గజ్వేల్ లో గంజాయి విక్రయిస్తున్న ముఠా అరెస్టు

గజ్వేల్ / సిద్దిపేట జిల్లా :  సిద్దిపేట జిల్లా గజ్వేల్ పట్టణంలో అక్రమంగా గంజాయి విక్రయిస్తున్న నలుగురు వ్యక్తులను అరెస్ట్ చేసి, వారి వద్ద నుండి 750 గ్రాముల గంజాయిని స్వాధీనం చేసుకున్నట్లు గజ్వేల్ ఇన్స్పెక్టర్ రవికుమార్ ప్రకటనలో తెలిపారు. తేదీ 02 సెప్టెంబర్ 2026 న ఇన్స్పెక్టర్  రవికుమార్ కి శ్రీగిరిపల్లి గ్రామ శివారులోని ఓపెన్ ప్లేస్‌లో కొంతమంది వ్యక్తులు గంజాయిని ఇతరులకు విక్రయిస్తున్నట్లు నమ్మదగిన సమాచారం అందింది. ఇన్స్పెక్టర్ ఆదేశాల మేరకు ఎస్సై మల్లారెడ్డి సిబ్బందితో కలిసి మధ్యాహ్నం సుమారు 01:00 గంటల సమయంలో పెట్రో కార్ ద్వారా ఘటనా స్థలానికి చేరుకున్నారు. పోలీసులను చూసి అక్కడ ఉన్న వారిలో ఒకరు పారిపోగా, మిగిలిన నలుగురు వ్యక్తులను పోలీసులు చాకచక్యంగా పట్టుకున్నారు. పట్టుబడిన నిందితుల వివరాలు: టంగుటూరి శివానంద్ (తండ్రి: శంకర్, నివాసం: రామాలయం స్ట్రీట్, గజ్వేల్), దయ్యాల విజయ్ (వయస్సు: 23 సంవత్సరాలు, తండ్రి: భీమయ్య, నివాసం: ఎస్సీ కాలనీ, గజ్వేల్ టౌన్), పోతరాజు అజయ్ (వయస్సు: 20 సంవత్సరాలు, తండ్రి: మల్లేష్, నివాసం: పిడిచెడ్ గ్రామం), చిక్కుడు అనిల్ (తండ్రి: గోపాల్, నివాసం: చిక్కుడు బస్తి, గజ్వేల్ పట్టణం), పారిపోయిన వ్యక్తి వివరాలు: తేజ (నివాసం: డబుల్ బెడ్ రూమ్, గజ్వేల్ పట్టణం) పట్టుబడిన నిందితులను పోలీస్ స్టేషన్‌కు తరలించి విచారించగా, వీరు కొంతకాలంగా జగదేవ్‌పూర్ మండలం, మునిగడప గ్రామానికి చెందిన దేవుని నవీన్ అనే వ్యక్తి వద్ద నుంచి అక్రమంగా గంజాయిని కొనుగోలు చేస్తున్నట్లు నిందితులు అంగీకరించారు. ఆ గంజాయిని చిన్న చిన్న ప్యాకెట్లుగా తయారు చేసి గజ్వేల్ పట్టణంలోని పలువురికి విక్రయిస్తున్నట్లు తేలింది. నిందితుల వద్ద నుంచి సుమారు 750 గ్రాముల గంజాయిని పోలీసులు స్వాధీనం చేసుకున్నారు. ఈ నేరంలో భాగస్వాములైన ఆరుగురు నిందితులపై కేసు నమోదు చేసి, పట్టుబడిన నలుగురిని అర్ధరాత్రి రిమాండ్‌కు తరలించారు. పారిపోయిన నిందితుడు తేజ మరియు గంజాయి సరఫరాదారు దేవుని నవీన్ ల కోసం గాలింపు చర్యలు వేగవంతం చేశారు. చట్టవిరుద్ధంగా గంజాయి, ఇతర మత్తు పదార్థాలు విక్రయించినా లేదా వినియోగించినా వారిపై కఠిన చర్యలు తప్పవని ఇన్స్పెక్టర్ హెచ్చరించారు.