పెద్ద శంకరంపేట్ :  మెదక్ డిప్యూటీ కమిషనర్ (ఎక్సైజ్) ఏ. చంద్రయ్య, డీపీఈఓ ఎల్. నర్సింహారెడ్డి ఆదేశాల మేరకు మెదక్ ప్రొహిబిషన్ అండ్ ఎక్సైజ్ శాఖ అధికారులు పెద్దశంకరంపేట మండలంలో కల్లు దుకాణాలపై తనిఖీలు నిర్వహిస్తున్నారు. వివిధ గ్రామాల్లో కల్లు దుకాణాలను తనిఖీ చేస్తూ నమూనాలను సేకరించి ప్రయోగశాలకు పంపిస్తున్నారు. అనుమతులు లేకుండా దుకాణాలు నిర్వహిస్తున్న వారిపై కేసులు నమోదు చేస్తున్నారు. సెప్టెంబర్ 9న బూరుగుపల్లి, విరోజిపల్లి గ్రామాల్లోని కల్లు దుకాణాల నుంచి నమూనాలను సేకరించి ప్రయోగశాలకు పంపించారు. అలాగే లక్ష్మణపూర్ ప్రాంతంలోని టీసీఎస్ యూనిట్‌లో కల్లు నమూనాలను సేకరించినట్లు అధికారులు తెలిపారు. అక్టోబర్ 13న శీతారాంపల్లి గ్రామంలో అనుమతులు లేకుండా నిర్వహిస్తున్న రెండు కల్లు దుకాణాలపై కేసులు నమోదు చేశారు. ఈ సందర్భంగా సుమారు 160 లీటర్ల కల్లును ధ్వంసం చేసి, ఇద్దరు వ్యక్తులపై కేసులు నమోదు చేసినట్లు పేర్కొన్నారు. అక్కడి నుంచి కూడా నమూనాలను సేకరించారు. అక్టోబర్ 26న శివ్వాయిపల్లి, తిరుమలాపూర్, శంకరంపేట గ్రామాల్లోని కల్లు దుకాణాల నుంచి నమూనాలను సేకరించారు. కల్తీ కల్లు విక్రయించినట్లు నిర్ధారణ అయినా, అనుమతులు లేకుండా కల్లు దుకాణాలు నిర్వహించినా సంబంధిత వ్యక్తులపై చట్టప్రకారం కఠిన చర్యలు తీసుకుంటామని ఎక్సైజ్ అధికారులు హెచ్చరించారు. ఈ తనిఖీల్లో మెదక్ ఎక్సైజ్ అధికారి ఏ. వెంకటేశ్, ఎస్‌ఐ టి. వినోద్ కుమార్ తదితరులు పాల్గొన్నారు.

రేగోడ్(మెదక్ ): ఎల్ నినో ప్రభావాల నేపథ్యంలో రేగోడ్ మండల ప్రజలు, రైతులు ముందస్తు జాగ్రత్తలు తీసుకోవాలని నోబుల్ యూత్  అధ్యక్షుడు నరేష్  సూచించారు.రైతులు నీటి లభ్యతను దృష్టిలో ఉంచుకొని పంటల సాగులో నీటి పొదుపు పద్ధతులు పాటించాలని తెలిపారు.మండల యువత ప్రజల్లో నీటి సంరక్షణపై అవగాహన కల్పించాలని,ప్రభుత్వాలు చర్యలు తీసుకుంటాయని కాకుండా ప్రజలే సొంతంగా నీటిని వృథా చేయకుండా పొదుపుగా వినియోగించడం చేపట్టాలని ప్రజలను కోరారు.

