచారం. బాన్సువాడ నియోజవర్గం లోని వర్ని 30 పడకల ప్రభుత్వ ఆసుపత్రి ని సందర్శించి వైద్య సేవల పై ఆరా తీసిన పోచారం శ్రీనివాసరెడ్డి. వర్ని మండల కేంద్రం లోని 30 పడకల ప్రభుత్వ ఆసుపత్రి ని తెలంగాణ రాష్ట్ర ప్రభుత్వ వ్యవసాయ సలహాదారులు, బాన్సువాడ నియోజకవర్గ శాసనసభ్యులు పోచారం శ్రీనివాసరెడ్డి. సందర్శించారు. ఈ సందర్భం గా ఆసుపత్రి లో చికిత్స పొందుతున్న రోగుల  ను స్వయంగా కలిసి వారికి అందుతున్న వైద్య సేవలు, వైద్య సదుపాయాల గురించి అడిగి తెలుసుకున్నారు. రోగుల కు మెరుగైన వైద్యం అందు తుందా లేదా అనే విషయంపై వైద్యుల ను ఆరా తీశారు. అనంతరం డీసీహెచ్‌ఓ శ్రీనివాస్ ప్రసాద్ తో మాట్లాడి ఆసుపత్రిలో అందుబాటులో ఉన్న వైద్య సిబ్బంది వివరాలు, అవసరమైన వైద్య సిబ్బంది నియామకం, ఆసుపత్రికి రావాల్సిన వైద్య పరికరాలు, ఇతర మౌలిక సదుపాయాల గురించి చర్చించారు. ప్రభుత్వ ఆసుపత్రులకు వచ్చే పేద, మధ్యతరగతి ప్రజలకు మెరుగైన వైద్య సేవలు అందేలా చూడాలని, రోగులకు ఎలాంటి ఇబ్బందులు కలగకుండా అవసరమైన చర్యలు తీసుకోవాలని ఈ సందర్భంగా వైద్య అధికారుల కు పలు సూచనలు చేశారు.

బాన్సువాడ : బాన్సువాడ నియోజకవర్గం కరువు ప్రకటించాలని మంగళవారం సిపిఐ నేత దుబాస్ రాములు ప్రభుత్వాన్ని డిమాండ్ చేశారు. బాన్సువాడ పట్టణంలోని సిపిఐ కార్యాలయం ప్రక్కన ఉన్న నాయి బ్రాహ్మణ ఫంక్షన్ హాల్ లో సిపిఐ అనుబంధ కార్మిక సంఘాల సభ్యుల తో సమావేశం నిర్వహించడం జరిగింది. ఈ సందర్భం గా సిపిఐ పార్టీ బాన్సువాడ నియోజకవర్గ ఇన్చార్జ్ జిల్లా సహాయ కార్యదర్శి దుబాస్ రాములు మాట్లాడుతూ. రాష్ట్రంలో ఎల్ నినో వలన కరువు తీవ్రంగా ఉంటుందని కాబట్టి రాష్ట్ర ప్రభుత్వం స్పందించి బాన్సువాడ నియోజకవర్గ ప్రాంతాన్ని కరువు ప్రాంతంగా ప్రకటించి కేంద్రానికి నివేదిక అందించి ప్రజలను ఆదుకోవాలని ఆయన డిమాండ్ చేశారు. ఉపాధి హామీ పథకాన్ని బాన్సువాడ మున్సిపాలిటీలో వర్తింపజేసి గ్రామాల లో ఉపాధి పనులు కల్పించాలని ఆయన డిమాండ్ చేశారు. ఈ సమావేశం లో సిపిఐ నాయకులు చెన్నం గారి సురేష్ , తోట శ్రీనివాస్, సాయిలు, ఖాదర్, లక్ష్మి తదితరులు పాల్గొన్నారు.

