ఎంపీడీఓ మునయ్యకు వినతిపత్రం అందజేత న్యాయం జరిగే వరకు విధుల్లో చేరే ప్రసక్తిలేదు  నల్గొండ/మర్రిగూడ : ఉన్నతాధికారుల తీవ్రమైన మానసిక ఒత్తిళ్లు, అనుచిత వేధింపులను నిరసిస్తూ నల్గొండ జిల్లా మర్రిగూడ మండల పరిధిలోని పంచాయతీ కార్యదర్శులు ఆందోళన బాటపట్టారు. మండలంలోని మొత్తం 16 మంది కార్యదర్శులు ఒక్కసారిగా ముకుమ్మడిగా సెలవులో వెళ్లాలని సంచలన నిర్ణయం తీసుకున్నారు. ఈ మేరకు మంగళవారం మధ్యాహ్నం మండల పరిషత్ కార్యాలయంలో ఎంపీడీఓ జి.సి.మునయ్యను కలసి తమ ముకుమ్మడి సెలవు అభ్యర్థన వినతిపత్రాన్ని అందజేశారు. నిత్యం మానసిక నరకం... భరించలేకే ఈ నిర్ణయం మండల పంచాయతీ కార్యదర్శుల సంఘం అధ్యక్షుడు వంశీ మాట్లాడుతూ కార్యదర్శుల ఆవేదనను వెళ్లగక్కారు. నిత్యం విధి నిర్వహణలో క్షేత్రస్థాయి సమస్యలతో పాటు ఉన్నతాధికారుల నుంచి ఎదురవుతున్న తీవ్ర మానసిక ఒత్తిళ్లు, వేధింపులతో సతమతమవుతున్నామని ఆందోళన వ్యక్తం చేశారు. సమయంతో నిమిత్తం లేకుండా అప్పగించే అదనపు బాధ్యతలు, సాధ్యాసాధ్యాలను పరిగణనలోకి తీసుకోకుండా లక్ష్యాలను నిర్దేశించడం, పై అధికారుల వేధింపులతో మానసిక ప్రశాంతత కరువైందని వాపోయారు. రోజురోజుకూ ఈ ఒత్తిడి భరించరాని స్థాయికి చేరడంతోనే వేరే దారి లేక ఈ తీవ్ర నిర్ణయం తీసుకోవాల్సి వచ్చిందని స్పష్టం చేశారు. క్షేత్రస్థాయిలో స్తంభించిన పాలన. ఒకేసారి మండలంలోని 16 గ్రామాల పంచాయతీ కార్యదర్శులు విధులను బహిష్కరించి ముకుమ్మడి సెలవు పెట్టడంతో గ్రామాల్లో పంచాయతీ పాలన తీవ్రంగా ప్రభావితమయ్యే అవకాశం కనిపిస్తోంది. పారిశుద్ధ్యం, తాగునీటి సరఫరా, జనన-మరణ ధ్రువీకరణ పత్రాలు, పన్నుల వసూలు వంటి నిత్యావసర సేవలకు అంతరాయం కలిగే ప్రమాదం ఉంది. సమస్యలు తీరే వరకు వెనక్కి తగ్గేదే లేదు! తాము ఎదుర్కొంటున్న వేధింపులపై సమగ్ర విచారణ జరిపి నివేదిక సేకరించాలని, తమ సమస్యలకు శాశ్వత పరిష్కారం చూపి తగిన న్యాయం చేయాలని పంచాయతీ కార్యదర్శులు డిమాండ్ చేశారు. సమస్యలు పరిష్కారమయ్యేంత వరకు తిరిగి విధుల్లోకి చేరే ప్రసక్తే లేదని తేల్చి చెప్పారు. ఈ నిరసన కార్యక్రమంలో మండల పరిధిలోని 16 గ్రామాల పంచాయతీ కార్యదర్శులు అందరూ పాల్గొని సంఘీభావం తెలిపారు.కాగా, మండల కార్యదర్శుల ముకుమ్మడి సెలవు నిర్ణయంపై ఉన్నతాధికారులు ఎలా స్పందిస్తారో, గ్రామాల్లో ప్రత్యమ్నాయ ఏర్పాట్లు ఏం చేస్తారో వేచి చూడాల్సి ఉంది.

