పటాన్‌చెరు : జేపీ కాలనీ డివిజన్ పరిధిలోని బండ్లగూడకు వెళ్లే రహదారిపై ప్రజలు ఎదుర్కొంటున్న ఇబ్బందులను తొలగించేందుకు పటాన్‌చెరు ఎమ్మెల్యే గూడెం మహిపాల్ రెడ్డి చొరవ తీసుకున్నారు. అక్రమ్ కేఫ్ నుంచి బండ్లగూడ వరకు ఉన్న రహదారిపై పేరుకుపోయిన మట్టి కుప్పలు, పిచ్చి మొక్కలను తన సొంత నిధులతో తొలగిస్తూ రోడ్డు చదును పనులు చేపట్టారు.ఈ పనులను మాజీ కార్పొరేటర్ మెట్టు కుమార్ యాదవ్ గత ఐదు రోజులుగా దగ్గరుండి పర్యవేక్షిస్తున్నారు. ట్రాక్టర్లు, జేసీబీ యంత్రాల సహాయంతో మట్టి కుప్పలను తొలగిస్తూ రహదారిని చదును చేసే పనులను వేగవంతం చేస్తున్నారు.ఈ సందర్భంగా మెట్టు కుమార్ యాదవ్ మాట్లాడుతూ, బండ్లగూడ ప్రజలు రాకపోకల సమయంలో ఎదుర్కొంటున్న ఇబ్బందులను తొలగించడమే లక్ష్యంగా ఎమ్మెల్యే గూడెం మహిపాల్ రెడ్డి సహకారంతో ఈ పనులు చేపట్టినట్లు తెలిపారు. రహదారిని మరింత సౌకర్యవంతంగా, విశాలంగా తీర్చిదిద్దేందుకు త్వరలో జీహెచ్‌ఎంసీ లేదా కార్పొరేట్ సామాజిక బాధ్యత (సీఎస్‌ఆర్‌) నిధులతో శాశ్వత అభివృద్ధి పనులు చేపట్టేందుకు కృషి చేస్తున్నట్లు వెల్లడించారు.ఈ మేరకు IELAకు సంబంధించిన సుధీర్ రెడ్డి, రంజిత్‌లతో చర్చలు జరిపినట్లు తెలిపారు. రహదారి సమస్యకు శాశ్వత పరిష్కారం చూపించి, స్థానిక ప్రజలకు మెరుగైన రవాణా సౌకర్యాలు కల్పించేందుకు కృషి చేస్తున్నట్లు మెట్టు కుమార్ యాదవ్ పేర్కొన్నారు.

విద్యార్థులను అభినందించిన జిల్లా కలెక్టర్ ప్రతీక్ జైన్, డీఈఓ ఆర్. రోహిణి ఇన్స్పైర్ మనక్ జాతీయస్థాయి ప్రదర్శనల్లో సంగారెడ్డి జిల్లా విద్యార్థులు ప్రతిభ చాటారు. జిల్లాకు చెందిన నలుగురు విద్యార్థులు జాతీయస్థాయి పోటీల్లో పాల్గొనగా, వారిలో ఇద్దరు విద్యార్థులు టాప్‌-60లో స్థానం సంపాదించి అంతర్జాతీయస్థాయికి ఎంపికయ్యారు. జపాన్‌లో నిర్వహించే అంతర్జాతీయ హైస్కూల్ ఎక్స్ఛేంజ్ ప్రోగ్రామ్‌లో పాల్గొనే అవకాశం కూడా వారికి లభించింది. 2023–24, 2024–25 సంవత్సరాలకు సంబంధించిన 12వ ఇన్స్పైర్ మనక్ జాతీయస్థాయి పోటీలు అక్టోబర్ 12 నుంచి 14 వరకు న్యూఢిల్లీలోని భారత్ మండపంలో నిర్వహించారు. తెలంగాణ రాష్ట్రం నుంచి వివిధ జిల్లాలకు చెందిన 52 ప్రాజెక్టులు ప్రదర్శనకు రాగా, రాష్ట్రం నుంచి ఐదుగురు విద్యార్థులు టాప్‌-60లో స్థానం సంపాదించారు. వీరిలో సంగారెడ్డి జిల్లాకు చెందిన ఇద్దరు విద్యార్థులు అంతర్జాతీయస్థాయికి ఎంపిక కావడం విశేషం. జాతీయస్థాయిలో ప్రతిభ చాటిన విద్యార్థులు: చౌడపురం సాయి మేఘన – ఆరిజిన్ టెక్నో స్కూల్, పటాన్‌చెరు. మిరియాల స్ప్రే, కంటి చూపును తాత్కాలికంగా అడ్డుకునే ఎల్‌ఈడీ లైట్లతో కూడిన అల్లర్ల నిరోధక కవచం రూపకల్పనకు సంబంధించిన ప్రాజెక్టును ప్రదర్శించి అంతర్జాతీయస్థాయికి ఎంపికయ్యారు.పూర్ణిత్ రెడ్డి – భారతీయ విద్యాభవన్, బీహెచ్‌ఈఎల్. కృత్రిమ మేధస్సు సహాయంతో దృష్టిలోపం ఉన్నవారికి ఉపయోగపడే సాంకేతిక పరిష్కారాన్ని రూపొందించి అంతర్జాతీయస్థాయికి ఎంపికయ్యారు. రుద్ర శరణ్య – పయనీర్ స్కూల్, సంగారెడ్డి. గృహ అవసరాల కోసం బహుళ ప్రయోజనాల వస్తు రవాణా సాధనాన్ని రూపొందించారు.