ఎంపీ రఘురామిరెడ్డిపై పోలీసుల దాడిని ఖండిస్తున్నాం

కొత్తగూడెం బ్యూరో : ఖమ్మం పార్లమెంట్ సభ్యుడు రామసహాయం రఘురామిరెడ్డిపై ఢిల్లీ పోలీసులు దాడి చేశారంటూ వచ్చిన ఆరోపణలను కాంగ్రెస్ నాయకురాలు 15 వ డివిజన్ కార్పొరేటర్ ఆకునూరి సుప్రియ తీవ్రంగా ఖండించారు. ఈ ఘటన ప్రజాస్వామ్య విలువలు, రాజ్యాంగ హక్కులకు సంబంధించిన అంశంగా ఆమె పేర్కొన్నారు. ప్రజాస్వామ్యాన్ని కాపాడాలని, రాజ్యాంగాన్ని పరిరక్షించాలని, ఓటు చోరీకి అడ్డుకట్ట వేయాలని ప్రజా ప్రతినిధులు చేస్తున్న పోరాటంలో ఒక పార్లమెంట్ సభ్యుడిపైనే పోలీసులు దాడి చేశారనే ఆరోపణలు ఆందోళన కలిగిస్తున్నాయని సుప్రియ అన్నారు. ప్రజల ఓట్లతో ఎన్నికైన ప్రజా ప్రతినిధుల పట్ల పోలీసులు ఈ విధంగా వ్యవహరించడం ప్రజాస్వామ్య స్ఫూర్తికి విరుద్ధమని ఆమె పేర్కొన్నారు. ప్రజా ప్రతినిధులకే రక్షణ లేకపోతే సామాన్య ప్రజల పరిస్థితి ఏమిటనే ప్రశ్న తలెత్తుతోందని అన్నారు. ఎంపీ రఘురామిరెడ్డిపై జరిగినట్లు చెబుతున్న ఘటనపై సమగ్ర విచారణ జరిపించాలని, బాధ్యులుగా తేలిన పోలీసులపై చట్ట ప్రకారం తక్షణ చర్యలు తీసుకోవాలని ఆమె డిమాండ్ చేశారు. ఈ ఘటనపై కేంద్ర ప్రభుత్వం బాధ్యత వహించి ప్రజలకు, పార్లమెంట్ సభ్యులకు స్పష్టమైన వివరణ ఇవ్వాలని సుప్రియ కోరారు. ప్రజాస్వామ్య హక్కులు, రాజ్యాంగ విలువలను పరిరక్షించేందుకు ప్రజా ప్రతినిధులు నిర్వహించే కార్యక్రమాలను అణచివేయకుండా, వారి చట్టబద్ధ హక్కులను గౌరవించాలని కేంద్ర ప్రభుత్వాన్ని ఆమె కోరారు.