 నాగార్జునసాగర్ నియోజకవర్గ ప్రతినిధి : అఖిలభారత 36 వ రైతు మహాసభలు నల్లగొండ జిల్లా కేంద్రంలో నవంబర్ 15 నుంచి 18 వరకు జరుగుతున్న సందర్భంగా వెంగన్న గూడెం,పార్వతిపురం,రాజన్న గూడెం,మర్లగడ్డ క్యాంపు,వడ్డెర గూడెం,వల్లభవపురం,ఇండ్ల కోటయ్య గూడెం గ్రామాలలో కరపత్రాలు పంపిణీ చేస్తూ ప్రచారం నిర్వహించారు.ఈసందర్భంగా సిపిఐ(ఎం) జిల్లా కమిటీ సభ్యులు కొండేటి శ్రీను మాట్లాడుతూ నాటి బ్రిటిష్ సామ్రాజ్యవాదం, వలస వాదానికి వ్యతిరేకంగా జరిగిన పోరాటంలో 1936లు అఖిల భారత కిసాన్ సభ (AIKS) ఆవిర్భవించి నేటికి 90 సంవత్సరాల అవుతున్నది,ప్రపంచ గుర్తింపు పొందిన వీర తెలంగాణ సాయుధ రైతంగ పోరాటాల పురిటి గడ్డ నల్లగొండలో మొట్టమొదటిసారిగా అఖిల భారత కిసాన్ సభ 36వ జాతీయ మహాసభలు నవంబర్ 15 నుండి 18వ తేదీ వరకు జరుగుతున్నాయని,15వ తేదీన ఎన్జీ కళాశాల మైదానంలో లక్షలాది మంది రైతులతో భారీ ప్రదర్శన,బహిరంగ సభ నిర్వహిస్తున్నామని, ఈ మహాసభలకు దేశ నలుమూలల నుండి 1500 మంది రైతు ఉద్యమ నేతలు ప్రతినిధులుగా వస్తున్నారని ఈ మహాసభలలో రైతంగం ఎదుర్కొంటున్న సమస్యలపై సమగ్రంగా చర్చించి,భవిష్యత్ ఉద్యమ కార్యాచరణ రూపొందించుకుంటారని తెలిపారు,గ్రామీణ ప్రాంతాలలో నిరుపేదలకు రేషన్ షాపుల్లో 18 రకాల నిత్యవసర సరుకులు సరఫరా చేయాలని ఈ సందర్భంగా ఆయన అన్నారు కరువులో ఇప్పుడు ఇస్తున్న బియ్యంతో పాటు చెక్కర ఛాయా పత్తా నూనె 18 రకాల నిత్యవసర సరుకులని పేదవాళ్లకు పంపిణీ చేయాలని ఈ సందర్భంగా ఆయన ప్రభుత్వాన్ని డిమాండ్ చేశారు.కేంద్ర రాష్ట్ర ప్రభుత్వాలు ప్రజలకు ఇచ్చిన హామీలను అమలు చేయాలని రైతు భరోసా రైతు బీమా రైతులకు రుణమాఫీ చేయాలనీ,గ్రామాలలో ఉన్న స్థానిక సమస్యలు నీరు పరిశుద్ధం  శానిటేషన్ విద్య వైద్యం ప్రజా పాలనలో పూర్తి చేస్తామని చెప్తున్న ప్రభుత్వం వేగవంతం చేసి ఈ సమస్యలు కూడా పరిష్కరించాలని ఈ సందర్భంగా ఆయన కోరారు గ్రామీణ ప్రాంతాల్లో సమస్యలు పరిష్కరించకపోతే ప్రజా ఉద్యమాలు ఉధృతం చేస్తామని  ఉపాధి హామీ పనులను మండలంలో అన్ని గ్రామాలలో వెంటనే ప్రారంభించాలని కోరారు.నవంబర్ 15వ తేదీన ఎన్జీ కాలేజీ మైదానంలో నిర్వహించే బహిరంగ సభకు రైతులు కార్మికులు యువకులు మహిళలు ఉద్యోగులు పెద్ద సంఖ్యలో పాల్గొని జయప్రదం చేయాలని ఈ సందర్భంగా ఆయన తెలిపారు.ఈకార్యక్రమంలో సిపిఎం మండల కమిటీ సభ్యులు కుంచెం శేఖర్ వరలక్ష్మి, ధనమ్మ, శ్రీను, శ్రీధర్  ప్రసన్న తదితరులు పాల్గొన్నారు.

నల్గొండ/మర్రిగూడ : మునుగోడు, దేవరకొండ నియోజకవర్గాల పరిధిలోని ఫ్లోరైడ్ రహిత సాగు,తాగునీటి అవసరాలను తీర్చేందుకు నిర్మిస్తున్న డిండి ఎత్తిపోతల పథకంలో భాగమైన శివన్నగూడెం రిజర్వాయర్ పనులను ప్రభుత్వం తక్షణమే పూర్తి చేయాలని బీజేపీ నల్గొండ జిల్లా అధ్యక్షుడు డాక్టర్ నాగం వర్షిత్‌రెడ్డి డిమాండ్ చేశారు. బుధవారం మునుగోడు నియోజకవర్గానికి చెందిన ఏడు మండలాల పార్టీ అధ్యక్షులు,స్థానిక ప్రజాప్రతినిధులు, కార్యకర్తలతో కలిసి ఆయన శివన్నగూడెం ప్రాజెక్టును సందర్శించి, క్షేత్రస్థాయిలో పనుల పురోగతిని పరిశీలించారు.ఈ సందర్భంగా వర్షిత్‌రెడ్డి మాట్లాడుతూ సంస్థాన్ నారాయణపురం, చౌటుప్పల్ మండలాల రైతాంగానికి సాగునీరు అందించడానికి రాచకొండ గుట్టల్లో నూతనంగా రిజర్వాయర్ నిర్మించాల్సిన అవసరం ఉందన్నారు. శివన్నగూడెం ప్రాజెక్టు నుంచి లిఫ్ట్ ద్వారా ప్రతిపాదిత రాచకొండ రిజర్వాయర్‌కు నీటిని తరలించి, అక్కడ నుంచి గొలుసుకట్టు చెరువులను నింపేలా ప్రభుత్వం సమగ్ర ప్రణాళిక రూపొందించాలని కోరారు. తద్వారా ఈ ప్రాంతంలో భూగర్భ జలాలు పెరిగి, వేల ఎకరాల వ్యవసాయ భూములకు నీరు అందుతుందని పేర్కొన్నారు.మరోవైపు డిండి ప్రాజెక్టుపై మహబూబ్‌నగర్ జిల్లాకు చెందిన మంత్రులు, స్థానిక ఎమ్మెల్యే కోమటిరెడ్డి రాజగోపాల్‌రెడ్డి పరస్పర విరుద్ధంగా మాట్లాడుతుండటం కాంగ్రెస్ పార్టీ ద్వంద్వ విధానాలకు నిదర్శనమని మండిపడ్డారు.రైతులకు కావాల్సింది ప్రకటనలు, రాజకీయ విమర్శలు కాదని.. ప్రాజెక్టులు పూర్తయి పొలాలకు నీళ్లు రావడమేనని స్పష్టం చేశారు. స్థానిక ఎమ్మెల్యే, జిల్లా మంత్రులు వెంటనే స్పందించి నిర్దిష్ట కాలమితిలో పనులు పూర్తి చేయాలని.. నారాయణపురం, చౌటుప్పల్ రైతులకు న్యాయం జరిగే వరకు బీజేపీ పోరాటం ఆపేది లేదని తెలిపారు.ఈ కార్యక్రమంలో బీజేపీ రాష్ట్ర,జిల్లా స్థాయి నాయకులు,మండల అధ్యక్షులు,ప్రజాప్రతినిధులు తదితరులు పాల్గొన్నారు.