ఆయుష్ కుమార్ ఉపాధ్యాయ – సిల్వర్ ఓక్స్ ఇంటర్నేషనల్ స్కూల్, వడక్‌పల్లి, అమీన్‌పూర్. సమాచార మార్పిడిలోని అడ్డంకులను అధిగమించేందుకు, దృష్టిలోపం ఉన్నవారికి సహాయపడే పరికరాన్ని రూపొందించారు.ఈ సందర్భంగా జిల్లా కలెక్టర్ ప్రతీక్ జైన్ మాట్లాడుతూ విద్యార్థులు భవిష్యత్తులో మంచి శాస్త్రవేత్తలుగా ఎదిగి సంగారెడ్డి జిల్లాకు మంచి పేరు తీసుకురావాలని ఆకాంక్షించారు. సమాజంలో ఎదురవుతున్న సమస్యలకు శాస్త్రీయ దృక్పథంతో నూతన ఆవిష్కరణలు చేసి, దేశాభివృద్ధికి ఉపయోగపడే ఆవిష్కర్తలుగా ఎదగాలని సూచించారు.ప్రతిభ చాటిన విద్యార్థులతో పాటు వారి పాఠశాలల యాజమాన్యాలు, గైడ్ టీచర్లు, తల్లిదండ్రులను జిల్లా కలెక్టర్ ప్రతీక్ జైన్, జిల్లా విద్యాశాఖ అధికారి ఆర్. రోహిణి అభినందించారు. ప్రశంసాపత్రాలు, శాలువాలు, జ్ఞాపికలతో సత్కరించారు.ఈ కార్యక్రమంలో ఏడీ శంకర్, ఏఎంఓ బాలయ్య, జిల్లా సైన్స్ అధికారి పి. సిద్ధారెడ్డి, ఓపెన్ స్కూల్ కోఆర్డినేటర్ వెంకటస్వామి, ఆరిజిన్ పాఠశాల కరస్పాండెంట్ ప్రమోద్, అలేఖ్య, వేణుగోపాలరెడ్డి, పద్మావతి, అశ్విన్ కుమార్, వెంకటేష్, రఘునందనరెడ్డి, సత్యనారాయణ తదితరులు పాల్గొన్నారు.

పుల్కల్, అందోల్ మండలాల్లో వ్యవసాయ సంక్షోభం.. పంట నష్టంపై ప్రభుత్వం స్పందించాలని రైతుల విజ్ఞప్తి   వర్షాభావ పరిస్థితులు, ఎల్‌నినో ప్రభావంతో పాటు సింగూరు జలాశయం నుంచి సాగునీరు అందకపోవడంతో సంగారెడ్డి జిల్లాలోని మెతుకుసీమ రైతులు తీవ్ర ఇబ్బందులు ఎదుర్కొంటున్నారు. ముఖ్యంగా ఉమ్మడి పుల్కల్, అందోల్ మండలాల పరిధిలో సింగూరు ప్రాజెక్టు ఆయకట్టు కింద వేలాది ఎకరాల్లో సాగు చేసిన వరి పంట నీరు లేక ఎండిపోతోంది. పంట చేతికొచ్చే సమయంలో సాగునీటి కొరత ఏర్పడటంతో రైతులు తీవ్ర ఆందోళనకు గురవుతున్నారు. పెట్టుబడుల కోసం చేసిన అప్పులు ఎలా తీర్చాలో తెలియక అన్నదాతలు దిక్కుతోచని పరిస్థితిని ఎదుర్కొంటున్నారు. రివెట్‌మెంట్ పనులు.. సాగునీటి కొరతతో ఇబ్బందులు సంగారెడ్డి జిల్లాలోని రైతులకు సింగూరు ప్రాజెక్టు ప్రధాన సాగునీటి వనరుగా ఉంది. ప్రాజెక్టు ఎడమ కాలువ ద్వారా సుమారు 40 వేల ఎకరాలకు పైగా వరి సాగు జరుగుతుందని రైతులు చెబుతున్నారు. అయితే ప్రాజెక్టు భద్రతా పనులు, కట్ట రివెట్‌మెంట్ పనులు, కాలువల సిమెంట్ లైనింగ్ మరమ్మతుల కారణంగా సాగునీటి సరఫరాపై ప్రభావం పడిందని వారు ఆవేదన వ్యక్తం చేస్తున్నారు. ప్రాజెక్టులో నీటి నిల్వలు తగ్గడం, మరోవైపు ఎల్‌నినో ప్రభావంతో ఆశించిన స్థాయిలో వర్షాలు కురవకపోవడం, ఎగువ ప్రాంతాల నుంచి జలాశయానికి నీటి ప్రవాహం లేకపోవడంతో నీటి లభ్యత మరింత తగ్గిపోయిందని రైతులు పేర్కొంటున్నారు. పుల్కల్, అందోల్ మండలాల పరిధిలోని కాలువల ద్వారా చెరువులకు సకాలంలో నీరు అందకపోవడంతో సాగునీటి సమస్య తీవ్రమైంది. దీనికి తోడు విద్యుత్ సరఫరాలో అంతరాయాలు, భూగర్భ జలమట్టాలు పడిపోవడంతో బోరుబావుల ద్వారా కూడా పంటలకు నీరు అందించలేని పరిస్థితి నెలకొంది. 