ఎల్నినో ప్రభావంతో తలెత్తే పరిస్థితులను ప్రజలు సమర్థవంతంగా ఎదుర్కొనేందుకు ముందస్తు జాగ్రత్తలు పాటించాలని మనోహరాబాద్ మండల ఎంపీవో శ్రీనివాస్ రెడ్డి సూచించారు. మండలంలోని దండుపల్లి గ్రామ పంచాయతీ కార్యాలయంలో సర్పంచ్ మరాఠి నాగరాజు అధ్యక్షతన ఎల్నినో ప్రభావంపై గ్రామసభ నిర్వహించారు.ఈ సందర్భంగా ఎంపీవో శ్రీనివాస్ రెడ్డి మాట్లాడుతూ.. మారుతున్న వాతావరణ పరిస్థితులకు అనుగుణంగా ప్రజలు అప్రమత్తంగా ఉండాలని సూచించారు. తాగునీటిని వృథా చేయకుండా పొదుపుగా వినియోగించుకోవాలని, విద్యుత్‌ వినియోగంలోనూ జాగ్రత్తలు పాటించాలని కోరారు. నీరు, విద్యుత్‌ వనరులను బాధ్యతాయుతంగా వినియోగించడం ద్వారా భవిష్యత్తులో ఎదురయ్యే ఇబ్బందులను కొంతవరకు తగ్గించవచ్చని పేర్కొన్నారు.ఎల్నినో ప్రభావంపై ప్రజలకు అవగాహన కల్పించడంతో పాటు, గ్రామస్థులు అవసరమైన జాగ్రత్తలు పాటించాలని సూచించారు. వాతావరణ మార్పుల నేపథ్యంలో ప్రజలు సమన్వయంతో వ్యవహరిస్తూ, అందుబాటులో ఉన్న వనరులను పొదుపుగా వినియోగించుకోవాలని పిలుపునిచ్చారు.

మనోహరాబాద్ : రైతులకు ధాన్యం విక్రయాల్లో ఇబ్బందులు ఎదురుకాకుండా, పండించిన పంటకు గిట్టుబాటు ధర పొందేందుకు ప్రభుత్వం ఏర్పాటు చేస్తున్న కొనుగోలు కేంద్రాలను సద్వినియోగం చేసుకోవాలని దండుపల్లి సర్పంచ్ మరాఠి నాగరాజు, ఏపీఎం సత్యనారాయణ సూచించారు.మనోహరాబాద్ మండలం దండుపల్లి గ్రామంలో ఐకేపీ ఆధ్వర్యంలో ఏర్పాటు చేసిన వడ్ల కొనుగోలు కేంద్రాన్ని సోమవారం వారు ప్రారంభించారు. ఈ సందర్భంగా కొనుగోలు కేంద్రంలో చేపట్టిన ఏర్పాట్లను పరిశీలించారు. రైతులు తమ ధాన్యాన్ని దళారులకు విక్రయించి నష్టపోకుండా, ప్రభుత్వ కొనుగోలు కేంద్రాలకు తీసుకువచ్చి విక్రయించాలని సూచించారు.రైతులు పండించిన ధాన్యాన్ని విక్రయించేందుకు కొనుగోలు కేంద్రాలు ఎంతగానో ఉపయోగపడతాయని వారు పేర్కొన్నారు. ధాన్యం విక్రయ ప్రక్రియలో రైతులు నిబంధనలను పాటిస్తూ, కొనుగోలు కేంద్రాల సేవలను వినియోగించుకోవాలని తెలిపారు. పంటను విక్రయించే సమయంలో రైతులకు అవసరమైన సహకారం అందించాలని ఐకేపీ సిబ్బందికి సూచించారు.ఈ కార్యక్రమంలో ఐకేపీ అధికారులు కిషన్ నాయక్, మమత, మంజుల, గ్రామ సంఘం ఓబీ ఉమారాణి, నాయకులు బిక్షపతి, యాదగిరి తదితరులు పాల్గొన్నారు.

శివంపేట : శివంపేట మండలంలోని పెద్దగొట్టిముక్కల గ్రామంలో ప్రభుత్వ పాఠశాలల విద్యార్థులకు షూస్ పంపిణీ చేశారు. హైస్కూల్, ప్రైమరీ స్కూల్ విద్యార్థులకు రాష్ట్ర ప్రభుత్వం అందించిన షూస్‌ను గ్రామ సర్పంచ్ నవీన్ పంపిణీ చేశారు. ఈ కార్యక్రమంలో ఉపసర్పంచ్ అల్లాడి ఆంజనేయులు, వార్డు సభ్యులు అల్లాడి వీరేశం, బేరి సాయికుమార్, కాళ్ల హరీష్, నాయకులు చేత్రి గణేష్, పిల్లల గణేష్, హాచంపేట సురేష్, మానసతో పాటు ఉపాధ్యాయులు పాల్గొన్నారు.

