కార్మిక హక్కుల పరిరక్షణ కోసం ఐక్యంగా పోరాడాలి

చౌటకూర్, :చౌటకూర్ మండలంలోని శివంపేట గ్రామంలో ఉన్న చార్మినార్ బ్రేవరీస్ పరిశ్రమలో గురువారం సీఐటీయూ ఆధ్వర్యంలో డిమాండ్స్ డే కార్యక్రమాన్ని నిర్వహించారు. ఈ నిరసన కార్యక్రమానికి ముఖ్య అతిథిగా సీఐటీయూ తెలంగాణ రాష్ట్ర అధ్యక్షులు కామ్రేడ్ చుక్కా రాములు హాజరై కార్మికుల సమస్యలు, హక్కుల పరిరక్షణపై మాట్లాడారు. కార్మికుల న్యాయమైన డిమాండ్లు సాధించే వరకు ఐక్యంగా పోరాటాలను కొనసాగించాలని ఆయన పిలుపునిచ్చారు.ఈ సందర్భంగా సీఐటీయూ ప్రధానంగా పలు డిమాండ్లను ముందుకు తీసుకువచ్చింది. లేబర్ కోడ్‌లను రద్దు చేసి కార్మికుల హక్కులను కాపాడాలని, సమాన పనికి సమాన వేతనం అమలు చేయాలని, కాంట్రాక్ట్ కార్మికులను పర్మినెంట్ చేయాలని, కార్మిక హక్కులను పరిరక్షించాలని డిమాండ్ చేశారు. అలాగే డిసెంబర్ 1, 2, 3 తేదీల్లో నిర్వహించనున్న చలో ఢిల్లీ కార్యక్రమాన్ని విజయవంతం చేయాలని కార్మికులకు పిలుపునిచ్చారు.కార్యక్రమంలో ముఖ్య అతిథి చుక్కా రాములు మాట్లాడుతూ.. కార్మికులు ఎన్నో సంవత్సరాలుగా సాగించిన పోరాటాల ఫలితంగా అనేక హక్కులు, సౌకర్యాలను సాధించుకున్నారని తెలిపారు. ఆ హక్కులను పరిరక్షించుకోవాల్సిన బాధ్యత ప్రతి కార్మికుడిపై ఉందన్నారు. కార్మికుల ప్రయోజనాలకు సంబంధించిన చట్టాలను మరింత బలోపేతం చేయాల్సిన అవసరం ఉన్న సమయంలో, లేబర్ కోడ్‌ల పేరుతో కార్మికుల హక్కులు, ఉద్యోగ భద్రత, వేతనాలు, పని పరిస్థితులపై ప్రభావం చూపే మార్పులు తీసుకురావడం సరికాదని అన్నారు.కార్మికుల సమస్యలను పరిష్కరించడంతో పాటు కనీస వేతనాలు, ఉద్యోగ భద్రత, సామాజిక భద్రత, పని ప్రదేశాల్లో రక్షణ వంటి అంశాలకు ప్రాధాన్యత ఇవ్వాలని ఆయన డిమాండ్ చేశారు. లేబర్ కోడ్‌లను రద్దు చేయాలని, కార్మికుల హక్కులను కాపాడాలని, కార్మికుల ప్రయోజనాలకు విరుద్ధంగా ఉన్న విధానాలను ఉపసంహరించు కోవాలని కేంద్ర ప్రభుత్వాన్ని డిమాండ్ చేశారు.కార్మికుల సమస్యల పరిష్కారం కోసం ఐక్యంగా, ప్రజాస్వామ్య పద్ధతిలో పోరాటాలను కొనసాగిస్తామని సీఐటీయూ నాయకులు తెలిపారు. రాబోయే రోజుల్లో కార్మికుల హక్కుల సాధన కోసం చేపట్టే కార్యక్రమాల్లో కార్మికులు పెద్ద సంఖ్యలో పాల్గొని విజయవంతం చేయాలని పిలుపునిచ్చారు.ఈ కార్యక్రమంలో సీఐటీయూ జిల్లా ఉపాధ్యక్షులు పాండురంగ రెడ్డి, బాగారెడ్డి, పర్మినెంట్ యూనియన్ ప్రధాన కార్యదర్శి ప్రసన్నరావు, యూనియన్ ఆఫీస్ బేరర్లు, కాంట్రాక్ట్ కార్మికులు తదితరులు పాల్గొన్నారు.