నల్లగొండ : హైదరాబాద్ నగరంలోని నాగోల్ పట్టణంలో నూతనంగా నిర్మించిన ఆనంతుల రాంరెడ్డి కన్వెన్షన్ సెంటర్ ను ఈరోజు తెలంగాణ శాసన మండలి చైర్మన్ గుత్తా సుఖేందర్ రెడ్డి ఘనంగా ప్రారంభించారు.ఈ కార్యక్రమానికి ముఖ్య అతిథిగా హాజరైన గుత్తా సుఖేందర్ రెడ్డి రిబ్బన్ కట్ చేసి కన్వెన్షన్ సెంటర్ ను ప్రారంభించారు.అనంతరం కన్వెన్షన్ సెంటర్ ప్రాంగణాన్ని పరిశీలించి,నిర్వాహకులను అభినందించారు.నగరంలో వేడుకలకు,సమావేశాలకు ఇలాంటి ఆధునిక సౌకర్యాలతో కూడిన కన్వెన్షన్ సెంటర్లు ఎంతో అవసరమని, ఆనంతుల రాంరెడ్డి పేరిట ఈ కన్వెన్షన్ ఏర్పాటు చేయడం అభినందనీయమని ఈ సందర్భంగా గుత్తా పేర్కొన్నారు.ఈ ప్రారంభోత్సవ కార్యక్రమంలో స్థానిక ప్రజాప్రతినిధులు,కుటుంబ సభ్యులు,మిత్రులు, శ్రేయోభిలాషులు పెద్ద సంఖ్యలో పాల్గొన్నారు.

త్రిపురారం(హాలియా) : నాగార్జునసాగర్ చరిత్రలో 17 పర్యాయాలు పంటలకు సాగు నీటిని ఇచ్చి రైతులకు అండగా నిలిచి ఆదుకున్న ఘనత మాజీ ముఖ్యమంత్రి కేసీఆర్ కే దక్కుతుందని మాజీ మంత్రి గుంటకండ్ల జగధీశ్వర్ రెడ్డి అన్నారు. నాగార్జునసాగర్ నియోజకవర్గంలో పట్టభద్రుల ఎమ్మెల్సీ ఎన్నికల నేపథ్యంలో నాగార్జునసాగర్ మాజీ ఎమ్మెల్యే నోముల భగత్ అధ్యక్షతన జరిగిన ఎమ్మెల్సీ ఓటరు నమోదు అవగాహాన కార్యక్రమానికి మంగళవారం మాజీ మంత్రి గుంటకండ్ల జగధీశ్వర్ రెడ్డి ముఖ్య అతిథిగా హజరై మాట్లాడారు. నాగార్జునసాగర్ నియోజకవర్గంలో ఇప్పటి వరకు పట్టభద్రుల ఎమ్మెల్సీ ఓట్లు 9 వేల పై చిలుకు నమోదు అయ్యాయన్నారు. ఇంకా 6 వేల ఓట్లు నమోదు కావాల్సి ఉన్నదన్నారు. ఎమ్మెల్సీ ఎన్నికల్లో పట్టభద్రులందరూ కాంగ్రెస్ కి బుద్ధి చెప్పాలని బీఆర్ఎస్ పార్టీ బలపరిచిన అభ్యర్ధిని భారీ మెజార్టీతో గెలిపించాలని అన్నారు. కాంగ్రెస్ ప్రభుత్వంలో కొత్త పథకాలు ఏమో కానీ కనీసం కేసీఆర్ అమలు జరిపిన పథకాలు కూడా కొనసాగించే నిస్సాహాయ స్ధితిలో ప్రభుత్వం ఉందన్నారు. కాంగ్రెస్ అధికారంలోకి రాకముందు పాత రోజులు గుర్తు చేస్తామని చెప్పి అన్నట్టుగా మళ్లీ విద్యుత్ కోతలు, సాగునీటి కొరతతో నిజంగానే పాత రోజులను గుర్తు చేస్తుందన్నారు. నందికొండకు పక్కనే నాగార్జునసాగర్ ప్రాజెక్టు ఉన్నప్పటికీ కాంగ్రెస్ ప్రభుత్వం నందికొండ వాసులకు కనీసం తాగునీటిని కూడా సరఫరా చేయలేకపోవడం ఎంతో సిగ్గు చేటు అన్నారు. నందికొండకు తాగునీటిని సరఫరా చేసి సాగర్ ని మున్సిపాలిటీగా చేసిన ఘనత కూడా కేసీఆర్ కే దక్కుతుందన్నారు. కాంగ్రెస్ ప్రభుత్వంలో నాగార్జునసాగర్ నీళ్ల కొరకు ప్రజలు మళ్లీ కన్నీళ్లు పెట్టుకునే పరిస్థితి దాపరించిందని ఎద్దేవా చేశారు. ముఖ్యంగా పోలీసులను అడ్డుపెట్టుకొని కాంగ్రెస్ ప్రభుత్వం పాలన కొనసాగిస్తుందని కేవలం 2 సంవత్సరాల వ్యవధి మాత్రమే ఉందని మళ్లీ రాబోయేది బీఆర్ఎస్ ప్రభుత్వమేనని గంటాపథంగా అన్నారు. ఈ కార్యక్రమంలో నాగార్జునసాగర్ మాజీ ఎమ్మెల్యే నోముల భగత్, ఎమ్మెల్సీ ఎంసీ కోటిరెడ్డి, మాజీ ఎంపీ బడుగుల లింగయ్య యాదవ్, మాజీ ఎమ్మెల్యే బూడిద భిక్షమయ్య గౌడ్, మాజీ ట్రైకార్ చైర్మెన్ ఇస్లావత్ రాంచందర్ నాయక్, ఏనుగుల రాకేష్ రెడ్డి, రాష్ట్ర నాయకులు కడారి అంజయ్యయాదవ్, రిక్కల ఇంద్రసేనారెడ్డి, బాబూరావునాయక్ తదితరులు పాల్గొన్నారు.