80 శాతం వరకు పంట నష్టం జరిగిందంటున్న రైతులు సింగూరు ఆయకట్టు పరిధిలో సాగు చేసిన వరి పంటల్లో సుమారు 80 శాతం వరకు ఎండిపోయిందని పలువురు రైతులు ఆవేదన వ్యక్తం చేస్తున్నారు. కొన్ని ప్రాంతాల్లో పంట పూర్తిగా ఎండిపోయి పొలాలు బీడువారిన పరిస్థితి కనిపిస్తోంది. పంటను కాపాడుకునేందుకు చేసిన ప్రయత్నాలు ఫలించకపోవడంతో కొందరు రైతులు తమ పొలాల్లోనే పశువులను మేపుకోవాల్సిన దుస్థితి ఏర్పడిందని చెబుతున్నారు. సాధారణ పరిస్థితుల్లో ఈ ఆయకట్టు పరిధిలో సుమారు 17 లక్షల మెట్రిక్ టన్నుల వరి ధాన్యం దిగుబడి వస్తుందని అంచనా వేస్తుండగా, ప్రస్తుత పరిస్థితుల్లో దిగుబడి సుమారు 6 లక్షల మెట్రిక్ టన్నులకు పడిపోయే అవకాశం ఉందని సంబంధిత అంచనాలు సూచిస్తున్నాయి. ఇదే పరిస్థితి కొనసాగితే రైతులకు భారీ ఆర్థిక నష్టం తప్పదనే ఆందోళన వ్యక్తమవుతోంది. పెట్టుబడులు అప్పులపాలు.. రైతులకు తీరని నష్టం వరి సాగు కోసం రైతులు విత్తనాలు, ఎరువులు, పురుగుమందులు, కూలీల ఖర్చులు, ఇతర వ్యవసాయ అవసరాల కోసం పెద్ద మొత్తంలో పెట్టుబడులు పెట్టారు. కొందరు ప్రైవేటు వడ్డీ వ్యాపారుల వద్ద అప్పులు తీసుకుని పంట సాగు చేశారు. పంట చేతికొచ్చే సమయంలో నీరు అందక పంటలు ఎండిపోవడంతో పెట్టిన పెట్టుబడులు కూడా తిరిగి వచ్చే పరిస్థితి లేకుండా పోయిందని రైతులు కన్నీటి పర్యంతమవుతున్నారు. ఎకరాకు రూ.20 వేల పరిహారం ఇవ్వాలని డిమాండ్ ప్రభుత్వం తక్షణమే స్పందించి సింగూరు ఆయకట్టు పరిధిలోని పుల్కల్, అందోల్ మండలాల్లో ఎండిపోయిన పంటలను క్షేత్రస్థాయిలో పరిశీలించాలని రైతులు కోరుతున్నారు. వ్యవసాయ, రెవెన్యూ శాఖల అధికారులు సంయుక్తంగా పంట నష్టాన్ని అంచనా వేసి అర్హులైన రైతులకు నష్టపరిహారం అందించాలని విజ్ఞప్తి చేస్తున్నారు. ఎండిపోయిన ప్రతి ఎకరానికి రూ.20 వేల చొప్పున పరిహారం చెల్లించి రైతులను ఆదుకోవాలని డిమాండ్ చేస్తున్నారు. సాగునీటి సమస్యను పరిష్కరించడంతో పాటు రైతులకు తక్షణ ఆర్థిక సహాయం అందించి, భవిష్యత్తులో ఇలాంటి పరిస్థితులు పునరావృతం కాకుండా ముందస్తు ప్రణాళికలు రూపొందించాలని కోరుతున్నారు. రైతుల కష్టాలను ప్రభుత్వం గుర్తించి తగిన చర్యలు తీసుకోవాలని మెతుకుసీమ అన్నదాతలు విజ్ఞప్తి చేస్తున్నారు.

చౌటకూర్  :- సంగారెడ్డి జిల్లాలో చౌటకూర్ మండల కేంద్రంలో రాబోయే రోజుల్లో ఎల్‌నినో ప్రభావంతో తాగునీటి కొరత ఏర్పడే అవకాశం ఉన్న నేపథ్యంలో గ్రామ ప్రజలకు తాగునీటి ఇబ్బందులు కలగకుండా గ్రామ పంచాయతీ ముందస్తు చర్యలు చేపట్టింది.ఈ సందర్భంగా ఆదివారం గ్రామ సర్పంచ్ పార్కల రామ్ రెడ్డి ఆధ్వర్యంలో ప్రత్యేక నిధుల ద్వారా గ్రామంలోని మూడు బోర్లకు ఫ్లషింగ్ (బోర్ల శుభ్రపరిచే) పనులు చేపట్టారు.ఈ సందర్భంగా సర్పంచ్ పార్కల రామ్ రెడ్డి మాట్లాడుతూ.. రాబోయే రోజుల్లో ఎల్‌నినో ప్రభావం కారణంగా నీటి కొరత ఏర్పడే అవకాశాలను దృష్టిలో ఉంచుకొని ముందస్తు జాగ్రత్తలు తీసుకుంటున్నట్లు తెలిపారు. గ్రామంలో తాగునీటి సమస్య తలెత్తకుండా బోర్లను ముందుగానే శుభ్రపరిచి వినియోగానికి సిద్ధం చేస్తున్నట్లు పేర్కొన్నారు.గ్రామ ప్రజలకు నిరంతర తాగునీటి సరఫరా అందించడమే లక్ష్యంగా ఈ కార్యక్రమాన్ని మాజీ ఉపసర్పంచ్ రామా గౌడ్, కాంగ్రెస్ పార్టీ గ్రామ అధ్యక్షుడు వర్కల రమేష్, మాజీ మండల అధ్యక్షుడు సార గోవర్ధన్ ముదిరాజ్, ప్రభాకర్ రెడ్డి, మల్లికార్జున్ గౌడ్,వార్డు సభ్యులు జైపాల్ రెడ్డి, చక్రపాణి ,కిట్టు, మల్లేశం, అశోక్, గోరేమియా, ఎల్లయ్య, రాజేశ్వర్ గౌడ్, తదితరులు పాల్గొన్నారు.