హైదరాబాద్ : పట్టణ పాలనను మరింత సమర్థవంతంగా తీర్చిదిద్దడంతో పాటు నగరాల్లో పారిశుధ్య నిర్వహణను మెరుగుపరిచే లక్ష్యంతో గ్రేటర్ హైదరాబాద్ మున్సిపల్ కార్పొరేషన్ (GHMC), అడ్మినిస్ట్రేటివ్ స్టాఫ్ కాలేజ్ ఆఫ్ ఇండియా (ASCI) సంయుక్త ఆధ్వర్యంలో మంగళవారం హైదరాబాద్‌లోని ఏఎస్సీఐ ప్రాంగణంలో మున్సిపల్ అధికారులకు ఒకరోజు సామర్థ్య అభివృద్ధి కార్యక్రమాన్ని నిర్వహించారు. ఈ కార్యక్రమంలో ఘన వ్యర్థాల నిర్వహణ (Solid Waste Management), 2026 నాటి సాలిడ్ వేస్ట్ మేనేజ్‌మెంట్ నిబంధనలు, భారీ పరిమాణంలో వ్యర్థాలను ఉత్పత్తి చేసే సంస్థల నిర్వహణ (Bulk Waste Management), స్వచ్ఛ భారత్ మిషన్ 2.0 (అర్బన్), ప్రగతి 50 సిటీస్ కార్యక్రమం, స్వచ్ఛ సర్వేక్షణ్ సూచికలు, ధ్రువీకరణ ప్రమాణాలు తదితర అంశాలపై మున్సిపల్ అధికారులకు అవగాహన కల్పించారు. ఈ కార్యక్రమానికి ముఖ్య అతిథిగా హాజరైన HMDA మెట్రోపాలిటన్ కమిషనర్, ప్రభుత్వ కార్యదర్శి (మెట్రోపాలిటన్ ఏరియా అండ్ అర్బన్ డెవలప్‌మెంట్ – HMDA పరిధి), GHMC ప్రత్యేక అధికారి సర్ఫరాజ్ అహ్మద్, IAS కీలకోపన్యాసం చేశారు. పట్టణాల అభివృద్ధిలో పారిశుధ్య నిర్వహణ, వ్యర్థాల శాస్త్రీయ నిర్వహణ, ఆధునిక విధానాల అమలు, అధికారుల సామర్థ్య పెంపు వంటి అంశాల ప్రాధాన్యతను ఈ కార్యక్రమం ద్వారా వివరించారు. ఈ సందర్భంగా అడ్మినిస్ట్రేటివ్ స్టాఫ్ కాలేజ్ ఆఫ్ ఇండియా (ASCI), గ్రేటర్ హైదరాబాద్ మున్సిపల్ కార్పొరేషన్ (GHMC) మధ్య అవగాహన ఒప్పందం (MoU) మార్పిడి జరిగింది. పట్టణ పాలనలో సంస్థాగత సహకారాన్ని బలోపేతం చేయడం, మున్సిపల్ అధికారులకు శిక్షణ, నైపుణ్యాభివృద్ధి కల్పించడం, మెరుగైన పట్టణ పరిపాలనకు అవసరమైన కార్యాచరణను ప్రోత్సహించడం ఈ ఒప్పందం ప్రధాన ఉద్దేశం. ఈ కార్యక్రమంలో GHMC కమిషనర్ ఆర్.వి. కర్ణన్, IAS, డాక్టర్ ఎన్. రమేష్ కుమార్, IAS (రిటైర్డ్), డాక్టర్ బి. జనార్ధన్ రెడ్డి, IAS (రిటైర్డ్), డాక్టర్ ఎం. స్నేహలత, డాక్టర్ వల్లి మణిక్కం, డాక్టర్ ఓ.పి. సింగ్, ఉదయ్ సింగ్ గౌతమ్,  కె.బి. రంజిత్ కుమార్, డి. ఫణి కృష్ణ తదితర ప్రముఖులు, ఉన్నతాధికారులు, మున్సిపల్ అధికారులు పాల్గొన్నారు. పట్టణాల్లో పారిశుధ్య ప్రమాణాలను పెంపొందించడం, చెత్త నిర్వహణలో ఆధునిక పద్ధతులను ప్రవేశపెట్టడం, స్వచ్ఛ సర్వేక్షణ్‌లో మెరుగైన ప్రమాణాలను సాధించడం, ప్రజలకు మెరుగైన మున్సిపల్ సేవలు అందించడం వంటి లక్ష్యాల సాధనకు ఈ శిక్షణ కార్యక్రమం దోహదపడనుంది.

