విశాల పరపతి సంఘం అధ్యక్ష పీఠం ఓసీలకే!

అక్కన్నపేట,  : హుస్నాబాద్ విశాల పరపతి సంఘం అధ్యక్ష పదవిని ఈసారి ఓసీలకు కేటాయించాలని ఓసీ సంఘాల నాయకులు రాష్ట్ర రవాణా, బీసీ సంక్షేమ శాఖ మంత్రి, హుస్నాబాద్ ఎమ్మెల్యే పొన్నం ప్రభాకర్‌కు విజ్ఞప్తి చేశారు. ఓసీలకు సముచిత ప్రాతినిధ్యం కల్పించాలని కోరుతూ త్వరలో మంత్రి క్యాంపు కార్యాలయంలో గానీ, రాష్ట్ర మంత్రి కార్యాలయంలో గానీ కలిసి వినతిపత్రం సమర్పించనున్నట్లు తెలిపారు. హుస్నాబాద్ విశాల పరపతి సంఘం అధ్యక్ష పదవిలో ఓసీలకు తగిన ప్రాతినిధ్యం దక్కడం లేదని ఓసీ సంఘాల నాయకులు పేర్కొన్నారు. గతంలో పలు సందర్భాల్లో ఇతర సామాజిక వర్గాలకు చెందిన వారు అధ్యక్ష పదవిని చేపట్టారని, ఓసీలకు మాత్రం అవకాశం లభించలేదని తెలిపారు. కాంగ్రెస్ ప్రభుత్వ హయాంలోనూ ఓసీ సామాజిక వర్గాలకు చెందిన రెడ్డి, వెలమ, వైశ్య తదితరులకు అధ్యక్ష పదవిలో అవకాశం కల్పించలేదని పేర్కొన్నారు. ప్రత్యక్ష ఎన్నికల్లోనూ ఓసీలకు తగిన ప్రాతినిధ్యం లభించని పరిస్థితి కొనసాగుతోందని వారు తెలిపారు. హుస్నాబాద్ నియోజకవర్గ కేంద్రంలోని సామాజిక పరిస్థితులను పరిగణనలోకి తీసుకుని ఈసారి విశాల పరపతి సంఘం అధ్యక్ష పదవిని ఓసీలకు కేటాయించాలని కోరారు. ఓసీలకు గుర్తింపు, సముచిత ప్రాతినిధ్యం కల్పించేలా మంత్రి పొన్నం ప్రభాకర్ చొరవ తీసుకోవాలని ఓసీ సంఘాల నాయకులు విజ్ఞప్తి చేశారు. ఈ అంశంపై ఓసీ సంఘాల ప్రతినిధులు మంత్రిని కలిసి తమ డిమాండ్లను వివరించి అధికారికంగా వినతిపత్రం సమర్పించనున్నట్లు తెలిపారు.