సంబంధిత అధికారులు స్పందించడం లేదు.. స్వయంగా డిప్యూటీ కమిషనర్ ఆవేదన! డిప్యూటేషన్ అధికారుల వ్యవస్థతో సమస్యలకు పరిష్కారం కరువైందా? ప్రజలకు సమాధానం చెప్పేదెవరు? అమీన్‌పూర్ ప్రాంతంలో అక్రమ నిర్మాణాల వ్యవహారం రోజురోజుకూ చర్చనీయాంశంగా మారుతోంది. నిబంధనలకు విరుద్ధంగా నిర్మాణాలు జరుగుతున్నాయనే ఆరోపణలు వినిపిస్తున్నప్పటికీ, వాటిని అడ్డుకోవాల్సిన అధికార యంత్రాంగంలో సమన్వయం కొరవడిందా? ఒక శాఖ అధికారికి మరో శాఖ అధికారి అందుబాటులో లేకపోతే ప్రజా సమస్యలకు పరిష్కారం చూపేదెవరు? అక్రమ నిర్మాణాలపై ప్రశ్నించినప్పుడు బాధ్యతాయుతమైన సమాధానం ఇచ్చేవారు లేకపోవడానికి కారణం ఏమిటి? ప్రస్తుతం అమీన్‌పూర్ ప్రాంతంలో నెలకొన్న పరిస్థితులు ఇలాంటి ప్రశ్నలను లేవనెత్తుతున్నాయి. హైదరాబాద్ మున్సిపల్ కార్పొరేషన్ పరిధిలోని అమీన్‌పూర్ సర్కిల్‌–47 డిప్యూటీ కమిషనర్ ప్రదీప్ కుమార్‌ను అమీన్‌పూర్‌లో జరుగుతున్నటువంటి   అక్రమ నిర్మాణాలపై ప్రశ్నించగా, సంబంధిత అధికారులు తనకు కూడా అందుబాటులో ఉండటం లేదని, వారు స్పందించడం లేదని ఆయన చెప్పినట్లు సమాచారం. అధికారుల మధ్య సమన్వయం లేకపోవడం వల్ల సమస్యల పరిష్కారంలో ఇబ్బందులు ఎదురవుతున్నాయని, డిప్యూటేషన్‌పై పనిచేస్తున్న అధికారుల వ్యవస్థ కారణంగా కొన్ని సమస్యలకు పరిష్కారం చూపడం కష్టంగా మారుతోందని ఆయన ఆవేదన వ్యక్తం చేసినట్లు తెలిసింది. అధికారులకే అధికారులు అందుబాటులో లేకపోతే ఎలా? ప్రజల సమస్యలను పరిష్కరించాల్సిన అధికారులకే సంబంధిత శాఖల అధికారులు అందుబాటులో లేకపోతే పరిస్థితి ఎలా ఉంటుందన్న ప్రశ్న ఇప్పుడు తలెత్తుతోంది. ఒకవైపు అక్రమ నిర్మాణాలపై ఫిర్యాదులు, మరోవైపు అధికారుల మధ్య సమన్వయ లోపం ఆరోపణలు.. ఈ రెండింటి మధ్య ప్రజలు ఇబ్బందులు ఎదుర్కోవాల్సి వస్తోందనే విమర్శలు వినిపిస్తున్నాయి. అక్రమ నిర్మాణాలను గుర్తించడం, అనుమతులను పరిశీలించడం, నిబంధనల ఉల్లంఘనలపై చర్యలు తీసుకోవడం సంబంధిత అధికారుల బాధ్యత. అయితే, అధికారుల మధ్య సమన్వయం లేకపోవడం వల్ల చర్యలు ఆలస్యమవుతున్నాయా? లేక బాధ్యతల కేటాయింపులో స్పష్టత లేకపోవడమే సమస్యకు కారణమా? అన్న అంశాలపై ఉన్నతాధికారులు దృష్టి సారించాల్సిన అవసరం ఉంది. సమన్వయ లోపమా.. బాధ్యతల నుంచి తప్పించుకునే ధోరణా? అమీన్‌పూర్‌లో అక్రమ నిర్మాణాలపై వినిపిస్తున్న ఆరోపణలకు శాశ్వత పరిష్కారం చూపాలంటే సమస్యను ఒక శాఖకు పరిమితం చేయకుండా సమగ్రంగా పరిశీలించాల్సిన