జయశంకర్ భూపాలపల్లి జిల్లా   మహాదేవపూర్ మండలంలోని  గంగపుత్ర సంఘం ముదిరాజ్ కులాన్ని బీసీడీ నుండి బీసీఏలోకి మార్చాలని ప్రతిపాదనను మహాదేవపూర్ మండలం గంగపుత్ర సంఘం తీవ్రంగా వ్యతిరేకిస్తుందని సంఘము నాయకులు తెలిపారు. ఈరోజు మహాదేవపూర్ మండలంలోని తాసిల్దార్ కార్యాలయములో వినతి పత్రంను అందజేయడం జరిగింది ఈ సందర్భంగా వారు మాట్లాడుతూ తెలంగాణలోని బీసీఏ గ్రూపులో  7 శాతం రిజర్వేషన్లు గంగపుత్ర,రజక, నాయి బ్రాహ్మణ,వడ్డెర,మేదరి బుడుగ జంగం తో సహా 54 అత్యంత వెనుకబడిన కులాలు ఉన్నాయి. 40 లక్షల జనాభా కలిగిన ముదిరాజ్ కులాన్ని ఈ 7 శాతం లో కలిపితే మా బతుకులు రోడ్డున పడతాయని ఆవేదన వ్యక్తం చేశారు.బిసీ ఏ లోని 54 కులాల పిల్లలు విద్య, ఉద్యోగ అవకాశాలను దెబ్బతింటాయని కావున ప్రభుత్వం ఈ ప్రతిపాదనను వెంటనే ఉపసంహరించుకోవాలని డిమాండ్ చేశారు.లేని పక్షంలో బీసీఏ లోని 54 కులాలను కలిసి రాష్ట్రవ్యాప్తంగా పెద్ద ఎత్తున ఉద్యమిస్తామని హెచ్చరించారు.ఈ కార్యక్రమంలోని  మహదేవపూర్ గ్రామ అధ్యక్షులు నాగుల ధర్మయ్య, ఉపాధ్యక్షులు ముద్రగడ శివరాం, కాలేశ్వరం గ్రామ అధ్యక్షులు గోర దేవయ్య,ఉపాధ్యక్షులు తూనూరి శ్రీకాంత్, బెంగుళూరు అధ్యక్షులు కాపరబోయిన మహేష్  ఉపాధ్యక్షులు కాపరబోయిన మధు తదితరులు గంగపుత్రులు పాల్గొన్నారు.

కాళేశ్వరం: (జెడ్ పి హెచ్ ఎస్) కాళేశ్వరం ప్రభుత్వ పాఠశాలలో సోమవారం రోజు ఉదయం విద్యార్థుల కోసం రాష్ట్ర ప్రభుత్వం అందిస్తున్న అల్పాహార పథకాన్ని ఘనంగా ప్రారంభించారు. గ్రామ సర్పంచ్ శ్రీ వన్నెపు రెడ్డి మోహన్ రెడ్డి, ఉపసర్పంచ్ శ్రీ చెమ్మాల సుధీర్, అమ్మ ఆదర్శ పాఠశాల కమిటీ చైర్‌పర్సన్ శ్రీమతి సుంకరి లక్ష్మి ముఖ్య అతిథులుగా పాల్గొని తమ చేతుల మీదుగా ఈ కార్యక్రమాన్ని ప్రారంభించారు. విద్యార్థులకు పౌష్టికాహారం అందించడం, వారి ఆరోగ్యాన్ని మెరుగుపరచడం, చదువుపై ఏకాగ్రతను పెంపొందించడం, పాఠశాలకు హాజరును ప్రోత్సహించడం వంటి లక్ష్యాలతో ఈ అల్పాహార పథకం ఎంతో ఉపయోగకరంగా ఉంటుందని ఈ సందర్భంగా  సర్పంచ్ వెన్నపురెడ్డి మోహన్ రెడ్డి పేర్కొన్నారు. విద్యార్థుల శారీరక, మానసిక అభివృద్ధితో పాటు విద్యా ప్రమాణాల మెరుగుదలకు ఇటువంటి కార్యక్రమాలు దోహదపడతాయని ప్రధానోపాధ్యాయులు తెలిపారు. ఈ కార్యక్రమంలో పాఠశాల ప్రధానోపాధ్యాయులు శ్రీ దొనికల రాజేందర్, ఉపాధ్యాయ బృందం, క్లస్టర్ రిసోర్స్ పర్సన్లు ( సి ఆర్ పి ఎస్ ) పాల్గొన్నారు.

