‘ఇందిరమ్మ’ పేరుతో దర్జాగా ఇసుక దోపిడీ.. మంజీరాను తోడేస్తున్న ఇసుకాసురులు..

నిజామాబాద్  : ఇందిరమ్మ ఇళ్ల పేరుతో మంజీరా నదీ పరీవాహక ప్రాంతంలో ఇసుక దోపిడీ యథేచ్ఛగా కొనసాగుతోంది. పోతంగల్​ మండలంలో ప్రభుత్వ నిబంధనలను బేఖాతరు చేస్తూ అక్రమార్కులు రాత్రింబవళ్లు ఇసుకను తోడేస్తున్నారు. రూ.కోట్లల్లో ఆర్జిస్తున్నారు.
పోతంగల్​ మండలంలో..
బోధన్​ నియోజకవర్గంలోని పోతంగల్​ మండలం లో మంజీరా పరీవాహక ప్రాంతం ఇసుకాసురులకు కాసుల వర్షం కురిపిస్తోంది. ఈ ఇసుక రీచ్​లలో అడ్డగోలుగా తవ్వేస్తూ రూ.కోట్లు గడిస్తున్నారు. మంజీరాను నమ్ముకుని ఈ ప్రాంతంలో సాగు చేసుకుంటున్న రైతుల నోట్లో మట్టిగొడుతున్నారు. ఈ ఇసుక మాఫియాకు రెవెన్యూశాఖ అండదండలు ఉన్నాయని పలువురు ఆరోపిస్తున్నారు.
ఇందిరమ్మ పేరుతో.. రైస్​మిల్లులలో డంప్​..
కొందరు వ్యక్తులు ఇందిరమ్మ ఇళ్ల నిర్మాణం పేరుతో అనుమతులు తీసుకుని అడ్డగోలుగా ట్రాక్టర్లలో మంజీరా నుంచి ఇసుకును తోడుతున్నారు. ఈ ఇసుకను రైస్​మిల్లులలో డంప్​ చేస్తున్నారు. అనంతరం రాత్రివేళ్లలో అక్కడి నుంచి ఇతర ప్రాంతాలకు తరలిస్తున్నారు. ఈ తతంగమంతా అధికారులకు తెలిసినా చర్యలు తీసుకోవట్లేదని పలువురు ఆరోపిస్తున్నారు.
 సుంకిని, కొడిచెర్ల మీదుగా..
పోతంగల్​ మండలంలో కల్లూరు నుంచి పోతంగల్​, కొడిచెర్ల, హంగర్గ, కారేగాం, సుంకిని వరకు సువిశాలమైన మంజీరా పరివాహక ప్రాంతం ఉంది. దీంట్లో కొడిచెర్లలో మాత్రం రెవెన్యూ రికార్డుల ప్రకారం 600 ఎకరాల పరీవాహక ప్రాంతం ఉంది. పోతంగల్​ మండలంలోని రాంగంగానగర్​లో నిర్మిస్తున్న ఇంటిగ్రేటెడ్​ స్కూల్ నిర్మాణాన్ని ఇటీవల కలెక్టర్ పరిశీలించారు. ఈ నిర్మాణానికి ఇసుక రవాణను అధికారికంగా అనుమతించారు. దీంతో టీజీఎండీసీ ఆధ్వర్యంలో టిప్పర్ల ద్వారా ఇసుక రవాణా జరుగుతోంది. ఇదే క్రమంలో ఇతరులు సైతం రాత్రివేళల్లో ఇసుక అక్రమ రవాణా చేస్తున్నారని పలువురు ఆరోపిస్తున్నారు.
రాత్రింబవళ్లు యథేచ్ఛగా..
పోతంగల్​ మండల పరిధిలో ఇసుక రవాణా రాత్రీపగలు కొనసాగుతోంది. గతంలో అనేకసార్లు ఆయా గ్రామాల ప్రజలు ఈ టిప్పర్లు, ట్రాక్టర్లను అడ్డుకుని నిరసన వ్యక్తం చేసినప్పటికీ కొన్నిరోజులు ఆగిన ఈ దందా మళ్లీ ఎప్పటిలాగే కొనసాగుతోంది. గ్రామస్తులు అడ్డుచెప్పినప్పుడు ఉదయం, మధ్యాహ్నం ఆగిన రవాణా.. రాత్రిళ్లలో ఇష్టారాజ్యంగా సాగుతోంది. ఈ ఇసుక రవాణాను పూర్తిస్థాయిలో అడ్డుకోవడంలో అధికారులు విఫలమవుతున్నారనే ఆరోపణలు వినిపిస్తున్నాయి. ఏకంగా 11 ట్రాక్టర్లు సీజ్​.. సుంకిని గ్రామ శివారు నుంచి ఈనెల 4వ తేదీన రాత్రివేళ ఇసుకను అక్రమంగా తరలిస్తున్నట్లు సమాచారం అందుకున్న పోలీసులు దాడులు నిర్వహించారు. ఈ క్రమంలో మూడు ఇసుకతో నిండిన ట్రాక్టర్లను, అలాగే ఇసుకను నింపుకునేందుకు సిద్ధంగా ఉన్న మరో 8 ట్రాక్టర్లను సీజ్​ చేశారు. పట్టుకున్న ట్రాక్టర్లను కోటగిరి పోలీస్​స్టేషన్​కు తరలించారు. ట్రాక్టర్లపైనా, వాటి డ్రైవర్లు, ఓనర్లపై కేసు నమోదు చేసి కోర్టుకు పంపినట్లు ఎస్సై శ్రీనివాస్​ యాదవ్​ తెలిపారు. అయితే పోలీసులు చర్యలు తీసుకుంటున్న రెవెన్యూశాఖలో కిందిస్థాయి సిబ్బంది అండతో ఈ దందా విచ్చలవిడిగా సాగుతోందని విమర్శలు వినిపిస్తున్నాయి.
ఉపేక్షించేది లేదు..