అవసరం ఉంది. నిర్మాణ అనుమతులు ఇచ్చే విభాగం, క్షేత్రస్థాయిలో పర్యవేక్షించే అధికారులు, నిబంధనల ఉల్లంఘనలపై చర్యలు తీసుకునే యంత్రాంగం పరస్పరం సమన్వయంతో పనిచేయాలి. ఒక అధికారి బాధ్యతను మరొకరిపైకి నెట్టడం లేదా ఫిర్యాదులపై స్పందించకపోవడం వంటి పరిస్థితులు ఉంటే వాటిని ఉన్నతాధికారులు సమీక్షించాలి. డిప్యూటేషన్‌పై పనిచేస్తున్న అధికారుల వ్యవస్థ వల్లే సమస్యలు పరిష్కారం కావడం లేదన్న వాదన ఉంటే, అందుకు సంబంధించిన పరిపాలనా కారణాలను పరిశీలించి బాధ్యతలను స్పష్టంగా నిర్దేశించాలి. ప్రజా సమస్యలకు పరిష్కారం చూపే విషయంలో అధికారుల మధ్య సమన్వయం తప్పనిసరి. అది లేకపోతే నిబంధనల అమలు కాగితాలకే పరిమితమయ్యే ప్రమాదం ఉంది. అక్రమ నిర్మాణాలకు అడ్డుకట్ట ఎప్పుడు? నిర్మాణ నిబంధనలను ఉల్లంఘించినట్లు నిర్ధారణ అయితే సంబంధిత చట్టాలు, నిబంధనల ప్రకారం చర్యలు తీసుకోవాల్సిన బాధ్యత అధికారులపై ఉంది. నిర్మాణ అనుమతులు ఉన్నాయా? ఆమోదిత ప్లాన్‌కు అనుగుణంగానే పనులు జరుగుతున్నాయా? ఉల్లంఘనలు గుర్తించిన సందర్భాల్లో నోటీసులు జారీ చేశారా? తదుపరి చర్యలు ఏమిటి? అనే అంశాలపై అధికారులు స్పష్టత ఇవ్వాలి. అక్రమ నిర్మాణాలపై ఫిర్యాదులు వచ్చినప్పుడు క్షేత్రస్థాయిలో పరిశీలన జరిపి, వాస్తవాలను నిర్ధారించి, తీసుకున్న చర్యలను ఫిర్యాదుదారులకు తెలియజేసే వ్యవస్థ ఉండాలి. సంబంధిత అధికారులు అందుబాటులో లేకపోవడం లేదా స్పందించకపోవడం వంటి సమస్యలు ఉంటే వాటిని పరిష్కరించేందుకు ఉన్నతాధికారులు ప్రత్యేక పర్యవేక్షణ చేపట్టాలి. ప్రజలకు కావాల్సింది హామీలు కాదు.. సమస్యకు శాశ్వత పరిష్కారం! అమీన్‌పూర్ ప్రాంతంలో నిర్మాణాలపై వస్తున్న ఫిర్యాదులకు తెరదించాలంటే అధికారుల సమన్వయం, నిరంతర పర్యవేక్షణ, బాధ్యతల స్పష్టత అవసరం. అక్రమ నిర్మాణాల ఆరోపణలపై విచారణ జరిపి, వాస్తవాలను ప్రజల ముందుంచాలి. నిబంధనల ఉల్లంఘనలు నిర్ధారణ అయితే బాధ్యులపై చట్టప్రకారం చర్యలు తీసుకోవాలి. అధికారుల మధ్య సమన్వయ లోపం నిజంగా సమస్యగా ఉంటే దానిని సరిదిద్దాలి. బాధ్యతల నిర్వహణలో నిర్లక్ష్యం ఉంటే దానిపై సమీక్ష జరగాలి. ఏ కారణంతోనైనా ప్రజా సమస్యలు పరిష్కారం కాకుండా ఉండకూడదు. అమీన్‌పూర్‌లో అక్రమ నిర్మాణాల ఆరోపణలకు శాశ్వత పరిష్కారం చూపి, నిబంధనల అమలుపై ప్రజలకు నమ్మకం కల్పించాల్సిన బాధ్యత సంబంధిత అధికారులదే. ఈ వ్యవహారంపై ఉన్నతాధికారులు ఎలాంటి చర్యలు తీసుకుంటారో వేచి చూడాల్సి ఉంది.  