మండల పరిధిలోని అన్ని పాఠశాలల విద్యార్థులకు ఉదయం అల్పాహారం పంపిణీ చేశారు. పాపన్నపేట ఉన్నత పాఠశాలలో గ్రామ సర్పంచ్ పావని నరేందర్ గౌడ్ అల్పాహార పంపిణీ కార్యక్రమాన్ని ప్రారంభించారు. ఈ సందర్భంగా ఆమె  మాట్లాడుతూ  ప్రభుత్వం తీసుకువచ్చిన బ్రేక్ ఫాస్ట్ కార్యక్రమాన్ని విద్యార్థులందరూ వినియోగించుకోవాలని సూచించారు. ఉదయం ప్రతి ఒక్కరు పాఠశాలలో  తినాలని ,ఆకలితో ఉండవద్దని అన్నారు. ఈ కార్యక్రమంలో మండల కాంగ్రెస్ అధ్యక్షులు నరేందర్ గౌడ్, పాఠశాల చైర్మన్ భవాని, ప్రధానో పాధ్యాయులు మహేశ్వర్,మాజీ సర్పంచ్ గురుమూర్తి గౌడ్ ,మాజీ ఉప సర్పంచ్ ఖలీమ్ , ముశెట్టి  కిష్టయ్య ,   శివయ్య ,సంగమేశ్వర్,  శ్రీనివాస్ ,చోటు , రమేష్ ,ఉదయ్ ,  ప్రవీణ్ గౌడ్ , భూమయ్య ,పౌలు ,వినీష్ గౌడ్ హరీష్ ,శ్రీశైలం ,రాజు ,ఆంజనేయులు  పాల్గొన్నారు.

తెలంగాణ జాతి పిత కొండా లక్ష్మణ్ బాపూజీ కుమార్తె డాక్టర్ పవిత్రవాణి కి  ఎమ్మెల్సీ సభ్యత్వం కల్పించాలనీ మెదక్ జిల్లా పద్మశాలి సంఘం అధ్యక్షుడు మ్యాకల జయరాములు ప్రభుత్వాన్ని కోరారు. సోమవారం రోజు ఆయన ఒక ప్రకటనలో   మాట్లాడుతూ కొండా లక్ష్మణ్ బాపూజీ ప్రత్యేక తెలంగాణ రాష్ట్రం కోసం మంత్రి పదవిని సైతం తృణప్రాయంగా త్యాగం చేసిన మహనీయుడన్నారు. ఆయన నివాసమైన 'జల దృశ్యం' కేంద్రబిందువుగా నిలిచిందన్నారు. స్వాతంత్ర్య ఉద్యమంలోనూ బడుగు,బలహీన వర్గాల హక్కుల సాధనలో ఆయన చేసిన సేవలు చిరస్మరణీయమని కొనియాడారు. డాక్టర్ పవిత్రవాణికి శాసన మండలి సభ్యత్వం కల్పించాలని కోరటం కేవలం ఆమె కొండా లక్ష్మణ్ బాపూజీ కుమార్తె అనే కారణంతోనే కాదని,తన విద్యార్హతలు,అనుభవం, సేవా దృక్పథం సమాజం పట్ల ఉన్న నిబద్ధత ద్వారా ఆమె పదవికి అర్హతలు కలిగి ఉన్నారన్నారు. కొండా లక్ష్మణ్ బాపూజీ గారి యూనివర్సల్ ఫౌండేషన్ ద్వారా వందలాది పేద విద్యార్థులకు ఉన్నత విద్యలో శిక్షణ, ఆర్థిక సహాయం అందిస్తున్నారని ఆయన తెలిపారు. వీవర్ వెల్ఫేర్ ద్వారా పద్మశాలి విద్యార్థులకు ఉచిత వసతి,బోజన సౌకర్యాలు కల్పిస్తూ, చేనేత కార్మికులు కుటుంబాలకు చేయూత నిస్తున్నారని వెల్లడించారు.వైద్యురాలిగా ఉచిత వైద్య శిబిరాలు నిర్వహిస్తూ తమ సేవలు అందిస్తూన్నారనీ కొనియాడారు.ఈ నేపధ్యంలో ఆమెకు ఎమ్మెల్సీగా అవకాశం కల్పించటం ద్వారా తెలంగాణ ఉద్యమ వార సత్వానికి బీసీ సంక్షేమ,వైద్య,విద్యా రంగాలకు, చేనేతలకు సముచిత గౌరవం దక్కుతుందని ఆయన ఆశా భావం వ్యక్తం చేశారు.