నల్గొండ: నల్గొండ పట్టణానికి చెందిన ప్రముఖ వ్యాపారవేత్త, పుల్లారెడ్డి స్వీట్ హౌస్ అధినేత బండ శ్రీనివాస్ రెడ్డి అకాల మరణం చెందిన విషయం తెలుసుకున్న తెలంగాణ రాష్ట్ర శాసన మండలి చైర్మన్ గుత్తా సుఖేందర్ రెడ్డినివాళులర్పించారు.మంగళవారం ఉదయం బండ శ్రీనివాస్ రెడ్డి నివాసానికి చేరుకున్న గుత్తా సుఖేందర్ రెడ్డి ఆయన పార్థివ దేహానికి పూలమాల వేసి ఘనంగా నివాళులర్పించారు.అనంతరం కుటుంబ సభ్యులను పరామర్శించి,తన ప్రగాఢ సానుభూతిని తెలియజేశారు. శ్రీనివాస్ రెడ్డి మృతి పట్ల తీవ్ర దిగ్భ్రాంతి వ్యక్తం చేసిన ఆయన,వారి కుటుంబానికి తన అండదండలు ఉంటాయని భరోసా ఇచ్చారు.నల్గొండ పట్టణంలో పుల్లారెడ్డి స్వీట్ హౌస్ ద్వారా ఎంతో మందికి ఉపాధి కల్పిస్తూ, నాణ్యమైన స్వీట్స్ అందిస్తూ మంచి పేరు తెచ్చుకున్న వ్యక్తి బండ శ్రీనివాస్ రెడ్డి అని, ఆయన మరణం నల్గొండ వ్యాపార వర్గానికి తీరని లోటని ఈ సందర్భంగా గుత్తా పేర్కొన్నారు.ఈ కార్యక్రమంలో మాజీ మున్సిపల్ చైర్మన్ బుర్రి శ్రీనివాస్ రెడ్డి,బీరవెల్లి గోపాల్ రెడ్డి,పాదూరి ఇంద్ర సేన రెడ్డి, యామ దయాకర్ తదితరులు పాల్గొన్నారు.

నల్లగొండ: నల్లగొండ జిల్లా పోలీస్ కార్యాలయంలో అక్టోబర్ 21 పోలీస్ అమరవీరుల సంస్మరణ దినోత్సవాన్ని ఘనంగా నిర్వహించారు.దేశ రక్షణ కోసం,ప్రజల ప్రాణాలు, ఆస్తుల రక్షణ కోసం విధి నిర్వహణలో ప్రాణత్యాగం చేసిన పోలీస్ అమరవీరులకు జిల్లా కలెక్టర్ చంద్ర శేఖర్,జిల్లా ఎస్పీ శరత్ చంద్ర పవార్, అమరవీరుల కుటుంబ సభ్యులు,అధికారులు ఘనంగా నివాళులర్పించారు.ఉదయం జిల్లా పోలీస్ పరేడ్ గ్రౌండ్ లో నిర్వహించిన ఈ కార్యక్రమంలో ముందుగా అమరవీరుల స్థూపం వద్ద పుష్పగుచ్ఛం ఉంచి,రెండు నిమిషాలు మౌనం పాటించి శ్రద్ధాంజలి ఘటించారు. అనంతరం పోలీస్ బ్యాండ్ గౌరవ వందనం సమర్పించింది.ఈ సందర్భంగా జిల్లా కలెక్టర్ చంద్ర శేఖర్ మాట్లాడుతూ ప్రజలు ప్రశాంతంగా జీవించేందుకు పోలీస్ శాఖ అందిస్తున్న సేవలు ఎంతో కీలకమని అన్నారు.శాంతిభద్రతల పరిరక్షణలో పోలీసులు అనేక సవాళ్లను ఎదుర్కొంటూ నిరంతరం విధులు నిర్వహిస్తున్నారని తెలిపారు."విధి నిర్వహణలో ప్రాణాలను త్యాగం చేసిన పోలీస్ అమరవీరుల ధైర్యం, కర్తవ్యనిష్ఠ,అంకితభావం ప్రతి ఒక్కరికీ ఆదర్శం.నేరాల నియంత్రణ,మహిళలు, బాలల భద్రత,రోడ్డు ప్రమాదాల నివారణ,సైబర్ నేరాలపై అవగాహన,మాదకద్రవ్యాల నిర్మూలనకు పోలీసులు చేస్తున్న కృషి అభినందనీయం. అమరవీరుల త్యాగాలను స్ఫూర్తిగా తీసుకుని యువత దేశభక్తి,క్రమశిక్షణ, సేవాభావాన్ని అలవర్చుకోవాలి"అని కలెక్టర్ పిలుపునిచ్చారు.జిల్లా ఎస్పీ శరత్ చంద్ర పవార్ మాట్లాడుతూ పోలీస్ విధి కేవలం ఉద్యోగం మాత్రమే కాదని,ప్రజల పట్ల బాధ్యత, దేశం పట్ల నిబద్ధతతో కూడిన పవిత్రమైన కర్తవ్యమని అన్నారు."1959 అక్టోబర్ 21న లడఖ్‌లోని హాట్ స్ప్రింగ్స్ ప్రాంతంలో చైనా సైనికుల దాడిలో ప్రాణాలు కోల్పోయిన పది మంది సీఆర్‌పీఎఫ్ సిబ్బంది వీరమరణానికి గుర్తుగా ప్రతి సంవత్సరం పోలీస్ అమరవీరుల సంస్మరణ దినోత్సవాన్ని నిర్వహిస్తున్నాము.నల్లగొండ జిల్లాలో విధి నిర్వహణలో ఇప్పటివరకు 15 మంది పోలీస్ అధికారులు,సిబ్బంది అమరులయ్యారు.దేశవ్యాప్తంగా ఈ ఏడాది 154 మంది పోలీస్ అధికారులు,సిబ్బంది విధి నిర్వహణలో ప్రాణత్యాగం చేశారు.వారి త్యాగాలు ఎప్పటికీ మరచిపోలేనివి"అని ఎస్పీ తెలిపారు.అమరవీరుల కుటుంబాలను ప్రభుత్వం అన్ని విధాలుగా ఆదుకుంటుందని,వారి సంక్షేమానికి చర్యలు తీసుకుంటామని హామీ ఇచ్చారు.ఈ కార్యక్రమంలో అడిషనల్ ఎస్పీ రమేష్,డీఎస్పీ కె.శివరాం రెడ్డి,ఏఆర్ డీఎస్పీ శ్రీనివాస్,సీఐలు,ఆర్‌ఐలు, ఎస్‌ఐలు, పోలీస్ అధికారులు, సిబ్బంది,పోలీస్ అమరవీరుల కుటుంబ సభ్యులు పాల్గొన్నారు.

