ఆర్టీసీ కార్మికుల భవిష్యత్తుపై ఆలోచించాలి

అక్కన్నపెట్ : ఆర్టీసీ కార్మికులు తమ భవిష్యత్తు, ఉద్యోగ భద్రత, సంస్థ మనుగడకు సంబంధించిన అంశాలపై సమగ్రంగా ఆలోచించి నిర్ణయం తీసుకోవాలని ఏఐటీయూసీ రాష్ట్ర కార్యదర్శి టేకుమల్ల సమ్మయ్య సూచించారు. వివిధ కార్మిక సంఘాల గత చరిత్ర, కార్మిక సమస్యలపై అవి అనుసరించిన విధానాలను పరిశీలించాలని ఆయన కోరారు. ఆర్టీసీని ప్రభుత్వంలో విలీనం చేస్తామని అధికారంలోకి వచ్చిన వెంటనే స్పష్టమైన ప్రకటన చేయలేదని, జేఏసీ ఆధ్వర్యంలో జరిగిన కార్మిక పోరాటాల అనంతరం ఈ అంశం ముందుకు వచ్చిందని సమ్మయ్య పేర్కొన్నారు. 2019లో జరిగిన ఆర్టీసీ సమ్మె, 2023లో జరిగిన కార్మిక సమ్మెల సందర్భంగా వివిధ సంఘాల పాత్రను కార్మికులు పరిశీలించాలని అన్నారు. సంఘాలు బలహీనంగా ఉన్న సమయంలో ఆర్టీసీ ఎంప్లాయీస్ యూనియన్ రాష్ట్ర మహాసభలు నిర్వహించి కార్మికుల్లో ధైర్యాన్ని నింపిందని, అనంతరం జేఏసీ ఏర్పాటు చేసి ఉద్యమ కార్యాచరణ చేపట్టిందని తెలిపారు. 1953 నుంచి ఎంప్లాయీస్ యూనియన్ నిర్వహించిన కార్మిక ఉద్యమాల చరిత్రను కూడా పరిగణనలోకి తీసుకోవాలని సూచించారు. కొన్ని యూనియన్లు రాజకీయ ప్రయోజనాల కోసం కూటములు ఏర్పాటు చేస్తున్నాయన్న ఆరోపణలు ఉన్నాయని, మరోవైపు కార్మికుల సమస్యల పరిష్కారం కోసం సంఘాలు కలిసి పనిచేస్తున్నాయని సమ్మయ్య పేర్కొన్నారు. భవిష్యత్తులో కార్మికులకు సమస్యలు ఎదురైనప్పుడు ఎవరు అండగా నిలుస్తారనే అంశాన్ని కూడా ఉద్యోగులు పరిశీలించాలని కోరారు. ఆర్టీసీని ప్రభుత్వంలో విలీనం చేయాలన్న డిమాండ్‌పై ఆయా సంఘాల స్పష్టమైన వైఖరిని పరిశీలించాలని, గుర్తింపు సంఘం ఎన్నికల నేపథ్యంలో యూనియన్ల విధానాలు, గత పోరాటాలు, భవిష్యత్ కార్యాచరణపై అవగాహనతో నిర్ణయం తీసుకోవాలని టేకుమల్ల సమ్మయ్య సూచించారు.