రేవంత్ రెడ్డి రాజీనామా చేయాలి: బీజేపీ డిమాండ్

​మల్యాల,  : జగిత్యాల జిల్లా మల్యాల మండల కేంద్రంలో నిర్వహించిన మీడియా సమావేశంలో బీజేపీ జిల్లా ఉపాధ్యక్షులు బింగి వేణు మాట్లాడారు. ​రాష్ట్రంలో విద్యా వ్యవస్థ పూర్తిగా కుప్పకూలిందని, విద్యార్థులే హంతకులుగా మారుతున్న దారుణ పరిస్థితులకు నైతిక బాధ్యత వహిస్తూ విద్యాశాఖను పర్యవేక్షిస్తున్న ముఖ్యమంత్రి రేవంత్ రెడ్డి వెంటనే తన పదవికి రాజీనామా చేయాలని డిమాండ్ చేశారు. ​పాఠశాల ప్రిన్సిపాల్ రూపా రెడ్డి హత్య కేసులో విద్యార్థులే నిందితులుగా ఉండటం తీవ్ర దిగ్భ్రాంతికరమని, విద్యాసంస్థల్లో శాంతిభద్రతలు క్షీణించాయనడానికి ఇదే నిదర్శనమని అన్నారు. ఈ ఘటనపై సమగ్ర విచారణ జరిపించి, విద్యార్థుల్లో నేర ప్రవృత్తి పెరగడానికి గల కారణాలను వెలుగులోకి తేవాలని కోరారు.​గతంలో నీట్ పరీక్ష అంశంపై కేంద్ర మంత్రి రాజీనామా చేయాలంటూ ధర్నాలు చేసిన కాంగ్రెస్ నేతలు, ఇప్పుడు రాష్ట్రంలో ఇంతటి దారుణం జరిగితే ఏ బాధ్యత తీసుకుంటా రని నిలదీశారు. కేంద్రానికి ఒక విధానం, రాష్ట్రానికి మరో విధానమా అని ప్రశ్నించారు. ప్రభుత్వం ద్వంద్వ ప్రమాణాలు వీడి, విద్యాసంస్థల్లో భద్రతను పటిష్టం చేయాలని, విద్యార్థులకు కౌన్సెలింగ్ మరియు క్రమశిక్షణ చర్యలు చేపట్టాలని స్పష్టం చేశారు.

​ఈ  సమావేశంలో బీజేపీ మండల అధ్యక్షులు గాజుల మల్లేశం, మాజీ ఎంపీటీసీ రవి, మ్యాదంపల్లి ఉప సర్పంచ్ మల్లేష్ యాదవ్ తదితరులు పాల్గొన్నారు.