బల్మూర్ లో రూ.146.71 కోట్ల రహదారి పనులకు శంకుస్థాపన

అచ్చంపేట నియోజకవర్గంలో మూడు HAM రోడ్లకు శ్రీకారం

నాగర్ కర్నూలు : జిల్లా బల్మూర్ మండలంలో రూ.146.71 కోట్ల వ్యయంతో చేపట్టనున్న మూడు ప్రధాన రహదారి పనులకు రాష్ట్ర రోడ్లు భవనాల శాఖ మంత్రి కోమటిరెడ్డి వెంకటరెడ్డి, ఎక్సైజ్, పర్యాటక శాఖ మంత్రి జూపల్లి కృష్ణారావు శంకుస్థాపన చేశారు. వనపర్తి-1 ప్యాకేజీ కింద అచ్చంపేట ఫేజ్-1 లో భాగంగా ఈ రహదారి పనులను చేపట్టనున్నారు. ఈ సందర్భంగా మంత్రులు మాట్లాడుతూ అచ్చంపేట నియోజకవర్గంలో రవాణా సౌకర్యాలను మెరుగుపరచడమే లక్ష్యంగా ప్రభుత్వం ఈ పనులకు నిధులు మంజూరు చేసిందన్నారు.

మూడు రహదారి పనుల వివరాలు:

1. అమ్రాబాద్ - తొల్పలపల్లి రహదారి: రూ.32.99 కోట్లతో పదర, వాంకేశ్వరం, చిట్లముకుంట, ఉడిమిల్ల, ఇప్పలపల్లి మీదుగా 34.20 కి.మీ మేర రహదారిని బలోపేతం చేయనున్నారు.

2. బల్మూర్ - నాగర్ కర్నూల్ పీడబ్ల్యూడీ రహదారి:* రూ.35.71 కోట్లతో బల్మూర్, గోడల్, తుమ్మన్ పేట మీదుగా వెళ్లే రహదారిని రెండు లేన్లుగా విస్తరించనున్నారు.

3. అచ్చంపేట - రాకొండ రహదారి:* రూ.78.01 కోట్లతో ఉప్పునుంతల, మొల్గర, పెద్దాపూర్, మామిళ్లపల్లి మీదుగా రాకొండ వరకు రెండు లేన్ల రహదారిగా విస్తరించనున్నారు.

ఈ మూడు రహదారి పనులు పూర్తయితే అచ్చంపేట నియోజకవర్గంలో రవాణా సౌకర్యాలు గణనీయంగా మెరుగుపడతాయని అధికారులు తెలిపారు. ఈ కార్యక్రమంలో స్థానిక ఎమ్మెల్యే, ప్రజాప్రతినిధులు, ఆర్ అండ్ బి అధికారులు పాల్గొన్నారు.

About The Author

Vision Andhra Telugu Daily

నిజాయితీ, నిష్పాక్షికత, విశ్వసనీయత అనే మూడు విలువలను ఆధారంగా చేసుకుని పనిచేస్తున్న వార్తా సంస్థ. సమాజంలో జరుగుతున్న ప్రతి ముఖ్యమైన పరిణామాన్ని వేగంగా, ఖచ్చితంగా, బాధ్యతాయుతంగా పాఠకులకు అందించడం మా ప్రధాన లక్ష్యం.