ఖాకీ యూనిఫామ్ వెనుక కన్నపేగు తపన

గండిపేట (రంగారెడ్డి) సమాజ రక్షణ కోసం రేయింబవళ్లు రోడ్లపై నిలబడి, పండుగలైనా పబ్బాలైనా కుటుంబానికి దూరంగా గడిపే పోలీసులు సమాజానికి ధైర్యం... కానీ ఆ ఖాకీ యూనిఫాం వెనుక కూడా తమ పిల్లల భవిష్యత్తు కోసం తపించే ఓ సగటు తల్లిదండ్రులు ఉన్నారని గుర్తుచేసే ఘటన సైబరాబాద్ పోలీస్ కమిషనరేట్‌లో చోటుచేసుకుంది. ప్రస్తుతం విద్యా సంవత్సరం మధ్యలో ఉన్న తరుణంలో సాధారణ బదిలీలను తాత్కాలికంగా వాయిదా వేయాలని కోరుతూ సైబరాబాద్ పోలీస్ కో-ఆపరేటివ్ క్రెడిట్ సొసైటీ మేనేజింగ్ కమిటీ సభ్యులు సైబరాబాద్ పోలీస్ కమిషనర్ డా. ఎం. రమేష్, ఐపీఎస్ ని కలిసి వినతిపత్రం అందజేశారు. రక్తం చెమటగా మార్చి సంపాదించిన దాంట్లోంచి ఇప్పటికే పిల్లల పాఠశాల ఫీజులు చెల్లించి, అడ్మిషన్లు ఖరారు చేసుకున్నామని సిబ్బంది ఆవేదన వ్యక్తం చేశారు. విద్యా సంవత్సరం సగంలో ఉండగా అకస్మాత్తుగా బదిలీలు జరిగితే పిల్లల చదువులు తీవ్రంగా దెబ్బతింటాయని, ఆర్థికంగానూ కుటుంబాలు కుదేలవుతాయని కమిటీ ప్రతినిధులు కమిషనర్ దృష్టికి తీసుకెళ్లారు. పిల్లల పరీక్షల సమయం, చదువుల ఆందోళన వారి విధులపై కూడా మానసిక ప్రభావాన్ని చూపే అవకాశం ఉందని వివరించారు. మరోవైపు నగరంలో అత్యంత ప్రతిష్ఠాత్మకంగా, అప్రమత్తంగా నిర్వహించాల్సిన వినాయక చవితి బందోబస్తు ముంచుకొస్తోంది. శాంతిభద్రతల పరిరక్షణలో ఎలాంటి లోటుపాట్లు రాకుండా, పూర్తి దృష్టితో కర్తవ్యాన్ని నిర్వర్తించాలంటే ప్రస్తుతానికి బదిలీలను నిలిపివేయడం ఎంతో శ్రేయస్కరమని వారు నివేదించారు. సిబ్బంది వెలిబుచ్చిన కుటుంబ వేదనను, వారి పిల్లల చదువుల ప్రాధాన్యతను శ్రద్ధగా విన్న కమిషనర్ డా. ఎం. రమేష్ అత్యంత సానుకూలంగా స్పందించారు. ఈ సమస్యను పూర్తిగా మానవతా దృక్పథంతో, సానుభూతితో పరిశీలించి తగిన నిర్ణయం తీసుకుంటామని భరోసా ఇవ్వడంతో పోలీస్ కుటుంబాల్లో ఆశలు చిగురించాయి. ఈ కార్యక్రమంలో డీసీపీ (అడ్మిన్) టి. అన్నపూర్ణ, ఐపీఎస్, క్రెడిట్ సొసైటీ ట్రెజరర్ జి. మల్లేశం (ఎస్‌ఐ), డైరెక్టర్లు ఎ. రాజేందర్, బి. బలవంత రెడ్డి, సి. మల్లేశం, పి. అశోక్, జె. రాజిని, డి. పద్మలత తదితరులు పాల్గొన్నారు. కర్తవ్య నిర్వహణలో కఠినంగా కనిపించే పోలీసుల వెనుకనున్న కుటుంబ భావోద్వేగాలను కమిషనర్ అర్థం చేసుకోవడంపై సిబ్బంది కృతజ్ఞతలు తెలుపుతున్నారు.