పోలీస్ శాఖలో ఆర్టిఫిషియల్ ఇంటెలిజెన్స్ వినియోగం మరింత విస్తృతం చేయాలి

నిజామాబాద్ :  నిజామాబాద్ పోలీస్ కమిషనర్  పి. సాయి చైతన్య ఐ.పి.యస్ ఆదేశాల మేరకు ఆధునిక సాంకేతిక పరిజ్ఞానాన్ని పోలీస్ శాఖకు అనుసంధానం చేసి , ఆర్టిఫిషియల్ ఇంటెలిజెన్స్ (AI) సేవలను సమర్థవంతంగా వినియోగించుకోవడం ద్వారా పోలీసింగ్‌ను మరింత వేగవంతంగా , పారదర్శకంగా మరియు సమర్థవంతంగా నిర్వహించేందుకు అవసరమైన చర్యలపై నిజామాబాద్ పోలీస్ కమిషనరేట్ కార్యాలయంలో సమీక్ష సమావేశం నిర్వహించారు. నిజామాబాద్ పోలీస్ కమిషనరేట్ అదనపు డీసీపీ (అడ్మిన్)  ఎన్. శుభం ప్రకాష్ ఆధ్వర్యంలో నిర్వహించిన ఈ సమావేశానికి వివిధ కళాశాలల ప్రిన్సిపాల్స్ , ప్రొఫెసర్లు , ఫ్యాకల్టీ సభ్యులు హాజరయ్యారు. ఈ సందర్భంగా పోలీస్ శాఖలో ఆర్టిఫిషియల్ ఇంటెలిజెన్స్‌ను ఏ విధంగా అనుసంధానం చేయాలి , పోలీసింగ్‌లో ఏఐ ఆధారిత సాంకేతికతను ఏయే రంగాల్లో వినియోగించుకోవచ్చు అనే అంశాలపై విస్తృతంగా చర్చించారు. ప్రత్యేకంగా నేరాల విశ్లేషణ , నేరాల నివారణ , క్రైమ్ డేటా విశ్లేషణ , అనుమానాస్పద కార్యకలాపాల గుర్తింపు , ట్రాఫిక్ నిర్వహణ , సీసీటీవీ ఫుటేజీ విశ్లేషణ , సైబర్ నేరాల దర్యాప్తు , సోషల్ మీడియా మానిటరింగ్ , ప్రజలకు పోలీస్ సేవలను మరింత వేగంగా అందించడం వంటి అంశాల్లో ఏఐ సాంకేతికతను వినియోగించుకునే అవకాశాలపై సమీక్షించారు. అదేవిధంగా పోలీస్ సిబ్బందికి అవసరమైన శిక్షణ , సాంకేతిక నైపుణ్యాల పెంపు , కళాశాలల్లో అందుబాటులో ఉన్న సాంకేతిక నిపుణుల సహకారంతో పోలీస్ శాఖకు ఉపయోగపడే ఏఐ ఆధారిత పరిష్కారాలు , సాఫ్ట్‌వేర్‌లు మరియు అప్లికేషన్ల అభివృద్ధి వంటి అంశాలపై కూడా చర్చించారు. విద్యాసంస్థలు , సాంకేతిక నిపుణులు మరియు పోలీస్ శాఖ సమన్వయంతో పనిచేస్తే ప్రజా భద్రతకు మరింత మెరుగైన సేవలు అందించడంతో పాటు , భవిష్యత్ పోలీసింగ్‌ను సాంకేతికత ఆధారితంగా తీర్చిదిద్దేందుకు అవకాశం ఉంటుందని అదనపు డీసీపీ అడ్మిన్  శుభం ప్రకాష్ పేర్కొన్నారు. ప్రస్తుత కాలంలో సాంకేతిక పరిజ్ఞానం వేగంగా అభివృద్ధి చెందుతున్న నేపథ్యంలో , పోలీస్ శాఖ కూడా ఆధునిక సాంకేతికతను అందిపుచ్చుకొని నేర నియంత్రణ , దర్యాప్తు , ప్రజా భద్రత మరియు పోలీస్ సేవలలో మరింత సమర్థవంతమైన ఫలితాలు సాధించే దిశగా ముందుకు సాగాల్సిన అవసరం ఉందని తెలిపారు. ఈ సమావేశంలో నవ్య భారతి జాయింట్ సెక్రెటరీ డాక్టర్ శిరీష్ , విజయ రూరల్ ఇంజనీరింగ్ కాలేజీ వైస్ ప్రిన్సిపాల్ డాక్టర్ ఎన్.స్వప్న ,  ఫ్యాకల్టీ సుజాత, నవ్య, లక్ష్మి ,  కాకతీయ కాలేజీ కిడ్స్ అధికారులు  డి.వేణుగోపాల్   పి.  నాగార్జున  , క్షత్రియ ఇంజనీరింగ్ కాలేజ్ నుండి ప్రిన్సిపాల్ డాక్టర్ శ్రీనివాస్ సి.ఓ.డి ఎం. లక్ష్మణ్ మరియు సంబంధిత అధికారులు సిబ్బంది పాల్గొనడం జరిగింది.