చౌటకూర్ :- సంగారెడ్డి జిల్లాలో చౌటకూర్ మండల కేంద్రంలో రైతుల సౌకర్యార్థం డీసీఎంఎస్ (జిల్లా సహకార మార్కెటింగ్ సొసైటీ) ఆధ్వర్యంలో వరి ధాన్యం కొనుగోలు కేంద్రాన్ని ప్రారంభించారు. రైతులు పండించిన వరి ధాన్యాన్ని ప్రభుత్వ మద్దతు ధరకు విక్రయించుకునేందుకు వీలుగా ఈ కొనుగోలు కేంద్రాన్ని ఏర్పాటు చేశారు. వరి కోతలు పూర్తయిన అనంతరం రైతులు తమ ధాన్యాన్ని విక్రయించేందుకు ఎదుర్కొనే ఇబ్బందులను తగ్గించడంతో పాటు, దళారుల ప్రమేయం లేకుండా ప్రభుత్వ నిబంధనల ప్రకారం కొనుగోళ్లు చేపట్టడం ఈ కేంద్రం ప్రధాన ఉద్దేశం. రైతులు తమ ధాన్యాన్ని కొనుగోలు కేంద్రానికి తీసుకువచ్చి నిబంధనలకు అనుగుణంగా విక్రయించుకోవచ్చు. కొనుగోలు కేంద్రంలో ధాన్యం నాణ్యత పరిశీలన, తేమ శాతం నిర్ధారణ, తూకం, నమోదు తదితర ప్రక్రియలను ప్రభుత్వ మార్గదర్శకాలకు అనుగుణంగా నిర్వహించాల్సి ఉంటుంది. రైతులు ధాన్యం తీసుకువచ్చే ముందు అవసరమైన పత్రాలు, కొనుగోలు కేంద్రం నిబంధనల గురించి సంబంధిత అధికారులను సంప్రదించాలని సూచించారు. రైతులు పండించిన పంటకు సరైన ధర లభించేలా, ధాన్యం విక్రయ ప్రక్రియ సజావుగా సాగేందుకు కొనుగోలు కేంద్రం ఎంతగానో ఉపయోగపడనుంది. ఈ కార్యక్రమంలో సర్పంచ్ పార్కల రాం రెడ్డి,డీసీఎంఎస్ అధ్యక్షులు వంశి ,కాంగ్రెస్ గ్రామ అధ్యక్షుడు వర్కల రమేష్, మాజీ ఉపసర్పంచ్ రామా గౌడ్, రైతులు లక్ష్మారెడ్డి,, మాణిక్య రెడ్డి, జాఫర్, మల్లప్ప, రాధా గౌడ్, వార్డు సభ్యులు జైపాల్ రెడ్డి, చక్రపాణి, గోరేమియా, ఎల్లయ్య, కృష్ణ, అభిలాష్, పేట గంగారం, అశోక్, రైతులు తదితరులు పాల్గొన్నారు.

పటాన్‌చెరు: టీపీసీసీ అధ్యక్షుడు, ఎమ్మెల్సీ మహేష్ కుమార్ గౌడ్‌ను పటాన్‌చెరు కాంగ్రెస్ పార్టీ ఇన్‌చార్జి కాట శ్రీనివాస్ గౌడ్ మర్యాదపూర్వకంగా కలిశారు. విజయదశమి పర్వదినాన్ని పురస్కరించుకుని మహేష్ కుమార్ గౌడ్ నివాసానికి వెళ్లిన కాట శ్రీనివాస్ గౌడ్ ఆయనకు దసరా శుభాకాంక్షలు తెలియజేశారు. ఈ సందర్భంగా శాలువా కప్పి సత్కరించారు.పండుగ సందర్భంగా జరిగిన ఈ మర్యాదపూర్వక భేటీ సుహృద్భావ వాతావరణంలో సాగింది.

 ప్రభుత్వ ఆదేశాల మేరకు వాల్మీకి జయంతి కార్యక్రమాన్ని పటాన్‌చెరు ఎంపీడీవో కార్యాలయ ఆవరణలో నిర్వహించినట్లు ఎంపీడీవో యాదగిరి తెలిపారు. ఈ సందర్భంగా ఆదికవి మహర్షి వాల్మీకి చిత్రపటానికి ఘనంగా నివాళులర్పించారు. వాల్మీకి రచించిన రామాయణం ధర్మం, సత్యం, నీతి మార్గాలను బోధిస్తుందని, ఆయన జీవితం ప్రతి ఒక్కరికీ స్ఫూర్తిదాయకమని యాదగిరి పేర్కొన్నారు. ఆయన బోధనలను ప్రతి ఒక్కరూ ఆచరించాలని సూచించారు. ఈ కార్యక్రమంలో ఎంఈఓ నాగేశ్వరరావు, ఇంద్రేశం మున్సిపల్ కమిషనర్ అజయ్ కుమార్ రెడ్డి, ఇస్నాపూర్ మున్సిపల్ కమిషనర్ కిషన్ రావు, వివిధ శాఖల అధికారులు, సిబ్బంది పాల్గొన్నారు.