శివంపేట అక్టోబర్ 26(విజన్ ఆంధ్ర): మండలంలోని నవాబుపేటలో బతుకమ్మ వేడుకల సందర్భంగా దళితులపై జరిగిన దాడులను తీవ్రంగా ఖండిస్తూ, బాధ్యులపై కఠిన చర్యలు తీసుకోవాలని కేవీపీఎస్ రాష్ట్ర కమిటీ సభ్యుడు అడివయ్య, సీపీఐ జిల్లా కార్యదర్శి మల్లేశం డిమాండ్ చేశారు. ఆదివారం బాధిత కుటుంబాలను పరామర్శించి, వారికి అండగా ఉంటామని భరోసా కల్పించారు. దాడులకు పాల్పడిన వారిని వెంటనే అరెస్టు చేసి బాధితులకు న్యాయం చేయాలని వారు కోరారు. ఈ ఘటనపై చట్ట ప్రకారం చర్యలు తీసుకుంటామని ఎస్ఐ మధుకర్ రెడ్డి తెలిపినట్లు పేర్కొన్నారు.

మెదక్ జిల్లా శివంపేట మండలం గూడూరు గ్రామానికి చెందిన ఓ రైతుకు భూమి విషయంలో ఇబ్బందులు ఎదురయ్యాయి. సర్వే నంబర్ 146లో ఉన్న 19 గుంటల భూమి ధరణి రికార్డుల్లో ప్రభుత్వ భూమిగా నమోదవడంతో రైతు ఆందోళన చెందుతున్నాడు. ఈ సమస్య పరిష్కారం కోసం రైతు అధికారుల చుట్టూ తిరుగుతున్నప్పటికీ, ఇప్పటివరకు న్యాయం జరగలేదని ఆవేదన వ్యక్తం చేసినట్లు సమాచారం. ప్రజావాణిలో సమస్యను అధికారుల దృష్టికి తీసుకెళ్లినప్పటికీ, భూమి రికార్డుల్లో మార్పు జరగకపోవడంతో రైతుకు ఇబ్బందులు కొనసాగుతున్నాయి. సంబంధిత అధికారులు భూమి రికార్డులను పరిశీలించి, వాస్తవాలను నిర్ధారించి, సమస్యను పరిష్కరించాలని రైతు కోరుతున్నాడు.

