ముస్లిం స్మశానవాటికలో మొరం పోసి చదును

చౌటకూర్ :-చౌటకూర్ మండల కేంద్రంలోని ముస్లిం స్మశానవాటిక (కబ్రస్తాన్)లో సమాధులు చేయడానికి సరైన స్థలం లేకపోవడంతో ఇబ్బందులు ఎదుర్కొంటున్నామని ముస్లిం సోదరులు గ్రామ సర్పంచ్‌ పార్కల రామ్‌రెడ్డి దృష్టికి తీసుకెళ్లారు. స్మశానవాటికలో పలుచోట్ల గుంతలు ఏర్పడటంతో పాటు నేల సరిగా లేకపోవడంతో మృతదేహాలను సమాధి చేసేందుకు ఇబ్బందులు పడుతున్నామని ముస్లిం సంఘం పెద్దలు సర్పంచ్‌కు వివరించారు.ముస్లిం సంఘం సభ్యుల విజ్ఞప్తిపై సానుకూలంగా స్పందించిన సర్పంచ్‌ పార్కల రామ్‌రెడ్డి బుధవారం స్మశానవాటికలోని పరిస్థితులను పరిశీలించారు. అనంతరం అక్కడ ఉన్న గుంతలను మొరం ద్వారా పూడ్చి, స్మశానవాటికలోని ప్రదేశాన్ని చదును చేయించారు. దీంతో సమాధులు చేసేందుకు ఇబ్బందులు తొలగడంతో ముస్లిం సోదరులు హర్షం వ్యక్తం చేశారు.ప్రజల సమస్యలను కుల, మత భేదాలు లేకుండా పరిష్కరించేందుకు కృషి చేస్తామని ఈ సందర్భంగా సర్పంచ్‌ పార్కల రామ్‌రెడ్డి పేర్కొన్నారు. గ్రామంలో ఏ వర్గానికి చెందిన ప్రజలు సమస్యను తన దృష్టికి తీసుకొచ్చినా, సాధ్యమైనంత త్వరగా పరిష్కరించేందుకు చర్యలు తీసుకుంటామని తెలిపారు.తమ సమస్యను వెంటనే పరిష్కరించేందుకు స్పందించి స్మశానవాటికలో మొరం పోసి చదును చేయించిన సర్పంచ్‌ పార్కల రామ్‌రెడ్డికి ముస్లిం సంఘం సభ్యులు కృతజ్ఞతలు తెలిపారు. అనంతరం సర్పంచ్‌ను శాలువాతో సత్కరించి అభినందించారు. ప్రజల సమస్యల పరిష్కారానికి సర్పంచ్‌ చూపుతున్న చొరవను వారు ప్రశంసించారు.ఈ కార్యక్రమంలో వార్డు మెంబర్లు డప్పు అశోక్, గోరెమియా, గ్రామస్తులు నారాయణ గౌడ్, ఆగమయ్య, రాజేశ్వర్ గౌడ్, నగేష్, కుమార్ గౌడ్, మల్లికార్జున్, కిట్టు, ముస్లిం సంఘం సభ్యులు హజీ, అజీమ్ తదితరులు పాల్గొన్నారు.