బేగంపేట్‌లో నకిలీ ఎయిర్‌ఫోర్స్ అధికారి కలకలం 

హైదరాబాద్: బేగంపేట్ పరేడ్ గ్రౌండ్‌లో నకిలీ ఎయిర్‌ఫోర్స్ అధికారిగా అనుమానిస్తున్న ఓ యువకుడిని మిలిటరీ అధికారులు అదుపులోకి తీసుకున్న ఘటన కలకలం రేపింది. ఫ్లైయింగ్ ఆఫీసర్ డ్రెస్‌లో పరేడ్ గ్రౌండ్‌లోకి ప్రవేశించిన యువకుడు అక్కడ ఫొటోలు దిగుతూ సంచరిస్తుండటంతో అధికారులు అనుమానించారు. అతడిని తనిఖీ చేసి వివరాలు ఆరా తీయగా, తాను ఎయిర్‌ఫోర్స్ అధికారినని చెప్పుకోవడంపై అనుమానాలు వ్యక్తమయ్యాయి. విచారణలో అతడిని నితీష్ కుమార్ పాల్గా గుర్తించినట్లు సమాచారం. నేరెడ్‌మెట్‌లో నివాసముంటున్న అతడు బీహార్‌కు చెందిన వ్యక్తిగా పోలీసులు గుర్తించినట్లు తెలుస్తోంది. పోలీసుల ప్రాథమిక సమాచారం ప్రకారం.. నితీష్ కుమార్ పాల్ సోషల్ మీడియా ప్లాట్‌ఫామ్ ఇన్‌స్టాగ్రామ్‌లో తాను ఎయిర్‌ఫోర్స్ అధికారినంటూ ప్రొఫైల్ నిర్వహిస్తున్నట్లు అనుమానిస్తున్నారు. అదే పేరుతో యువతులను ఆకర్షించేందుకు ప్రయత్నించినట్లు కూడా పోలీసులు అనుమానిస్తున్నారు. పరేడ్ గ్రౌండ్‌లో అనుమానాస్పదంగా తిరుగుతున్న సమయంలో మిలిటరీ అధికారులు అతడిని అదుపులోకి తీసుకుని బేగంపేట్ పోలీసులకు అప్పగించారు. ఘటనపై బేగంపేట్ పోలీసులు కేసు నమోదు చేసి దర్యాప్తు చేస్తున్నారు. నిందితుడు ఎయిర్‌ఫోర్స్ అధికారి దుస్తులను ఎలా పొందాడు? సోషల్ మీడియాలో ఏ విధంగా ప్రొఫైల్ నిర్వహించాడు? మరెవరినైనా మోసం చేశాడా? అనే కోణాల్లో పోలీసులు విచారణ కొనసాగిస్తున్నారు.