ఎల్‌నినో ప్రభావంపై సీఎస్ సమీక్ష..

హైదరాబాద్: తెలంగాణలో ఎల్‌నినో ప్రభావంతో ఏర్పడిన పరిస్థితులపై సచివాలయంలో రాష్ట్ర ప్రభుత్వ ప్రధాన కార్యదర్శి  సంజయ్ జాజు, ఐఏఎస్ సమీక్ష నిర్వహించారు. రాష్ట్రంలోని వర్షపాతం పరిస్థితులు, వ్యవసాయం, తాగునీరు, భూగర్భజలాలు తదితర అంశాలపై అధికారులతో చర్చించారు. జూన్‌ నుంచి సెప్టెంబర్‌ వరకు కొనసాగిన నైరుతి రుతుపవన కాలంలో నమోదైన వర్షపాతంతో పాటు 12 కీలక అంశాలను పరిగణనలోకి తీసుకుని సమగ్ర కరువు అంచనా నివేదికను సిద్ధం చేయాలని అధికారులను సీఎస్ ఆదేశించారు. ఈ నివేదికను అక్టోబర్‌ చివరి నాటికి పూర్తి చేయాలని సూచించారు. కరువు పరిస్థితుల అంచనాలో ప్రణాళిక, రెవెన్యూ, భూగర్భజలాలు, వ్యవసాయం, పంచాయతీరాజ్, గ్రామీణ తాగునీటి సరఫరా తదితర శాఖల నుంచి అవసరమైన సమాచారాన్ని సేకరించాలని ఆదేశించారు. జిల్లాల వారీగా వర్షపాతం లోటు, సాగు పరిస్థితులు, నీటి లభ్యత, భూగర్భజలాల స్థాయి,పంటలపై ప్రభావం వంటి అంశాలను సమగ్రంగా విశ్లేషించాలని సూచించారు. ఎల్‌నినో ప్రభావం కారణంగా రాష్ట్రంలో ఏర్పడిన పరిస్థితులపై ప్రభుత్వం నిర్వహించనున్న అఖిలపక్ష సమావేశానికి కూడా ఈ సమగ్ర నివేదిక ప్రాతిపదికగా ఉపయోగపడనుంది. వివిధ శాఖల నుంచి ఖచ్చితమైన గణాంకాలను సేకరించి వాస్తవ పరిస్థితులను ప్రతిబింబించేలా నివేదిక రూపొందించాలని సీఎస్ అధికారులకు సూచించారు.