గురుపూర్ణిమ వేడుకలు ఘనంగా నిర్వహించిన శ్రీ అక్షర పాఠశాల

ముధోల్ : గురువు జీవితంలో వెలుగునిచ్చే దైవస్వరూపుడని చాటి చెబుతూ ముధోల్ పట్టణంలోని శ్రీ అక్షర పాఠశాలలో బుధవారం గురుపూర్ణిమ వేడుకలు ఘనంగా నిర్వహించారు. ఈ సందర్భంగా విద్యార్థులు తమ గురువులకు పాదపూజ చేసి పూలు సమర్పించి ఘనంగా సన్మానించారు. కార్యక్రమంలో విద్యార్థులు మాట్లాడుతూ, "సార్... మీరు మందలించినప్పుడు బాధపడ్డాం. కానీ ఈ రోజు మీ బోధన వల్లే ఈ స్థాయికి చేరుకున్నామని అర్థమైంది" అంటూ తమ గురువుల పట్ల కృతజ్ఞతను వ్యక్తం చేయడంతో అక్కడున్న వారంతా భావోద్వేగానికి గురయ్యారు. ఈ కార్యక్రమానికి ముఖ్య అతిథిగా హాజరైన పాఠశాల డైరెక్టర్ జే. సుభాష్ మాట్లాడుతూ, ఉపాధ్యాయ వృత్తి గొప్పతనాన్ని వివరించారు. ఒక ఇంజనీర్‌, డాక్టర్‌, కలెక్టర్‌, శాస్త్రవేత్తను తీర్చిదిద్దేది గురువేనని, దేశ భవిష్యత్తుకు పునాదులు తరగతి గదిలోనే వేయబడతాయని అన్నారు. విద్యార్థులు గురువులను గౌరవించడం ద్వారానే నిజమైన విద్య సార్థకమవుతుందని, గురువులను గౌరవించే విద్యార్థులే రేపటి ఆదర్శ పౌరులుగా ఎదుగుతారని పేర్కొన్నారు. అనంతరం వ్యాసమహర్షి ప్రాముఖ్యత, గురుపూర్ణిమ చరిత్రను విద్యార్థులకు వివరించారు. కార్యక్రమం ముగింపులో పాఠశాల యాజమాన్యం ఉపాధ్యాయులకు శాలువాలు కప్పి జ్ఞాపికలు అందజేసి ఘనంగా సన్మానించింది. అనంతరం విద్యార్థులు, ఉపాధ్యాయులకు మిఠాయిలు పంపిణీ చేశారు. ఈ కార్యక్రమంలో పాఠశాల ఉపాధ్యాయులు, సిబ్బంది, విద్యార్థులు, తల్లిదండ్రులు పాల్గొని గురుపూర్ణిమ వేడుకలను విజయవంతం చేశారు.