మున్సిపాలిటీలో ‘హుకుం’ ఎవరిది..?

సూర్యాపేట : సూర్యాపేట మున్సిపాలిటీలో అధికారిక వ్యవస్థకు సమాంతరంగా మరో ‘పెత్తనం’ నడుస్తోందా..? మున్సిపల్ ఉద్యోగులపై అధికారిక హోదా లేని వ్యక్తుల ఆదేశాలు చెల్లుబాటు అవుతున్నాయా..? వీధిలైట్ల వ్యవహారంలో మున్సిపల్ ఎలక్ట్రిషియన్‌తో చైర్‌పర్సన్ భర్త మాట్లాడినట్లు చెబుతున్న వైరల్ ఆడియో ఈ ప్రశ్నలను మరింత తీవ్రం చేస్తోంది.ఆడియోలో ‘‘నేను ఇస్తున్నా.. నువ్వు చేయాలి’’, ‘‘అధికారి ఎవరు..?’’ అంటూ ఉద్యోగిని ప్రశ్నించినట్లు ప్రచారం జరుగుతోంది. అంతేకాకుండా ఉద్యోగిని అవమానకరమైన పదజాలంతో సంబోధించినట్లు ఆరోపణలు రావడం మున్సిపల్ వర్గాల్లో కలకలం రేపుతోంది.
పదవి లేని వ్యక్తికి ఇంత అధికారం ఎవరిచ్చారు..?
మున్సిపల్ ఉద్యోగులకు విధులు కేటాయించేది అధికారులా..? లేక పాలకవర్గానికి చెందిన వ్యక్తులా..? అనే ప్రశ్న ఇప్పుడు ప్రధానంగా మారింది.చైర్‌పర్సన్ భర్తకు మున్సిపల్ పరిపాలనలో అధికారిక హోదా లేకుంటే ఉద్యోగికి నేరుగా ఆదేశాలు ఇచ్చే పరిస్థితి ఎలా వచ్చింది..? ‘‘నేను ఇస్తున్నా.. నువ్వు చేయాలి’’ అనే స్థాయిలో మాట్లాడే అధికారం ఎక్కడి నుంచి వచ్చింది..? దీనిపై అధికారులు ఎందుకు స్పష్టత ఇవ్వడం లేదనే ప్రశ్నలు వెల్లువెత్తుతున్నాయి.
ఉద్యోగిని ‘యూజ్‌లెస్’ అనడం ఏ సంస్కృతి..?
విధుల్లో ఉన్న ఉద్యోగితో గౌరవంగా మాట్లాడాల్సిన బాధ్యత ప్రతి ఒక్కరిపైనా ఉంటుంది. కానీ వైరల్ ఆడియోలో ఉద్యోగిని అవమానకరమైన పదజాలంతో సంబోధించినట్లు ఆరోపణలు వస్తున్నాయి.ఒక ఉద్యోగి తప్పు చేస్తే నిబంధనల ప్రకారం చర్య తీసుకునే అధికారం అధికారులకు ఉంది. కానీ బెదిరించడం, దూషించడం, అవమానించడం ఎవరి అధికార పరిధిలోకి వస్తుంది..? ఇదే విషయాన్ని దళిత సంఘాల ప్రతినిధులు ప్రశ్నిస్తున్నారు. కింది స్థాయి ఉద్యోగి అయినంత మాత్రాన అతని ఆత్మగౌరవాన్ని కించపరిచే హక్కు ఎవరికీ లేదని వారు స్పష్టం చేస్తున్నారు.
దళిత ఉద్యోగిపై ఒత్తిడి ఆరోపణలు.. సంఘాల ఆగ్రహం..
మున్సిపల్ కార్మికులు పట్టణ ప్రజలకు నిత్యం సేవలందిస్తున్నారని దళిత సంఘాలు పేర్కొంటున్నాయి. వారిపై రాజకీయ ఒత్తిళ్లు, బెదిరింపులు ఉంటే అది ఉద్యోగి సమస్యగా మాత్రమే కాకుండా సామాజిక గౌరవానికి సంబంధించిన అంశంగా చూడాలని కోరుతున్నాయి. దళిత ఉద్యోగిని అవమానించేలా వ్యాఖ్యలు చేసినట్లు ఆరోపణలు నిజమైతే సంబంధిత వ్యక్తిపై అధికారులు నిబంధనల ప్రకారం చర్యలు తీసుకోవాలని డిమాండ్ చేస్తున్నారు.
ఆడియో వైరల్‌.. అధికారులు మాత్రం ‘మౌనం’ ఎందుకు..?
ఇక్కడే అసలు ప్రశ్న మొదలవుతోంది.
సోషల్ మీడియాలో ఆడియో వైరల్ అవుతోంది.
ఉద్యోగిపై దురుసు వ్యాఖ్యల ఆరోపణలు వస్తున్నాయి.
అధికారిక హోదాపై ప్రశ్నలు తలెత్తుతున్నాయి.దళిత సంఘాలు స్పందిస్తున్నాయి. అయినా మున్సిపల్ అధికారులు మాత్రం ఇప్పటివరకు ఎందుకు స్పష్టమైన వివరణ ఇవ్వడం లేదనే ప్రశ్నలు వినిపిస్తున్నాయి.
అధికారిక హోదా లేకుండా ఆదేశాలు ఇచ్చారా..?
మున్సిపల్ పరిపాలనలో ఎవరి మాటకు ప్రాధాన్యం ఉంది..?
ఈ ప్రశ్నలకు సమాధానాలు చెప్పాల్సింది మున్సిపల్ అధికారులే.
‘హుకుం’ ఎవరిదో.. ‘అధికారం’ ఎవరిదో తేల్చాల్సిందే
మున్సిపాలిటీ ప్రజల కోసం పనిచేసే ప్రభుత్వ వ్యవస్థ. వ్యక్తిగత పెత్తనాలకు వేదిక కాకూడదని దళిత సంఘాలు, స్థానికులు అంటున్నారు. వైరల్ ఆడియోపై స్వతంత్రంగా, నిష్పక్షపాతంగా విచారణ జరిపి నిజానిజాలను ప్రజల ముందుంచాలని, ఉద్యోగి విధుల్లో రాజకీయ జోక్యం లేకుండా చూడాలని వారు డిమాండ్ చేస్తున్నారు.
ఈ ప్రశ్నలకు అధికారుల సమాధానం కోసం పట్టణ ప్రజలు ఎదురుచూస్తున్నారు.