చౌటకూర్‌లో కొత్త విద్యుత్ స్తంభాలు, స్ట్రీట్ లైన్లకు థర్డ్ వైర్ ఏర్పాటు చేయాలని వినతి

చౌటకూర్,: సంగారెడ్డి జిల్లా చౌటకూర్ గ్రామంలో విద్యుత్ సౌకర్యాలను మరింత మెరుగుపరచాలని కోరుతూ గ్రామ సర్పంచ్ పార్కల రాంరెడ్డి ఆధ్వర్యంలో 'ప్రజావాణి' కార్యక్రమంలో అధికారులకు వినతిపత్రం సమర్పించారు. గ్రామంలోని పలు ప్రాంతాల్లో అవసరమైన చోట్ల కొత్త విద్యుత్ స్తంభాలతో పాటు, స్ట్రీట్ లైన్లకు థర్డ్ వైర్ ఏర్పాటు చేయాలని వారు కోరారు.ప్రజల అవసరాలకు అనుగుణంగా గ్రామంలో విద్యుత్ మౌలిక సదుపాయాలను అభివృద్ధి చేయాల్సిన అవసరం ఉందని సర్పంచ్ పేర్కొన్నారు. కొన్ని ప్రాంతాల్లో విద్యుత్ స్తంభాల కొరత కారణంగా ప్రజలు ఇబ్బందులు ఎదుర్కొంటున్నారని అధికారుల దృష్టికి తీసుకెళ్లారు. అలాగే స్ట్రీట్ లైన్లకు థర్డ్ వైర్ ఏర్పాటు చేయడం ద్వారా వీధి దీపాల నిర్వహణ, విద్యుత్ సరఫరా మరింత మెరుగుపడుతుందని వివరించారు.ప్రజల అవసరాలను పరిగణనలోకి తీసుకుని క్షేత్రస్థాయిలో సమస్యలను పరిశీలించాలని కోరారు. వీలైనంత త్వరగా కొత్త విద్యుత్ స్తంభాలను, స్ట్రీట్ లైన్లకు థర్డ్ వైర్‌ను మంజూరు చేసి పనులు ప్రారంభించాలని వినతిపత్రంలో విజ్ఞప్తి చేశారు. గ్రామస్తులకు నాణ్యమైన విద్యుత్ సౌకర్యం అందేలా తక్షణమే చర్యలు తీసుకోవాలని సంబంధిత అధికారులను సర్పంచ్ పార్కల రాంరెడ్డి కోరారు.ఈ కార్యక్రమంలో గ్రామ సర్పంచ్ పార్కల రాంరెడ్డి, మాజీ ఉప సర్పంచ్ రామగౌడ్, వార్డు సభ్యులు జైపాల్ రెడ్డి, ఎల్లయ్య, కృష్ణ, అభిలాష్, గంగారం, అశోక్, చక్రపాణి,గోరేమియా, మల్లికార్జున్, రాజేశ్వర్ గౌడ్ తదితరులు పాల్గొన్నారు.