సంగారెడ్డి జిల్లా మునిపల్లి మండలం పిఎస్ఆర్ గార్డెన్ లో సర్పంచులు స్థానిక నాయకులతో కలిసి సమావేశంలో బిఆర్ఎస్ పార్టీ రాష్ట్ర నాయకులు పైతర సాయికుమార్ మాట్లాడుతూ మునిపల్లి మండల పరిధిలోని రైతులు ప్రస్తుతం వ్యవసాయ సంక్షోభం ఎలినెనో ప్రభావం ఎదుర్కొంటున్నారు. మండలంలో ప్రధాన పంటలైన పత్తి, చెరుకు, మిర్చి పంటలు ప్రతికూల పరిస్థితుల కారణంగా తీవ్రంగా దెబ్బతిన్నాయని  రైతులు ఆవేదన వ్యక్తం చేస్తున్నారన్నారు.పంటల సాగు కోసం పెట్టుబడులు పెట్టిన రైతులు, ఆశించిన దిగుబడులు రాక ఆర్థికంగా నష్టపోయే పరిస్థితి నెలకొంది.నాణ్యమైన 18 గంటల విద్యుత్ సరఫరా చేయాలి!వ్యవసాయానికి అవసరమైన విద్యుత్ సక్రమంగా సరఫరా కాకపోవడంతో రైతులు తీవ్ర ఇబ్బందులు పడుతున్నారు.రోజుకు కేవలం నాలుగు నుంచి ఐదు గంటల పాటు మాత్రమే విద్యుత్ అందుతోందని రైతులు ఆవేదన వ్యక్తం చేస్తున్నారు.విద్యుత్ కోతలతో పంటలకు సకాలంలో నీరు అందించలేకపోతునాయి. ప్రభుత్వం వెంటనే స్పందించి వ్యవసాయానికి 18 గంటల నిరంతరాయ, నాణ్యమైన విద్యుత్ సరఫరా అందించేలా చర్యలు తీసుకోవాలని డిమాండ్ చేస్తున్నాం.పంట నష్టపరిహారం కింద తక్షణమే పరిహారం ఎకరానికి 25000 అందించాలి.ముఖ్యంగా మిర్చి, చెరుకు పంటలకు నష్టం వాటిల్లిన రైతులను ప్రభుత్వం తక్షణమే గుర్తించి, క్షేత్రస్థాయిలో పంటలను పరిశీలించి, అర్హులైన రైతులకు నష్టపరిహారం అందించాలని డిమాండ్ చేస్తున్నాం. రైతుబంధు నిధులు వెంటనే విడుదల చేయాలి!రబీ సీజన్ ముగింపు దశకు చేరుకుంటున్నప్పటికీ రైతుబంధు పెట్టుబడి సాయం అందకపోవడం రైతులకు ఆర్థిక భారంగా మారుతోంది.ఇప్పటికే సాగు పెట్టుబడుల కోసం అప్పులు చేసిన రైతులు మరింత ఇబ్బందులకు గురవుతున్నారు. మునిపల్లి మండలాన్ని*కరువు *ప్రాంతంగా ప్రకటించాలి!మండలంలోని వ్యవసాయ పరిస్థితులను ప్రభుత్వం తక్షణమే సమీక్షించి, పంటల నష్టం, సాగునీటి కొరత, విద్యుత్ సమస్యలు తదితర అంశాలను పరిగణనలోకి తీసుకోవాలిరైతుల సమస్యలను ప్రభుత్వం నిర్లక్ష్యం చేయకుండా తక్షణమే స్పందించాలని బీఆర్ఎస్ పార్టీ తరఫున ప్రభుత్వాన్ని డిమాండ్ చేశారు.రైతుల కష్టాలను గుర్తించి, వారి పంటలను కాపాడేందుకు అవసరమైన చర్యలు తీసుకోవాలి. రైతులు అప్పుల ఊబిలో కూరుకుపోకుండా, వ్యవసాయాన్ని కొనసాగించగలిగేలా ప్రభుత్వం అండగా నిలవాలినిఈ సందర్భంగా డిమాండ్ చేశారు.ఈకార్యక్రమంలో మునిపల్లి మండల తాజా మాజీ జెడ్పిటిసి పైతర మీనాక్షి సాయికుమార్  ఎక్స్ ఎంపీపీ చంద్రయ్య మండల నాయకులు   మంతూరి శశికుమార్, బండారి పాండు,సర్పంచులు,ఇర్ఫాన్ పటేల్  విట్టల్  మల్లేశం రమేష్  సంగమేశ్వర్  దయానంద్, రాజు,నాయకులు గడ్డం భాస్కర్  గడ్డం భాస్కర్ మాజీ సర్పంచులు పైతర మొగులయ్య గోపులారం బాగయ్య  గోపులారం బక్కన్న గార్లపల్లి శంకరయ్య  మేల సంఘం శ్రీనివాస్,చీలపల్లి మౌలానా  తుడుం దుర్గయ్య  తదితరులు పాల్గొన్నారు

హత్నూర మండల్ ముదిరాజ్ సంఘం ఆధ్వర్యంలో శనివారం నాడు హత్నూర ఎస్సై శ్రీధర్ రెడ్డి గారిని హత్నూర పోలీస్ స్టేషన్లో మర్యాదపూర్వ కలిసి శాలువాతో ఘనంగా సన్మానం చేశారు ఈ సందర్భంగా హత్నూర మండల్ ముదిరాజ్ సంఘం అధ్యక్షులు తలారి రాజేందర్ మాట్లాడుతూ ఈనెల 22న జరిగిన పండుగ సాయన్న జయంతి వేడుకలు విజయవంతం కావడానికి పోలీస్ శాఖ ద్వారా అందించిన సహకారానికి గుర్తుగా ఈ సన్మానం చేశామని ఆయన తెలిపారు ఈ కార్యక్రమంలో హత్నూర మండల్ ముదిరాజ్ సంఘం అధ్యక్షులు తలారి రాజేందర్ కాసాల సర్పంచ్ కొటాల వెంకటేశం లింగాపూర్ సర్పంచ్ మణిదీప్ పల్పనూరు సర్పంచ్ ఆంజనేయులు ముదిరాజ్ సంఘం నాయకులు దుర్గయ్య రవి తలారి యాదగిరి పన్యాల రాజు హత్నూర యాదగిరి  తదితరులు పాల్గొన్నారు