ఎంపీడీఓ మునయ్యకు వినతిపత్రం అందజేత న్యాయం జరిగే వరకు విధుల్లో చేరే ప్రసక్తిలేదు  నల్గొండ/మర్రిగూడ : ఉన్నతాధికారుల తీవ్రమైన మానసిక ఒత్తిళ్లు, అనుచిత వేధింపులను నిరసిస్తూ నల్గొండ జిల్లా మర్రిగూడ మండల పరిధిలోని పంచాయతీ కార్యదర్శులు ఆందోళన బాటపట్టారు. మండలంలోని మొత్తం 16 మంది కార్యదర్శులు ఒక్కసారిగా ముకుమ్మడిగా సెలవులో వెళ్లాలని సంచలన నిర్ణయం తీసుకున్నారు. ఈ మేరకు మంగళవారం మధ్యాహ్నం మండల పరిషత్ కార్యాలయంలో ఎంపీడీఓ జి.సి.మునయ్యను కలసి తమ ముకుమ్మడి సెలవు అభ్యర్థన వినతిపత్రాన్ని అందజేశారు. నిత్యం మానసిక నరకం... భరించలేకే ఈ నిర్ణయం మండల పంచాయతీ కార్యదర్శుల సంఘం అధ్యక్షుడు వంశీ మాట్లాడుతూ కార్యదర్శుల ఆవేదనను వెళ్లగక్కారు. నిత్యం విధి నిర్వహణలో క్షేత్రస్థాయి సమస్యలతో పాటు ఉన్నతాధికారుల నుంచి ఎదురవుతున్న తీవ్ర మానసిక ఒత్తిళ్లు, వేధింపులతో సతమతమవుతున్నామని ఆందోళన వ్యక్తం చేశారు. సమయంతో నిమిత్తం లేకుండా అప్పగించే అదనపు బాధ్యతలు, సాధ్యాసాధ్యాలను పరిగణనలోకి తీసుకోకుండా లక్ష్యాలను నిర్దేశించడం, పై అధికారుల వేధింపులతో మానసిక ప్రశాంతత కరువైందని వాపోయారు. రోజురోజుకూ ఈ ఒత్తిడి భరించరాని స్థాయికి చేరడంతోనే వేరే దారి లేక ఈ తీవ్ర నిర్ణయం తీసుకోవాల్సి వచ్చిందని స్పష్టం చేశారు. క్షేత్రస్థాయిలో స్తంభించిన పాలన. ఒకేసారి మండలంలోని 16 గ్రామాల పంచాయతీ కార్యదర్శులు విధులను బహిష్కరించి ముకుమ్మడి సెలవు పెట్టడంతో గ్రామాల్లో పంచాయతీ పాలన తీవ్రంగా ప్రభావితమయ్యే అవకాశం కనిపిస్తోంది. పారిశుద్ధ్యం, తాగునీటి సరఫరా, జనన-మరణ ధ్రువీకరణ పత్రాలు, పన్నుల వసూలు వంటి నిత్యావసర సేవలకు అంతరాయం కలిగే ప్రమాదం ఉంది. సమస్యలు తీరే వరకు వెనక్కి తగ్గేదే లేదు! తాము ఎదుర్కొంటున్న వేధింపులపై సమగ్ర విచారణ జరిపి నివేదిక సేకరించాలని, తమ సమస్యలకు శాశ్వత పరిష్కారం చూపి తగిన న్యాయం చేయాలని పంచాయతీ కార్యదర్శులు డిమాండ్ చేశారు. సమస్యలు పరిష్కారమయ్యేంత వరకు తిరిగి విధుల్లోకి చేరే ప్రసక్తే లేదని తేల్చి చెప్పారు. ఈ నిరసన కార్యక్రమంలో మండల పరిధిలోని 16 గ్రామాల పంచాయతీ కార్యదర్శులు అందరూ పాల్గొని సంఘీభావం తెలిపారు.కాగా, మండల కార్యదర్శుల ముకుమ్మడి సెలవు నిర్ణయంపై ఉన్నతాధికారులు ఎలా స్పందిస్తారో, గ్రామాల్లో ప్రత్యమ్నాయ ఏర్పాట్లు ఏం చేస్తారో వేచి చూడాల్సి ఉంది.