జయశంకర్ భూపాలపల్లి జిల్లా మహాదేవపూర్ మండలం మద్దులపల్లి గ్రామంలోని ప్రాథమిక పాఠశాలలో రాష్ట్ర ప్రభుత్వం అందిస్తున్న సంక్షేమ పథకంలో భాగంగా అల్పాహార కార్యక్రమాన్ని ప్రారంభించారు. ఈ కార్యక్రమానికి గ్రామ సర్పంచ్ సరిత ముఖ్య అతిథిగా హాజరై విద్యార్థులకు అల్పాహారం అందజేశారు. ప్రభుత్వం అందిస్తున్న సంక్షేమ పథకాలను విద్యార్థులు సద్వినియోగం చేసుకోవాలని కోరారు. ఈ కార్యక్రమంలో ఉపసర్పంచ్ లచ్చిరెడ్డి, ఉపాధ్యాయులు సదయ్య, శ్యామ్ తదితరులు పాల్గొన్నారు.

జయశంకర్ భూపాలపల్లి జిల్లా కాటారం మండలం కాటారం గ్రామపంచాయతీ మాజీ సర్పంచ్ కొర్ర మనోహర్ నాయక్ ఇటీవల అనారోగ్యంతో మృతి చెందగా ఆయన ఆత్మకు శాంతి కలగాలని కోరుతూ సోమవారం ఉపాధి హామీ కూలీలు సంతాపం తెలియజేశారు. కాటారం, గారేపల్లి గ్రామాలకు చెందిన ప్రజలు ఉపాధి హామీ పనులు చేస్తుండగా మాజీ సర్పంచి కొర్ర మనోహర్ నాయక్ స్మారకార్థం రెండు నిమిషాలు మౌనం పాటించి నివాళులు అర్పించారు. మనోహర్ నాయక్ పదవీకాలంలో పేద, బడుగు బలహీన వర్గాలకు సేవలు అందించారని పార్టీలకు అతీతంగా పలువురు నాయకులు కొనియాడారు. ఆయన కుమారుడు కొర్ర శ్రీకాంత్ ప్రస్తుత పంచాయతీ పాలకవర్గంలో వార్డు సభ్యులుగా ఉన్నారు. కాగా మనోహర్ నాయక్ సేవలను స్మరిస్తూ పలువురు కంట తడి పెట్టుకున్నారు.

భూపాలపల్లి పట్టణంలో గ్రాడ్యుయేట్ ఓటరు నమోదు కార్యక్రమంపై మాజీ ఎమ్మెల్యే గండ్ర వెంకట రమణా రెడ్డి  గల్లీ గల్లీ తిరుగుతూ అవగాహన కల్పించారు.స్థానిక జయశంకర్ పార్కులో వాకర్స్‌ను, మున్సిపాలిటీ పరిధిలోని 16, 17, 29వ వార్డులు సుభాష్ కాలనీలో ఇంటింటికీ వెళ్లి అర్హులైన పట్టభద్రులందరూ వెంటనే గ్రాడ్యుయేట్ ఓటరుగా నమోదు చేసుకోవాలని కోరారు.అర్హులైన ప్రతి పట్టభద్రుడు ఓటరుగా నమోదు చేసుకొని, ప్రజాస్వామ్యంలో తన ఓటు హక్కును సద్వినియోగం చేసుకోవాలని ఈ సందర్బంగా కోరారు.