హుస్నాబాద్ ÷తరతరాల చరిత్ర కలిగిన సిద్దిపేట జిల్లా కోహెడ మండల కేంద్రంలో పూర్వీకుల కాలం నుంచి ప్రతి ఆదివారం వారసంత నిర్వహించడం ఆనవాయితీగా వస్తోందని, అలాంటి చోట శనివారం రోజున కూడా వారసంత పేరుతో పూల దుకాణాల వద్ద తైబజార్ డబ్బులు వసూలు చేయడం ఏమిటని బీజేపీ సిద్దిపేట జిల్లా ప్రధాన కార్యదర్శి ఖమ్మం వేంకటేశం ప్రశ్నించారు. ఈ సందర్బంగా మాట్లాడుతూ వారసంత నిర్వహించని రోజున వ్యాపారుల నుంచి తైబజార్ రుసుములు వసూలు చేయడానికి ఎవరు ఆదేశాలు ఇచ్చారు? కాంట్రాక్టర్‌కు ఏ నిబంధనల ప్రకారం ఈ అధికారం కల్పించారు? ఈ వ్యవహారంపై గ్రామ పంచాయతీ అధికారులు స్పష్టమైన సమాధానం చెప్పాలని ఆయన డిమాండ్ చేశారు.గ్రామ పంచాయతీ నిబంధనలకు, కాంట్రాక్టు ఒప్పందంలోని షరతులకు విరుద్ధంగా వసూళ్లు జరిగాయి అనుమతి లేని రోజున వసూళ్లు చేసారు కాబట్టి సదరు కాంట్రాక్టుపై చర్యలు తీసుకోవడంతో పాటు, కాంట్రాక్టును రద్దు చేయాలని డిమాండ్ చేశారు. వసూళ్ల వెనుక ఎవరి ప్రమేయం ఉంది?వారసంత లేని రోజున కూడా తైబజార్ వసూళ్లు చేయడానికి బాధ్యులెవరు? ఈ వసూళ్లకు ఎవరు సహకరించారు? వసూలైన డబ్బులు ఎవరికి చేరుతున్నాయి? ఈ వ్యవహారంలో ఎవరి పాత్ర ఎంత ఉందనే అంశాలపై పూర్తి స్థాయి విచారణ జరిపి వాస్తవాలను ప్రజల ముందుంచాలని ఖమ్మం వేంకటేశం డిమాండ్ చేశారు.ఈ అంశంపై బీజేపీ ఆధ్వర్యంలో  జిల్లా కలెక్టర్‌కు ఫిర్యాదు చేసి, సమగ్ర విచారణ జరిపించి బాధ్యులపై చర్యలు తీసుకునేలా పోరాటం చేస్తామని స్పష్టం చేశారు. రైతులు, చిరు వ్యాపారుల కష్టార్జితాన్ని ఇష్టానుసారంగా వసూలు చేసేందుకు ఎవరికి అధికారం లేదన్నారు.వసూలు చేసిన డబ్బులు తిరిగి చెల్లించాలన్నారు.శనివారం రోజున వసూలు చేసిన తైబజార్ రుసుములు నిబంధనలకు విరుద్ధంగా వసూలు చేశారు ఆ మొత్తాన్ని సంబంధిత కాంట్రాక్టర్ తిరిగి గ్రామ పంచాయతీకి చెల్లించేలా అధికారులు చర్యలు తీసుకోవాలని ఖమ్మం వేంకటేశం డిమాండ్ చేశారు.అదేవిధంగా, ఆదివారం మినహా ఇతర రోజుల్లో తైబజార్ రుసుముల వసూలుకు సంబంధించి స్పష్టమైన అనుమతులు, నిబంధనలు ఏమిటో గ్రామ పంచాయతీ అధికారులు వెల్లడించాలని కోరారు. అధికారిక అనుమతి, వర్తించే నిబంధనల ఆధారంగానే వసూళ్లు జరగాలని, రైతులు మరియు చిరు వ్యాపారులపై అనవసరమైన ఆర్థిక భారం పడకుండా చూడాలని సూచించారు.ఇష్టానుసారంగా ప్రభుత్వ నిబంధనలకు విరుద్ధంగా వ్యవహరిస్తే బీజేపీ చూస్తూ ఊరుకోదని హెచ్చరించారు.కోహెడలో జరుగుతున్న ఈ వసూళ్ల వ్యవహారంపై అధికారులు నిర్లక్ష్యం వహిస్తే బీజేపీ ప్రజల పక్షాన ఉద్యమిస్తుందని ఖమ్మం వేంకటేశం హెచ్చరించారు. తైబజార్ కాంట్రాక్టు నిబంధనలు, వసూళ్లకు సంబంధించిన రికార్డులు, అనుమతులను పరిశీలించి నిజానిజాలను బయటపెట్టాలని డిమాండ్ చేశారు.రైతులు, పూల వ్యాపారులు, చిరు వ్యాపారుల ప్రయోజనాలను కాపాడటమే తమ ప్రధాన లక్ష్యమని, ఈ వ్యవహారంలో బాధ్యులెవరో తేల్చి తగిన చర్యలు తీసుకునే వరకు బీజేపీ పోరాటం కొనసాగిస్తుందని ఆయన స్పష్టం చేశారు.