త్రిపురారం : ఇంకుడుగుంతల ప్రాధాన్యతపై ప్రజలకు అవగాహాన కల్పించాల్సిన బాధ్యత అధికారులు, ప్రజా ప్రతినిధులకు ఉందని ఎంపీడీఓ విజయకుమారి అన్నారు. మండలకేంద్రంలోని ఎంపీడీఓ కార్యాలయంలో మంగళవారం మండల ప్రజా పరిషత్ సమావేశాన్ని నిర్వహించారు. ఈ సందర్భంగా ఆమె మాట్లాడుతూ ప్రతి గ్రామ పంచాయతీ పరిధిలో 100 ఇంకుడు గుంతల తక్కువ కాకుండా తీయించాలన్నారు. దీని వల్ల భూగర్భజలాలు పెరిగి మంచి నీటి సమస్యను అధిగమించవచ్చునని సూచించారు. అంతేకాకుండా విద్యుత్ ను ఆదా చేయాలని సూచించారు. ముఖ్యంగా ఈ రబీలో రైతులు వరి పైరును సాగు చేయకుండా మెట్ట పంటలు సాగు చేసే విధంగా రైతులకు సంబంధిత అధికారులు తగిన సూచనలు చేయాలన్నారు. గృహా అవసరాలకు అవసరమైన మేర మాత్రమే నీటిని వినియోగించాలని ముఖ్యంగా నీటి వృధాను అరికట్టాలని అన్నారు. ఈ కార్యక్రమంలో తహాసీల్దార్ ప్రమీల, మండల ప్రత్యేకాధికారి లీలా, విద్యుత్ ఏఈ బాలూనాయక్, మండల విద్యాధికారి రవినాయక్, మండల వ్యవసాయాధికారి పార్వతీచౌహాన్, ఏపీఓ శ్యామల, పశువైద్యాధికారి నాగేందర్, మండల వైద్యాధికారి వనిత, ఎంపీఓ శివ, మాజీ పీఏసీఎస్ చైర్మెన్ జయరాంనాయక్ తదితరులు పాల్గొన్నారు.

నాంపల్లి మండలంలోని చిట్టంపహాడ్ గ్రామానికి చెందిన బల్సుల భాగ్యమ్మ మృతి చెందడంతో ఆమె కుటుంబాన్ని మాజీ జెడ్పీటీసీ సభ్యులు ఏవీ రెడ్డి పరామర్శించి ప్రగాఢ సానుభూతి తెలిపారు. భాగ్యమ్మ మృతిచెందిన విషయం తెలుసుకున్న ఆయన గ్రామానికి చేరుకుని కుటుంబ సభ్యులను ఓదార్చారు. ఈ సందర్భంగా మృతురాలి కుమారుడు నాగ శ్రవణ్‌కు రూ.10 వేల ఆర్థిక సహాయాన్ని అందజేశారు.ఆపద సమయంలో బాధిత కుటుంబానికి అండగా నిలవడం అభినందనీయమని గ్రామస్థులు పేర్కొన్నారు. ఈ కార్యక్రమంలో మాజీ సర్పంచులు నాయిని జగన్‌మోహన్ రెడ్డి, అబ్బనబోయిన చందు యాదవ్, నాంపల్లి సర్పంచ్ నక్క చంద్రశేఖర్, యువ నాయకుడు గజ్జెల శివారెడ్డి, మహమ్మదాపురం మాజీ సర్పంచ్ మల్గిరెడ్డి చంద్రారెడ్డి, సపావత్ సర్దార్, గజ్జెల గెల్వాల్ రెడ్డి, గ్రామస్థులు అంజయ్య, రమేష్, శ్రీనివాస్ రెడ్డి, పాండు తదితరులు పాల్గొన్నారు.

6 గ్రామాల ప్రజలకు 6 విభాగాల వైద్య నిపుణులతో ఉచిత వైద్య శిబిరం మూఢనమ్మకాలకు దూరంగా ఉండాలి.. ఆరోగ్య సమస్యలకు వైద్యులను సంప్రదించాలి గంజాయి, మత్తు పదార్థాలకు దూరంగా ఉండాలి. *చదువు ఒక్కటే భవిష్యత్తును మార్చే ఆయుధం – జిల్లా ఎస్పీ అఖిల్ మహాజన్  ఆదిలాబాద్ బ్యూరో : ఆదిలాబాద్ జిల్లా ఆదివాసీ గ్రామాల ప్రజలకు మెరుగైన వైద్య సదుపాయాలు అందించడంతో పాటు, ప్రజల్లో అవగాహన పెంపొందించి గ్రామాల అభివృద్ధికి తోడ్పడాలనే లక్ష్యంతో చెరువుగూడ గ్రామంలో పోలీసు మీకోసం కార్యక్రమాన్ని నిర్వహించారు. ఈ కార్యక్రమంలో భాగంగా 6 గ్రామాల ప్రజలకు 6 విభాగాలకు చెందిన వైద్య నిపుణులతో ఉచిత వైద్య శిబిరాన్ని ఏర్పాటు చేశారు. సుమారు 300 మంది గ్రామ ప్రజలు, విద్యార్థినీ విద్యార్థులు పాల్గొన్నారు.