 కాటారం (భూపాలపల్లి): తెలంగాణ రక్షణ సేన (టిఆర్ఎస్) జయశంకర్ భూపాలపల్లి జిల్లా యూత్ అధ్యక్షుడిగా బుర్ర వినోద్ గౌడ్ ను నియమించారు. ఈ మేరకు టిఆర్ఎస్ వ్యవస్థాపక అధ్యక్షురాలు కల్వకుంట్ల కవిత ఉత్తర్వులు జారీ చేశారు. తెలంగాణ జాగృతి లో చురుకైన కార్యకర్తగా పనిచేస్తూ, కల్వకుంట్ల కవితకు సుపరిచితులుగా ఉన్న వినోద్ గౌడ్ నియామకం పట్ల పలువురు హర్షం వ్యక్తం చేశారు. ఈ సందర్భంగా బుర్ర వినోద్ గౌడ్ మాట్లాడుతూ తన నియామకానికి సహకరించిన పార్టీ జిల్లా నాయకత్వానికి, రాష్ట్ర అధ్యక్షురాలు కల్వకుంట్ల కవితకు కృతజ్ఞతలు తెలియజేశారు. రాబోయే రోజుల్లో టిఆర్ఎస్ యూత్ విభాగాన్ని పూర్తిస్థాయిలో విస్తరింప చేస్తామని, రానున్న ఎన్నికల్లో తమ సత్తాను నిరూపిస్తామనివెల్లడించారు.

భూపాలపల్లి:గణపురం మండలం గొల్లపల్లిలో తన 3 ఎకరాల పొలంలో వరి పంట నీళ్లు లేక, కరెంటు లేక ఎండిపోవడంతో ద్విచక్ర వాహనంతో పొలంలో తిరుగుతూ నిరసన తెలిపిన రైతు ప్రవీణ్. కాంగ్రెస్ ప్రభుత్వం వచ్చాక రైతులకు సాగునీరు లేక, కరెంటు లేక ఇబ్బందులు ఎదుర్కొంటున్నామని, ప్రభుత్వం ఆదుకోవాలని.. లేదంటే ఆత్మహత్యే శరణ్యం అంటూ రైతు ఆవేదన.

