ఆయిల్‌పామ్ తోటలను పరిశీలించిన ఉద్యానశాఖ అధికారులు

చౌటకూర్, : చౌటకూర్ మండలంలోని శివంపేట, చౌటకూర్ తదితర గ్రామాల్లో కొత్తగా సాగు చేసిన ఆయిల్‌పామ్ తోటలను జిల్లా ఉద్యాన, పట్టుపరిశ్రమ శాఖాధికారి పి. సోమేశ్వరరావు, మండల ఉద్యాన అధికారి సమత శనివారం సందర్శించి పరిశీలించారు. ఈ సందర్భంగా ఆయిల్‌పామ్ సాగు చేస్తున్న రైతులకు పలు సూచనలు, సలహాలు అందించారు. ఆయిల్‌పామ్ తోటల్లో ఎరువులు, పురుగుమందుల వినియోగంపై రైతులకు అవగాహన కల్పించడంతో పాటు కలుపు యాజమాన్యం, డ్రిప్‌ నిర్వహణ, అంతర పంటల సాగు తదితర అంశాలపై వివరించారు. తోటలను శాస్త్రీయ పద్ధతుల్లో నిర్వహిస్తూ మొక్కల పెరుగుదలకు అవసరమైన చర్యలు చేపట్టాలని సూచించారు. ఉద్యానశాఖ ద్వారా అమలు చేస్తున్న పథకాలను రైతులు సద్వినియోగం చేసుకోవాలని జిల్లా ఉద్యాన, పట్టుపరిశ్రమ శాఖాధికారి పి. సోమేశ్వరరావు కోరారు. ఆయిల్‌పామ్ సాగు విస్తరణ పథకంలో భాగంగా ఎకరాకు ఆయిల్‌పామ్ మొక్కలకు రూ.11,600, డ్రిప్‌ పరికరాలకు రూ.20,000, ఎరువులు, పురుగుమందులు, అంతర పంటల సాగుకు కలిపి రూ.16,800 రాయితీ అందిస్తున్నట్లు తెలిపారు. ప్రస్తుతం ఆయిల్‌పామ్ టన్ను ధర రూ.24,025గా ఉందని అధికారులు తెలిపారు. ప్రస్తుత వాతావరణ మార్పులను దృష్టిలో ఉంచుకుని రైతులు వైవిధ్య పంటల సాగు చేపట్టాలని, నేల ఆరోగ్యం, పర్యావరణ పరిరక్షణతో పాటు జీవ వైవిధ్యాన్ని కాపాడే విధంగా వ్యవసాయ పద్ధతులను అవలంబించాలని సూచించారు.ఆయిల్‌పామ్ సాగుకు ప్రభుత్వం అందిస్తున్న రాయితీలు, ఇతర సౌకర్యాలను రైతులు సద్వినియోగం చేసుకోవాలని, ఇతర రైతులు కూడా ఈ అవకాశాన్ని వినియోగించుకుని ఆయిల్‌పామ్ సాగు చేపట్టాలని పి. సోమేశ్వరరావు సూచించారు.ఈ కార్యక్రమంలో ఫినోలెక్స్ డ్రిప్ కంపెనీ అధికారులు మహేష్, రాజకుమార్, రైతులు కిష్టయ్య, మౌలానా తదితరులు పాల్గొన్నారు.