మర్రిగూడ, :తెలంగాణ సాయుధ పోరాట వీరనారి,ప్రజల ఆత్మగౌరవ ప్రతీక చాకలి ఐలమ్మ విగ్రహాన్ని మెదక్ జిల్లా కేంద్రంలో దుండగులు ధ్వంసం చేయడం అత్యంత హేయమైన చర్య అని రజక సంఘం రాష్ట్ర నాయకులు వెంకటంపేట బాలయ్య తీవ్ర ఆగ్రహం వ్యక్తం చేశారు.నల్గొండ జిల్లా మర్రిగూడ మండల కేంద్రంలో బుధవారం ఏర్పాటు చేసిన విలేకరుల సమావేశంలో ఆయన మాట్లాడారు.ఈ సందర్భంగా బాలయ్య మాట్లాడుతూ భూమి కోసం, భుక్తి కోసం, వెట్టిచాకిరీ విముక్తి కోసం పోరాడి భావితరాలకు స్ఫూర్తిగా నిలిచిన వీరనారి ఐలమ్మ విగ్రహాన్ని ధ్వంసం చేయడం మొత్తం తెలంగాణ ప్రజల మనోభావాలను దెబ్బతీయడమేనని అన్నారు. ఒకవైపు ముఖ్యమంత్రి రేవంత్ రెడ్డి చిట్యాల ఐలమ్మ లాంటి త్యాగధనుల పోరాట పటిమను స్ఫూర్తిగా తీసుకుని సుపరిపాలన అందిస్తున్నామని చెబుతుంటే, మరోవైపు సమాజంలో అకతాయిలు, అసాంఘిక శక్తులు పెట్రేగిపోవడం ఆందోళన కలిగిస్తోందన్నారు. ఇటీవల గాంధీ జయంతి రోజున సుభలేడులో మహాత్మా గాంధీ విగ్రహాన్ని ధ్వంసం చేసిన సంఘటన మరవకముందే, ఇప్పుడు మెదక్‌లో ఐలమ్మ విగ్రహాన్ని ధ్వంసం చేయడం తీవ్ర విచారకరమని ఆవేదన వ్యక్తం చేశారు. తెలంగాణ అస్తిత్వానికి, త్యాగాలకు ప్రతీకలుగా నిలిచే మహానీయుల విగ్రహాలపై దాడులు చేసే సంస్కృతిని ప్రభుత్వం తీవ్రంగా పరిగణించాలని కోరారు. పోలీసులు వెంటనే రంగంలోకి దిగి సిసిటీవీ దృశ్యాలు, ఇతర ఆధారాల ద్వారా బాధ్యులను గుర్తించి చట్టపరంగా కఠినంగా శిక్షించాలని డిమాండ్ చేశారు.రాష్ట్రవ్యాప్తంగా మహనీయుల విగ్రహాలకు తగిన భద్రత కల్పించాలని, భవిష్యత్తులో ఇలాంటి అపచార సంఘటనలు పునరావృతం కాకుండా ముందస్తు చర్యలు చేపట్టాలని కోరారు. ఐలమ్మ పోరాట స్ఫూర్తిని, త్యాగాలను అవమానించే చర్యలను రజక సమాజం ఎట్టిపరిస్థితుల్లోనూ సహించేది లేదని ఆయన స్పష్టం చేశారు.