కాటారం ( భూపాలపల్లి): జయశంకర్ భూపాలపల్లి జిల్లా కలెక్టర్ రాహుల్ శర్మ, డీపీఆర్ఓ శ్రీనివాస్ ఆదేశాల మేరకు, కాటారం మండలం కొత్తపల్లి గ్రామంలో తెలంగాణ సాంస్కృతిక సారథి ఆధ్వర్యంలో సెగ్గం శిరీష కళాబృందం సభ్యులు ఎల్‌నినో ప్రభావంతో ఏర్పడే వాతావరణ మార్పులు, కరువు పరిస్థితులు, వ్యవసాయ రంగంపై వాటి ప్రభావం, ప్రజలు తీసుకోవాల్సిన జాగ్రత్తలపై కళాజాత ద్వారా విస్తృతంగా అవగాహన కల్పించారు. ఈ కార్యక్రమం ద్వారా రైతులకు వాతావరణ పరిస్థితులకు అనుగుణంగా పంటల ఎంపిక చేసుకోవడం, సాగులో ముందస్తు జాగ్రత్తలు పాటించడం, వ్యవసాయ నష్టాలను తగ్గించుకోవడం వంటి అంశాలపై కళాకారులు సందేశాన్ని అందించారు.ఈ సందర్భంగా కళాకారులు మాట్లాడుతూ, ఎల్‌నినో ప్రభావం కారణంగా ఉష్ణోగ్రతలు పెరగడం, వర్షపాతం సాధారణ స్థాయిలో లేకపోవడం వంటి పరిస్థితులు ఏర్పడే అవకాశం ఉన్నందున రైతులు అప్రమత్తంగా ఉండాలని సూచించారు. వాతావరణ పరిస్థితులను దృష్టిలో ఉంచుకొని వ్యవసాయ ప్రణాళికలను రూపొందించుకోవాలని, అందుబాటులో ఉన్న నీటి వనరులను పొదుపుగా వినియోగించుకోవాలని, పంట సాగుకు ముందే వర్షపాతం, నేల స్వభావం, నీటి లభ్యత వంటి అంశాలను పరిశీలించాలని వివరించారు. ఆరుతడి పంటల సాగుతో కరువు పరిస్థితులను దృష్టిలో ఉంచుకొని రైతులు తమ ప్రాంతానికి అనుకూలమైన ఆరుతడి పంటలకు ప్రాధాన్యత ఇవ్వాలని కళాబృందం సభ్యులు సూచించారు.ఈ అవగాహన కార్యక్రమంలో తెలంగాణ సాంస్కృతిక సారథి సెగ్గం శిరీష కళాబృందం సభ్యులు సెగ్గం శిరీష, పులి రాధిక, కాస స్వాతి, ఆత్మకూరి మహేందర్, కమ్మల ప్రవీణ్ కుమార్, ఒనపాకల కుమార్, పాల్గొని కళాజాత ద్వారా ప్రజలకు అవగాహన కల్పించారు.ప్రజల ఆరోగ్యం, రైతుల సంక్షేమం, కరువు పరిస్థితులపై ముందస్తు అవగాహన కల్పించడమే లక్ష్యంగా నిర్వహించిన ఈ కళాజాత కార్యక్రమం ద్వారా కొత్తపల్లి గ్రామ ప్రజలకు ఎల్‌నినో ప్రభావం, వ్యవసాయ జాగ్రత్తలు, ఆరుతడి పంటల సాగు ప్రాధాన్యతపై సందేశాన్ని అందించారు.

