‘రాహుల్ గాంధీ హెచ్చరించిన ఓట్ల చోరీ నిజమైంది’ : భట్టి విక్రమార్క 

హైదరాబాద్: దేశంలో పౌరుల ఓటు హక్కును కాపాడేందుకు కాంగ్రెస్ చేస్తున్న పోరాటానికి ప్రజాస్వామ్య శక్తులన్నీ కలిసిరావాలని తెలంగాణ ఉప ముఖ్యమంత్రి భట్టి విక్రమార్క పిలుపునిచ్చారు. ఓటర్ల జాబితా ప్రత్యేక సమగ్ర సవరణ (SIR) పేరుతో ఓట్ల తొలగింపుపై కాంగ్రెస్ లేవనెత్తుతున్న అభ్యంతరాల నేపథ్యంలో సోమవారం హైదరాబాద్‌లో కాంగ్రెస్ ఆధ్వర్యంలో నిరసన చేపట్టారు.  ఈ సందర్భంగా భట్టి విక్రమార్క మాట్లాడుతూ.. కాంగ్రెస్ అగ్రనేత రాహుల్ గాంధీ గతంలో పదేపదే ప్రస్తావించిన ‘ఓట్ల చోరీ’ అంశం ఇప్పుడు చర్చనీయాంశంగా మారిందన్నారు. SIR ప్రక్రియకు సంబంధించి ఎన్నికల కమిషన్‌లోని ఇతర కమిషనర్లు అభ్యంతరాలు వ్యక్తం చేశారనే వార్తల నేపథ్యంలో కేంద్ర ఎన్నికల సంఘం పూర్తి వివరణ ఇవ్వాలని కాంగ్రెస్ డిమాండ్ చేస్తోందని తెలిపారు. అయితే ఎన్నికల సంఘం మాత్రం SIRకు సంబంధించిన నిర్ణయాలు ఏకగ్రీవంగానే తీసుకున్నామని ఇప్పటికే వెల్లడించింది.  హైదరాబాద్‌లోని ఎన్నికల సంఘం కార్యాలయం ఎదుట జరిగిన నిరసనలో భట్టి విక్రమార్క చేతిలో భారత రాజ్యాంగ ప్రతిని పట్టుకుని పాల్గొన్నారు. పీసీసీ అధ్యక్షుడు మహేష్ కుమార్ గౌడ్, మంత్రులు శ్రీధర్ బాబు, పొన్నం ప్రభాకర్, మాజీ ఎంపీ మహమ్మద్ అజారుద్దీన్ తదితర కాంగ్రెస్ నాయకులు, కార్యకర్తలు నిరసనలో పాల్గొన్నారు. అనంతరం ఎన్నికల సంఘం అధికారులకు వినతిపత్రం సమర్పించారు. సీఈసీ జ్ఞానేశ్ కుమార్ తక్షణమే రాజీనామా చేయాలని కాంగ్రెస్ డిమాండ్ చేసింది. దేశవ్యాప్తంగా సెప్టెంబర్ 28న నిరసనలు చేపట్టాలని ఏఐసీసీ పిలుపునిచ్చిన నేపథ్యంలో తెలంగాణలోనూ జిల్లా కేంద్రాల్లో ఆందోళనలు నిర్వహిస్తున్నారు.  భట్టి విక్రమార్క మాట్లాడుతూ, రాజ్యాంగం కల్పించిన ఓటు హక్కు ప్రజాస్వామ్యానికి కీలకమని అన్నారు. ప్రతి అర్హత కలిగిన పౌరుడి ఓటు హక్కు పరిరక్షించబడే వరకు కాంగ్రెస్ తన పోరాటాన్ని కొనసాగిస్తుందని స్పష్టం చేశారు. ప్రజాస్వామ్యం, రాజ్యాంగంపై విశ్వాసం ఉన్న రాజకీయ పార్టీలు, ప్రజాస్వామ్య శక్తులు ఈ అంశంపై కలిసి రావాలని ఆయన కోరారు. కాగా, జ్ఞానేశ్ కుమార్ ప్రస్తుతం భారత ఎన్నికల సంఘం ప్రధాన ఎన్నికల కమిషనర్‌గా ఉన్నారు. ఆయన 2025 ఫిబ్రవరి 19న 26వ సీఈసీగా బాధ్యతలు స్వీకరించారు.