మర్రిగూడ/నల్గొండ:పుస్తకాల పరిజ్ఞానానికే పరిమితం కాకుండా,భావి భారత వైద్య రంగానికి విద్యార్థులను సన్నద్ధం చేసే దిశగా మర్రిగూడలో కీలక అడుగు పడింది. స్థానిక పీఎం శ్రీ తెలంగాణ మోడల్ స్కూల్ కు చెందిన హెల్త్‌కేర్ విభాగ విద్యార్థులు మర్రిగూడ సామాజిక ఆరోగ్య కేంద్రం వేదికగా తమ క్షేత్రస్థాయి శిక్షణ కార్యక్రమాన్ని విజయవంతంగా పూర్తి చేశారు.వృత్తి విద్యా కోర్సుల్లో భాగంగా చేపట్టిన ఈ శిక్షణ ద్వారా విద్యార్థులు ఆచరణాత్మక వైద్య సేవలపై అమూల్యమైన అనుభవాన్ని గడించారు. ఆచరణాత్మక వైద్యంపై అవగాహన.. విద్యార్థులు ఆసుపత్రిలోని వివిధ విభాగాలను సందర్శించి, దైనందిన వైద్య సేవల నిర్వహణను పరిశీలించారు. రోగులకు అందించే ప్రాథమిక చికిత్సల తీరుతెన్నులు, బి.పి,షుగర్ పరీక్షలు చేయడం,ఈసీజీ తీయడం, ల్యాబ్ పరీక్షల నిర్వహణ అలాగే అత్యవసర వైద్య సేవలలో వైద్య సిబ్బంది వ్యవహరించే తీరును విద్యార్థులు ప్రత్యక్షంగా తిలకించి నిపుణుల ద్వారా తెలుసుకున్నారు. ఉత్సాహంగా పాల్గొన్న విద్యార్థులు,సిబ్బంది సివిల్ సర్జన్ అసిస్టెంట్ డాక్టర్ శంకర్, పాఠశాల ప్రిన్సిపాల్ వెంకటేశం, హెల్త్‌కేర్ ట్రైనర్ లక్ష్మి ప్రత్యేక చొరవ చూపారు. సీహెచ్‌సీ వైద్యులు, వైద్య సిబ్బంది విద్యార్థులకు నిరంతరం మార్గదర్శకత్వం వహిస్తూ వైద్య రంగానికి సంబంధించిన మెలకువలను వివరించారు. ఈ కార్యక్రమంలో పాఠశాల హెల్త్‌కేర్ విభాగ విద్యార్థులు ఉత్సాహంగా పాల్గొన్నారు.విద్యార్థి దశలోనే వైద్య రంగానికి సంబంధించిన ప్రాథమిక అంశాలపై పట్టు సాధించేందుకు ఇలాంటి ఇంటర్న్‌షిప్‌లు ఎంతగానో దోహదపడతాయని, భవిష్యత్తులో నైపుణ్యం కలిగిన వైద్య సిబ్బందిగా ఎదిగేందుకు ఈ శిక్షణ పునాది అవుతుందని ఉపాధ్యాయులు, వైద్యులు అభిప్రాయపడ్డారు.

త్రిపురారం (నిడమనూరు): తాగునీటి అవసరాల కోసం నాగార్జునసాగర్ ఎడమకాల్వకు ఈ నెల 12 తేదీన తాగునీటిని విడుదల చేశారు. దీంతో నిడమనూరు మండల పరిథిలో నాగార్జునసాగర్ ప్రధాన ఎడమకాల్వ మేజర్ తూముకి గండి పడింది. దీంతో వెంటనే సాగర్ నుండి వచ్చే నీటిని నిలిపివేసినట్లు అధికారులు తెలిపారు. నరసింహులుగూడెం మేజర్ తూముకి నిడమనూరు మండలంలో తాగునీటి అవసరాల కోసం నీటిని విడుదల చేసిన నేపథ్యంలో గండి పడినట్లు అధికారులు తెలిపారు. ప్రవాహానికి నిడమనూరు చెరువు పూర్తి స్థాయిలో నిండి పోయింది. ప్రవాహాం తగ్గేంత వరకు తూము లోపల మరమ్మత్తులు చేపట్టలేమని అధికారులు తెలిపారు.

మర్రిగూడ/నల్గొండ :పేదల సొంతింటి కలను సాకారం చేయాల్సిన ఇందిరమ్మ ఇళ్ల పథకం గ్రామస్థాయిలో కొత్త చర్చకు తెరలేపింది. లబ్ధిదారుల ఎంపిక జాబితాల తయారీ, రెండో జాబితాపై జరుగుతున్న ప్రచారం, హౌసింగ్‌ శాఖ అధికారుల నుంచి సరైన సమాచారం అందకపోవడం..  గ్రామ ప్రథమ పౌరులుగా ఎన్నికైన సర్పంచులు తమ పాత్రపై స్పష్టత కోరుతున్నారు. ఇందిరమ్మ ఇళ్ల పథకంలో సర్పంచుల బాధ్యతలు ఏమిటి? లబ్ధిదారుల ఎంపికలో వారి భాగస్వామ్యం ఎంత? అధికారుల నుంచి సమాచారం ఎందుకు అందడం లేదు? అనే ప్రశ్నలతో మర్రిగూడ మండలంలోని ఐదు గ్రామాల సర్పంచులు నల్లగొండ జిల్లా కలెక్టర్‌ కార్యాలయంలో నిర్వహించిన ప్రజావాణిలో ఫిర్యాదు చేశారు. ఐదు గ్రామాల నుంచి ఒకటే డిమాండ్‌! మర్రిగూడ మండలంలోని ఎర్రగండ్లపల్లి, కొండూరు, తమ్మడపల్లి, అజిలాపురం, కేబిపల్లి గ్రామాల సర్పంచులు ఇందిరమ్మ ఇళ్ల పథకం అమలుపై స్పష్టత కోరుతూ వినతిపత్రం సమర్పించారు. లబ్ధిదారుల