భూపాలపల్లి : పట్టణ అభివృద్ధి పేరుతో  భూపాలపల్లిలో చేపడుతున్న అశాస్త్రీయ రోడ్డు విస్తరణ పనుల్లో భాగంగా భూపాలపల్లి పట్టణంలోని డాక్టర్ బాబాసాహెబ్ అంబేడ్కర్ విగ్రహాన్ని అక్కడి నుంచి తరలించాలనే ఆలోచనను సంబంధిత అధికారులు, పాలకులు తక్షణమే విరమించుకోవాలని బీసీ, ఎస్సీ, ఎస్టీ జేఏసీ భూపాలపల్లి జిల్లా కన్వీనర్  రాదండి దేవేందర్ డిమాండ్ చేశారు. డాక్టర్ బాబాసాహెబ్ అంబేడ్కర్ విగ్రహాన్ని తరలించడం అంటే కేవలం ఒక విగ్రహాన్ని ఒకచోటు నుంచి మరోచోటుకు మార్చడం కాదని, యావత్ బీసీ, ఎస్సీ, ఎస్టీ సమాజ ఆత్మగౌరవాన్ని, సామాజిక న్యాయ ఆకాంక్షలను అవమానించడమేనని వారు పేర్కొన్నారు. అంబేడ్కర్ ఆశయాలు కోట్లాది ప్రజలకు స్ఫూర్తినిస్తున్నాయని, అలాంటి మహనీయుడి విగ్రహం విషయంలో అధికారులు, పాలకులు అత్యంత బాధ్యతాయుతంగా వ్యవహరించాలని సూచించారు. రోడ్ల విస్తరణ, పట్టణ అభివృద్ధి అవసరమే అయినప్పటికీ, ఆ పేరుతో ప్రజల చారిత్రక, సామాజిక గుర్తింపులను దెబ్బతీసే నిర్ణయాలు తీసుకోవడం సరికాదని జేఏసీ నాయకులు స్పష్టం చేశారు. రోడ్డు విస్తరణకు సంబంధించి అధికారులు ఒక స్పష్టమైన ప్రణాళిక రూపొందించి, ప్రజల అభిప్రాయాలను పరిగణనలోకి తీసుకోవాలని కోరారు. అభివృద్ధి అందరికీ ఉపయోగపడేలా ఉండాలి తప్ప, ఒక వర్గం ఆత్మగౌరవానికి భంగం కలిగించేలా ఉండకూడదని అన్నారు.భూపాలపల్లిలో సర్కిల్ నిర్మాణం చేపట్టాలని అధికారులు, పాలకులు భావిస్తే, ఆ సర్కిల్ మధ్యలో డాక్టర్ బాబాసాహెబ్ అంబేడ్కర్ విగ్రహమే కొనసాగాలని బీసీ, ఎస్సీ, ఎస్టీ జేఏసీ డిమాండ్ చేసింది. ఇంతకాలంగా అంబేడ్కర్ సెంటర్‌గా గుర్తింపు పొందిన ఆ ప్రాంతాన్ని అదే పేరుతో, అదే గౌరవంతో కొనసాగించాలని కోరారు. విగ్రహాన్ని తరలించాలనే ప్రతిపాదనను పునఃపరిశీలించి, తరలింపు ఆలోచనకు స్వస్తి పలకాలని మున్సిపల్ కమిషనర్‌తో పాటు సంబంధిత అధికారులను కోరింది.అంబేడ్కర్ విగ్రహాన్ని తరలించే ప్రయత్నం జరుగుతున్నట్లు తెలిసినా, బీసీ, ఎస్సీ, ఎస్టీ వర్గాలకు చెందిన కొందరు నాయకులు స్పందించకపోవడం విచారకరమని జేఏసీ విమర్శించింది. సామాజిక ఆత్మగౌరవానికి సంబంధించిన అంశాల్లో వ్యక్తిగత రాజకీయ ప్రయోజనాల కంటే సమాజ ప్రయోజనాలకే ప్రాధాన్యత ఇవ్వాలని హితవు పలికింది. అంబేడ్కర్ ఆశయాలను గౌరవించే ప్రతి ఒక్కరూ ఈ అంశంపై తమ వైఖరిని స్పష్టం చేయాలని కోరింది. అంబేడ్కర్ విగ్రహాన్ని తరలిస్తే ప్రజాస్వామ్యబద్ధమైన ప్రజా ఉద్యమం మరింత ఉధృతమవుతుందని, అది పట్టణంలో పెద్ద ఎత్తున సామాజిక చైతన్యానికి దారితీస్తుందని జేఏసీ నాయకులు హెచ్చరించారు.విగ్రహ పరిరక్షణ కోసం బీసీ, ఎస్సీ, ఎస్టీ మేధావులు, విద్యార్థులు, యువకులు, ప్రజాసంఘాల నాయకులు, ప్రజలు ఐక్యంగా ముందుకు రావాలని పిలుపునిచ్చారు.అంబేడ్కర్ విగ్రహాన్ని కాపాడుకోవడం అంటే ఒక విగ్రహాన్ని కాపాడుకోవడం మాత్రమే కాదని, సమానత్వం, స్వేచ్ఛ, సౌభ్రాతృత్వం, సామాజిక న్యాయం వంటి రాజ్యాంగ విలువలను కాపాడుకోవడమని వారు పేర్కొన్నారు.