సంగారెడ్డి: భద్రతే అభివృద్ధికి బలమైన పునాది అని రాష్ట్ర ఉప ముఖ్యమంత్రి భట్టి విక్రమార్క మల్లు అన్నారు. సంగారెడ్డి జిల్లా అమీన్‌పూర్‌లోని సెక్యూరిటీ అకాడమీలో నిర్వహించిన తెలంగాణ ప్రత్యేక రక్షణ దళం (TGSPF) ఆవిర్భావ దినోత్సవ వేడుకల్లో పాల్గొనడం సంతోషంగా ఉందని పేర్కొన్నారు. రాష్ట్రంలోని కీలక సంస్థలకు పటిష్టమైన భద్రత కల్పిస్తూ టీజీఎస్‌పీఎఫ్‌ సిబ్బంది అందిస్తున్న సేవలను ఆయన అభినందించారు. రాష్ట్ర అభివృద్ధి నిరంతరాయంగా కొనసాగాలంటే కీలక ప్రభుత్వ సంస్థలు, మౌలిక సదుపాయాలకు భద్రత ఎంతో అవసరమని ఉప ముఖ్యమంత్రి తెలిపారు. తెలంగాణ సచివాలయం, శాసనసభ, హైకోర్టు, నాగార్జునసాగర్‌ ప్రాజెక్టు, ప్రధాన విద్యుత్ ఉత్పత్తి కేంద్రాలు సహా రాష్ట్రంలోని 67 కీలక సంస్థలకు టీజీఎస్‌పీఎఫ్‌ రక్షణ కల్పిస్తోందని వెల్లడించారు. దాదాపు రెండు వేల మంది సిబ్బంది నిరంతరం విధులు నిర్వర్తిస్తూ రాష్ట్ర ప్రగతికి రక్షణ కవచంలా నిలుస్తున్నారని ప్రశంసించారు.ఆధునిక సాంకేతికతపై శిక్షణ అవసరంప్రస్తుతం భద్రతా రంగంలో ఆధునిక సాంకేతిక పరిజ్ఞానం కీలక పాత్ర పోషిస్తోందని భట్టి విక్రమార్క అన్నారు. డ్రోన్లు, కృత్రిమ మేధ (AI) వంటి సాంకేతికతలు వేగంగా అభివృద్ధి చెందుతున్న నేపథ్యంలో భద్రతా సిబ్బందికి నిరంతర శిక్షణ, నైపుణ్యాభివృద్ధి అవసరమని పేర్కొన్నారు. మారుతున్న సవాళ్లకు అనుగుణంగా సిబ్బంది తమ సామర్థ్యాలను మెరుగుపరుచుకోవాలని సూచించారు.సిబ్బంది సంక్షేమానికి ప్రభుత్వం కట్టుబడి ఉందిప్రజలకు భరోసా కల్పిస్తూ, క్రమశిక్షణతో విధులు నిర్వర్తిస్తున్న టీజీఎస్‌పీఎఫ్‌ సిబ్బంది సంక్షేమానికి రాష్ట్ర ప్రభుత్వం ఎల్లప్పుడూ కట్టుబడి ఉంటుందని ఉప ముఖ్యమంత్రి స్పష్టం చేశారు. రాష్ట్రంలోని కీలక సంస్థల రక్షణ బాధ్యతలను సమర్థవంతంగా నిర్వహిస్తున్న అధికారులు, సిబ్బంది సేవలు అభినందనీయమని అన్నారు.రేయింబవళ్లు శ్రమిస్తూ రాష్ట్ర భద్రతతో పాటు తెలంగాణ అభివృద్ధిలో భాగస్వాములవుతున్న టీజీఎస్‌పీఎఫ్‌ అధికారులు, సిబ్బందికి ఆయన హృదయపూర్వక అభినందనలు, శుభాకాంక్షలు తెలిపారు. విధి నిర్వహణలో సిబ్బందికి అండగా నిలుస్తున్న వారి కుటుంబ సభ్యులను కూడా అభినందించారు. రాష్ట్ర భద్రతలో టీజీఎస్‌పీఎఫ్‌ తన బాధ్యతలను మరింత సమర్థవంతంగా కొనసాగించాలని ఆకాంక్షించారు.

సంగారెడ్డి : సంగారెడ్డి జిల్లా జిన్నారం మండలం గడ్డపోతారం పారిశ్రామికవాడలోని సారకా ల్యాబొరేటరీస్‌ పరిశ్రమలో గ్యాస్‌ లీక్‌ ఘటన తీవ్ర కలకలం రేపింది. ఈ ప్రమాదంలో ఇద్దరు కార్మికులు మృతి చెందినట్లు సమాచారం. పరిశ్రమలోని గ్లాస్‌ బ్లాక్‌ వద్ద గ్యాస్‌ లీక్‌ కావడంతో ఈ ప్రమాదం చోటుచేసుకున్నట్లు తెలుస్తోంది. ఘటనతో పరిశ్రమ పరిసర ప్రాంతాల్లో ఆందోళన నెలకొంది. నైట్‌ షిఫ్ట్‌లో  11, 12 గంటల మధ్యలో  విధులు నిర్వహిస్తున్న కార్మికులు  సుదర్శన్‌ (28), బాలాజీ (29) మృతి చెందినట్లు సమాచారం. ఈ ఘటనతో కార్మికుల భద్రతపై మరోసారి ప్రశ్నలు తలెత్తుతున్నాయి. పరిశ్రమల్లో భద్రతా ప్రమాణాలను కచ్చితంగా అమలు చేయాలని, కార్మికులకు తగిన రక్షణ కల్పించాలని స్థానికులు కోరుతున్నారు. యాజమాన్యం నిర్లక్ష్యం వల్లే   ఇలాంటి సంఘటన జరుగుతున్నాయని కార్మికుల స్థానికులు ఆవేదన వ్యక్తం చేస్తున్నారు