ఎంపిక జాబితాల తయారీ, రెండో జాబితాపై జరుగుతున్న ప్రచారానికి సంబంధించిన వాస్తవాలను వెల్లడించాలని కోరారు. గ్రామస్థాయిలో ప్రజలకు సమాధానం చెప్పాల్సిన బాధ్యత తమపై ఉన్నప్పటికీ, హౌసింగ్‌ శాఖ అధికారుల నుంచి సమాచారం అందకపోవడం ఇబ్బందికరంగా మారుతోందని పేర్కొన్నారు. ఎన్నికైన సర్పంచులకు బాధ్యత లేదా? గ్రామ ప్రజలు ఓటుతో ఎన్నుకున్న సర్పంచులకు పేదల ఇళ్ల పథకం అమలులో ఎలాంటి బాధ్యతలు ఉంటాయన్నది ఇప్పుడు ప్రధాన ప్రశ్నగా మారింది. లబ్ధిదారుల ఎంపిక, అర్హతల పరిశీలన, జాబితాలపై అభ్యంతరాల స్వీకరణ, నిర్మాణాల పర్యవేక్షణలో గ్రామపంచాయతీ పాత్ర ఏమిటో సంబంధిత అధికారులు స్పష్టం చేయాలని సర్పంచులు కోరుతున్నారు. గ్రామంలో ఎవరు అర్హులు? ఎవరికి ఇల్లు అవసరం? అనే అంశాలపై ప్రజలకు అవగాహన ఉన్నప్పటికీ, అధికారిక సమాచారం అందుబాటులో లేకపోతే ప్రజలకు సమాధానం చెప్పడం ఎలా సాధ్యమని వారు ప్రశ్నిస్తున్నారు. ఇందిరమ్మ కమిటీల్లో సర్పంచుల పాత్ర, బాధ్యతలు, అధికార పరిధిపై స్పష్టమైన మార్గదర్శకాలు ఇవ్వాలని విజ్ఞప్తి చేశారు.రెండో జాబితాపై ప్రచారం.. వాస్తవాలేవి?ఇందిరమ్మ ఇళ్ల రెండో జాబితా విషయంలో గ్రామాల్లో జరుగుతున్న ప్రచారంపై సర్పంచులు స్పష్టత కోరుతున్నారు. జాబితా తయారీ ఏ ప్రాతిపదికన జరుగుతోంది? అర్హుల ఎంపికలో ఏ విధానాన్ని అనుసరిస్తున్నారు? గ్రామస్థాయిలో అభ్యంతరాలు తెలిపేందుకు అవకాశం ఉందా? అనే అంశాలపై అధికారిక సమాచారం వెల్లడించాలని కోరుతున్నారు. ప్రచారంలో ఉన్న సమాచారమే నిజమని నిర్ధారించలేని పరిస్థితుల్లో ప్రజల్లో సందేహాలు పెరిగే అవకాశం ఉందని పేర్కొంటున్నారు. అందువల్ల సంబంధిత అధికారులు వాస్తవాలను వెల్లడించి, ఎంపిక ప్రక్రియపై నెలకొన్న అనుమానాలను నివృత్తి చేయాల్సిన అవసరం ఉందని అభిప్రాయపడుతున్నారు.గ్రామసభకు ప్రాధాన్యం ఇవ్వాలి!ఇందిరమ్మ ఇళ్ల పథకంలో పారదర్శకత పెరగాలంటే గ్రామసభలకు ప్రాధాన్యం ఇవ్వాలని సర్పంచులు కోరుతున్నారు. అర్హుల జాబితాలను ప్రజల ముందుంచడం, అభ్యంతరాలు స్వీకరించడం, ప్రభుత్వ మార్గదర్శకాలకు అనుగుణంగా ఎంపిక ప్రక్రియను నిర్వహించడం ద్వారా అనుమానాలకు తావులేకుండా చేయవచ్చని సూచిస్తున్నారు. పథకం అమలులో అధికారులు, గ్రామపంచాయతీ, ఇందిరమ్మ కమిటీల మధ్య సమన్వయం ఉంటేనే అర్హులైన పేదలకు న్యాయం జరుగుతుందని పేర్కొంటున్నారు. సెకండ్‌ ఫేజ్‌లోనైనా ఎన్నికైన సర్పంచుల పాత్రపై ప్రభుత్వం స్పష్టత ఇవ్వాలని డిమాండ్‌ చేస్తున్నారు. కలెక్టర్‌ జోక్యంపై ఆశలు!ఐదు గ్రామాల సర్పంచులు ప్రజావాణిలో ఫిర్యాదు చేయడంతో ఇందిరమ్మ ఇళ్ల పథకంలో గ్రామస్థాయి ప్రజాప్రతినిధుల పాత్రపై చర్చ మొదలైంది. హౌసింగ్‌ శాఖ అధికారులు లబ్ధిదారుల ఎంపిక ప్రక్రియపై స్పష్టమైన సమాచారం అందిస్తారా? ఇందిరమ్మ కమిటీల్లో సర్పంచుల బాధ్యతలపై మార్గదర్శకాలు జారీ చేస్తారా? రెండో జాబితాపై నెలకొన్న సందేహాలకు సమాధానం లభిస్తుందా? అన్నది వేచి చూడాలి. పేదలకు ఇళ్లు అందించడమే లక్ష్యంగా అమలవుతున్న పథకంలో పారదర్శకత, జవాబుదారీతనం కీలకం. అర్హులైన ప్రతి కుటుంబానికి న్యాయం జరిగేలా ఎంపిక ప్రక్రియపై స్పష్టత ఇవ్వాలని, తమ పాత్రపై నెలకొన్న సందేహాలను నివృత్తి చేయాలని యరగండ్ల పల్లి సర్పంచ్ వల్లంలసంతోష్ యాదవ్, అజిలాపురం సర్పంచ్ రొక్కం భాస్కర్ రెడ్డి, తమ్మడపల్లి సర్పంచ్ కమ్మచిచ్చు వెంకటేష్,సరంపేట  సర్పంచ్ రాములమ్మ,కొండూరు సర్పంచ్ సీతారామ్ నాయక్  కోరుతున్నారు.