కాటారం (భూపాలపల్లి):  జయశంకర్ భూపాలపల్లి జిల్లా కాటారం మండల తాసిల్దార్ కార్యాలయంలో ఘోర ప్రమాదం జరిగింది. తాసిల్దార్ నాగరాజు తో పాటు కంప్యూటర్ ఆపరేటర్లకు తృటిలో ప్రమాదం తప్పింది. బుధవారం ఉదయం యధావిధిగా విధులకు హాజరైన తాసిల్దార్ నాగరాజు తో పాటు కంప్యూటర్ ఆపరేటర్లు కూర్చున్న గది పైకప్పు సీలింగ్ రూఫ్ ఒక్కసారిగా కుప్పకూలింది. పెచ్చులు ఊడిపడి కంప్యూటర్లపై, కుర్చీలపై, ఇతర సామాగ్రిపై ఒక్కసారిగా పైకప్పు పెచ్చులు ఊడిపడ్డాయి. దాంతో అక్కడే ఉన్న తాసిల్దార్ తో పాటు కంప్యూటర్ ఆపరేటర్లు, సిబ్బంది, అధికారిక కార్యక్రమాల పని మీద వచ్చిన ప్రజలు ఒక్కసారిగా ఉలిక్కిపడ్డారు. పైకప్పు పెచ్చులు ఊడి మీద పడడంతో చిన్న చిన్న గాయాలయ్యాయి. ప్రాణాపాయం నుంచి బయటపడగలిగామని తాసిల్దార్ కార్యాలయం సిబ్బంది ఆందోళన వ్యక్తం చేశారు. చాలా పురాతన కాలం నాటి నిర్మాణం కావడం వల్ల పైకప్పు పెచ్చులు ఊడి కింద పడిపోయి ప్రాణాపాయ స్థితిలో పలు కార్యాలయ సిబ్బంది భయాందోళన మధ్య విధులు నిర్వహించాల్సి వస్తుంది. ఇప్పటికైనా జిల్లా కలెక్టర్ స్పందించి మండలంలోని అన్ని ప్రభుత్వ కార్యాలయాలు, పాఠశాలలు, వసతి గృహాలలో పైకప్పు స్థితిగతులను పరిశీలించేందుకు ప్రత్యేక బృందాన్ని పంపించి తనిఖీలు చేయించాలని పలువురు కోరుతున్నారు. కాటారం మండలంలోని తాసిల్దార్ కార్యాలయాన్ని సబ్ కలెక్టర్ కార్యాలయ సముదాయంలోకి మార్చాలని మరికొందరు కోరుతున్నారు.

కాటారం (భూపాలపల్లి): జయశంకర్ భూపాలపల్లి జిల్లా కాటారం మండలం గారెపల్లిలో ఆర్యవైశ్య సంఘం ఆధ్వర్యంలో నిర్వహిస్తున్న దుర్గాదేవి శరన్నవరాత్రి ఉత్సవాలు అంగరంగ వైభవంగా కొనసాగుతున్నాయి. మంగళవారం మూడవరోజు సందర్భంగా అమ్మవారు అన్నపూర్ణ దేవిగా దర్శనమిచ్చారు. ఈ సందర్భంగా అమ్మవారి మండపాన్ని కూరగాయలు, వరి , మక్క కంకులు, తామర పుష్పాలతో అలంకరించారు. ఉత్సవాల సందర్భంగా 24 గంటలు నిరంతరంగా భజనలు నిర్వహిస్తూ ఏకాహం ప్రారంభించారు. మహిళలు మంగళహారతులతో అమ్మవారిని దర్శించుకుంటున్నారు. దంపతులు పూజాది కార్యక్రమంలో పాల్గొని అన్నదానం, పలు కార్యక్రమాలను నిర్వహిస్తున్నారు.

కాటారం (భూపాలపల్లి):  జయశంకర్ భూపాలపల్లి జిల్లా కాటారం ప్రాథమిక ఆరోగ్య కేంద్రంలో బుధవారం బతుకమ్మ సంబరాలు నిర్వహిస్తున్నట్లు ప్రాథమిక ఆరోగ్య కేంద్రం వైద్యాధికారిని డాక్టర్ మంతెన మౌనిక తెలిపారు. ప్రకృతి సిద్ధమైన పూలతో చేసుకునే పండుగగా పేరున్న బతుకమ్మ వేడుకలను అంగరంగ వైభవంగా నిర్వహించుటకు నిర్ణయించినట్లు పేర్కొన్నారు. ఆసుపత్రిలో పనిచేస్తున్న మహిళ అధికారులు, సిబ్బంది పాల్గొని కార్యక్రమాన్ని విజయవంతం చేయాలని కోరారు.