ఈ సందర్భంగా జిల్లా ఎస్పీ అఖిల్ మహాజన్  మాట్లాడుతూ.. మూఢనమ్మకాలు, బాబాలను నమ్మకుండా ఆరోగ్య సమస్యలు వచ్చినప్పుడు సమీపంలోని ప్రభుత్వ లేదా ప్రైవేటు వైద్యులను సంప్రదించాలని సూచించారు. ప్రజలకు మెరుగైన వైద్య సేవలు అందించాలనే ఉద్దేశంతో ఉచిత వైద్య శిబిరాన్ని ఏర్పాటు చేసినట్లు తెలిపారు. గంజాయి, మత్తు పదార్థాలకు దూరంగా ఉండాలని, గంజాయి సాగు చేయడం వల్ల ప్రభుత్వ సంక్షేమ పథకాలకు అర్హత కోల్పోయే అవకాశం ఉందని తెలిపారు. యువత చెడు మార్గాలకు దూరంగా ఉంటూ గ్రామ అభివృద్ధిలో భాగస్వాములు కావాలని, సంఘ విద్రోహ శక్తులకు దూరంగా ఉన్నప్పుడే గ్రామాల్లో ప్రశాంతత, అభివృద్ధి సాధ్యమవుతుందని పేర్కొన్నారు. బాలబాలికలకు సమాన విద్యా అవకాశాలు కల్పించి ఉన్నత భవిష్యత్తుకు బాటలు వేయాలని, చదువు ఒక్కటే జీవితాన్ని మార్చగల శక్తివంతమైన ఆయుధమని తెలిపారు. విద్యార్థులు కష్టపడి చదివి ఉన్నత లక్ష్యాలను సాధించి తమ గ్రామానికి మంచి పేరు తీసుకురావాలని సూచించారు. మహిళలు, విద్యార్థినులు ఎలాంటి సమస్యలు ఎదురైనా పోలీసు అక్క లేదా డయల్ 112 ద్వారా పోలీసులను సంప్రదించాలని, సమస్యలను నిర్భయంగా తెలియజేయాలని సూచించారు. తల్లిదండ్రులు బాల్యవివాహాలకు దూరంగా ఉండాలని, బాల్యవివాహాల సమాచారం తెలిసిన విద్యార్థినులు పోలీసులకు నిర్భయంగా సమాచారం అందించాలని తెలిపారు. యువత ఉద్యోగ అవకాశాలను అందిపుచ్చుకొని ఉన్నత స్థాయికి ఎదగాలని, రోడ్డు భద్రతా నియమాలు పాటిస్తూ ప్రమాదాల నివారణకు ప్రతి ఒక్కరూ బాధ్యతగా వ్యవహరించాలని సూచించారు. ద్విచక్ర వాహనదారులు తప్పనిసరిగా హెల్మెట్ ధరించాలని, మద్యం సేవించి వాహనాలు నడపవద్దని, విద్యార్థులు తమ తల్లిదండ్రులు హెల్మెట్ ధరించేలా ప్రోత్సహించాలని తెలిపారు. ఈ కార్యక్రమంలో భాగంగా ఆరు విభాగాలకు చెందిన వైద్య నిపుణులచే ఉచిత వైద్య సేవలు అందించారు. కంటి సమస్యలు ఉన్నవారికి ఆదిలాబాద్‌లో ఉచితంగా కంటి శస్త్రచికిత్సలు నిర్వహించి, అనంతరం తమ వాహనాల్లో గ్రామానికి తిరిగి చేరవేస్తామని హామీ ఇచ్చారు. విద్యార్థులు, గ్రామ ప్రజలు నిర్వహించిన సాంస్కృతిక కార్యక్రమాలు అందరినీ అలరించాయి. ఈ కార్యక్రమంలో ఉట్నూర్ ఏఎస్పీ రిత్విక్ సాయి కొట్టే ఐపీఎస్, ఉట్నూర్ సీఐ ఎం. ప్రసాద్, ఎస్ఐ జి. విజయ్, ఆదిలాబాద్ నుండి వచ్చిన వైద్యులు డాక్టర్ సందీప్ ఐత్వార్, డాక్టర్ టి. వెంకటేష్, డాక్టర్ ఇందూజ, డాక్టర్ శ్వేత, డాక్టర్ సౌమ్య, డాక్టర్ సాగ్నిక్, గ్రామ పెద్దలు, గ్రామ సర్పంచ్ భగవంతరావు, పోలీసు సిబ్బంది, గ్రామ ప్రజలు, విద్యార్థులు తదితరులు పాల్గొన్నారు.