సంగారెడ్డి జిల్లా చౌటకూర్,పుల్కల్ మండలంలోని తహసీల్దార్ కార్యాలయం' కార్యక్రమానికి పిలుపు తెలంగాణలో రైతులు ఎదుర్కొంటున్న సమస్యలను పరిష్కరించాలని, ఎన్నికల సమయంలో ఇచ్చిన  హామీలను ప్రభుత్వం వెంటనే అమలు చేయాలని భారతీయ కిసాన్ సంఘ్ – తెలంగాణ డిమాండ్ చేసింది. ఈ మేరకు రైతుల హక్కుల సాధన కోసం 'చలో తహసీల్దార్ కార్యాలయం' కార్యక్రమానికి పిలుపునిచ్చింది.వరంగల్ డిక్లరేషన్‌లో ఇచ్చిన హామీల ప్రకారం రైతులందరికీ రూ.2 లక్షల రుణమాఫీ పూర్తి చేయాలని, వ్యవసాయానికి 24 గంటల ఉచిత విద్యుత్ అందించాలని, అన్ని పంటలకు మద్దతు ధరతో పాటు బోనస్ చెల్లించాలని కోరింది. రైతు భరోసా బకాయిలు, భూమిలేని వ్యవసాయ కూలీలకు ఆర్థిక సహాయం వెంటనే అందించాలని డిమాండ్ చేసింది.అలాగే రైతు బీమా, పంటల బీమా, పశువుల బీమా అమలు చేయాలని, పోడు, అసైన్డ్ భూములకు హక్కులు కల్పించాలని, రైతుల పట్టా భూములను 22-A జాబితా నుంచి తొలగించాలని కోరింది. సాగునీటి ప్రాజెక్టులను పూర్తి చేసి ప్రతి ఎకరాకు నీరందించాలని, వ్యవసాయ భూములకు రహదారి సౌకర్యం కల్పించాలని పేర్కొంది.అడవి జంతువుల నుంచి పంటలను రక్షించడంతో పాటు నష్టపోయిన రైతులకు పరిహారం చెల్లించాలని, ఎల్‌నినో ప్రభావంతో ఏర్పడే కరువు పరిస్థితులను ముందుగానే అంచనా వేసి రైతులను ఆదుకోవాలని డిమాండ్ చేసింది. మూతబడిన చక్కెర కర్మాగారాలను పునఃప్రారంభించి, చెరకు ధరను టన్నుకు రూ.5 వేలకు పెంచాలని కోరింది. ఈ కార్యక్రమంలో భారతీయ కిసాన్ సంగ్ జిల్లా నాయకులు యాదగిరి రెడ్డి గారు, నరసింహారెడ్డి గారు కనకా రెడ్డి గారు సదానంద రెడ్డి, మండల ప్రధాన కార్యదర్శి కిషన్ గౌడ్ తదితరులు పాల్గొన్నారు

చేగుంట :మెదక్ జిల్లా చేగుంట మండలంలోని ఇబ్రహీంపూర్ గ్రామంలో పురాతన బురుజుపై కాషాయం జండా ఎగరవేసిన శ్రీ శ్రీ వెంకటేశ్వర స్వామి దేవాలయ ధర్మకర్త కిషన్ రావు దేశముఖ్ మరియు గ్రామ పాలకవర్గ సభ్యులు జెండాను ఎగరవేశారు ఈ సందర్భంగా మాట్లాడుతూ ప్రతి సంవత్సరం దసరా పండుగ రోజున బురుజుపై కాషాయం జండా ఎగరవేయడం ఆనవాయితీగా వస్తుండు రావడంతో రాబోయే రోజుల్లో కూడా దసరా రోజు ఎగరవేస్తామని తెలిపారు చుట్టుపక్కల గ్రామాల ప్రజలకు గ్రామ ప్రజలకు మంచి పంటలు వండి ఆయురారోగ్యాలతో అష్ట ఐశ్వర్యాలతో వర్ధిల్లాలని కోరుతున్నామని తెలిపారు ఈ కార్యక్రమంలో ఆలయ ధర్మకర్త శ్రీ శ్రీ కిషన్ రావు దేశ్ముఖ్, గ్రామ సర్పంచ్ జ్యోతి రామ్ రెడ్డి మాజీ సర్పంచి రాములు రాజు శ్రీనివాస్ ఎల్లం నాగరాజు నవీన్ గ్రామ ప్రజలు తదితరులు ఈ కార్యక్రమంలో పాల్గొన్నారు

పాపన్నపేట అక్టోబర్, :నార్సింగిలో అమ్మవారికి 108 మంది ముత్తైదువులతో మంగళ హారతుల నీరాజనం సమర్పించారు. భక్తిశ్రద్ధలతో నిర్వహించిన ఈ కార్యక్రమం ఆధ్యాత్మిక వాతావరణాన్ని సంతరించుకుంది. ముత్తైదువులు సంప్రదాయబద్ధంగా అమ్మవారికి మంగళ హారతులు సమర్పించి, లోకకల్యాణం కోసం ప్రార్థించారు.అమ్మవారి అనుగ్రహం ప్రజలందరిపై ఉండాలని, గ్రామం సుభిక్షంగా ఉండాలని భక్తులు ఆకాంక్షించారు. భక్తులు అమ్మవారిని దర్శించుకుని ప్రత్యేక పూజల్లో పాల్గొన్నారు. 108 మంది ముత్తైదువులతో నిర్వహించిన ఈ మంగళ హారతుల కార్యక్రమం భక్తులను ఆకట్టుకుంది.