ఫోన్ పే, గూగుల్ పే ద్వారా నగదు బదిలీ చేయించుకుని పరారైన నిందితులు ఆదిలాబాద్ బ్యూరో : ఆదిలాబాద్ జిల్లా మావల పోలీస్ స్టేషన్ పరిధిలో డబ్బులు రెట్టింపు చేస్తామని నమ్మించి ప్రజలను మోసం చేస్తున్న నలుగురు వ్యక్తులపై కేసు నమోదు చేసి దర్యాప్తు చేపట్టినట్లు మావల పోలీస్ స్టేషన్ ఎస్‌హెచ్‌ఓ బి.డి. ప్రేమ్ కుమార్ తెలిపారు.భగత్‌సింగ్ నగర్‌కు చెందిన గణేష్ అనే వ్యక్తి గతంలో కామారెడ్డి సమీపంలో విజయ్, రేఖ, బాలాజీ అనే వ్యక్తుల వద్ద రూ.15,000 తీసుకోగా, మూడు నెలల తర్వాత రెట్టింపు నగదు ఇస్తామని వారు నమ్మించారు. అనంతరం జనవరి 28న లక్ష్మి, విజయ్, రేఖ, బాలాజీ అనే నలుగురు వ్యక్తులు భగత్‌సింగ్ నగర్‌కు వచ్చి రూ.30,000 తీసుకున్నారు. అదనంగా మరో రూ.30,000 చెల్లిస్తే అదే రోజు రూ.1,00,000 తిరిగి ఇస్తామని నమ్మించడంతో బాధితుడు ఫోన్ పే, గూగుల్ పే ద్వారా రూ.30,000 బదిలీ చేశాడు.అనంతరం నిందితులు భోజనం చేసి వస్తామని చెప్పి అంబేద్కర్ చౌక్‌లోని బావర్చి హోటల్‌కు వెళ్లి, భోజనం అనంతరం ఇన్నోవా కారులో పరారయ్యారు. ఈ క్రమంలో నిందితులకు చెందిన వివో మొబైల్ ఫోన్ హోటల్ వద్ద మరిచిపోయి వెళ్లారు. ఆ ఫోన్‌లో నిందితుల ఫోటోలు ఉన్నట్లు బాధితుడు ఫిర్యాదులో పేర్కొన్నారూ. ఇదే తరహాలో మరో 16 మందిని కూడా మోసం చేసినట్లు బాధితుడు ఫిర్యాదు చేయగా, నిందితులు ఫోన్ ద్వారా బెదిరింపులకు పాల్పడినట్లు తెలిపారు.ఈ ఘటనపై మావల పోలీస్ స్టేషన్‌లో క్రైమ్ నంబర్ 57/2026, భారతీయ న్యాయ సంహిత సెక్షన్ 318(4) రెడ్‌విత్ 3(5) ప్రకారం కేసు నమోదు చేసి దర్యాప్తు చేపట్టినట్లు ఎస్‌హెచ్‌ఓ తెలిపారు.నిందితుల వివరాలు:1. లక్ష్మి – పరారీలో ఉంది.2. విజయ్ @ దాసరి రాజు, తండ్రి గంగారం, వయస్సు 31 సంవత్సరాలు, నివాసం చైతన్య కాలనీ, బాన్సువాడ, కామారెడ్డి జిల్లా.3. రేఖ – పరారీలో ఉంది.4. బాలాజీ – కామారెడ్డి జిల్లా, పరారీలో ఉన్నాడు.ప్రజలు డబ్బులు రెట్టింపు చేస్తామని, తక్కువ సమయంలో అధిక లాభాలు వస్తాయని చెప్పే వ్యక్తుల మాటలను నమ్మి నగదు బదిలీ చేయవద్దని, ఇటువంటి మోసాల పట్ల అప్రమత్తంగా ఉండాలని మావల పోలీస్ స్టేషన్ ఎస్‌హెచ్‌ఓ బి.డి. ప్రేమ్ కుమార్ సూచించారు. ఎవరైనా సైబర్ లేదా ఆర్థిక మోసాలకు గురైతే వెంటనే 1930 హెల్ప్‌లైన్ నంబర్‌కు సమాచారం అందించాలని తెలిపారు.