వాటర్ వర్క్స్ లో 24 గంటల్లో ముగ్గురు ఔట్‌సోర్సింగ్ ఉద్యోగుల మృతి

హైదరాబాద్: హైదరాబాద్ జలమండలి (వాటర్ వర్క్స్)లో పనిచేస్తున్న ఔట్‌సోర్సింగ్ ఉద్యోగుల పరిస్థితులు రోజురోజుకూ ఆందోళనకరంగా మారుతున్నాయని, ఉద్యోగ భద్రత లేకుండా తీవ్రమైన పని ఒత్తిడితో విధులు నిర్వహిస్తున్న ఉద్యోగులపై ప్రభుత్వం, జలమండలి యాజమాన్యం తక్షణమే దృష్టి సారించాలని తెలంగాణ రాష్ట్ర ఔట్‌సోర్సింగ్ ఉద్యోగుల జేఏసీ డిమాండ్ చేసింది. కేవలం 24 గంటల వ్యవధిలో ముగ్గురు ఔట్‌సోర్సింగ్ ఉద్యోగులు మృతి చెందడం అత్యంత విషాదకరమైన, ఆందోళన కలిగించే ఘటన అని జేఏసీ పేర్కొంది. వరుసగా ఉద్యోగుల మృతులు సంభవిస్తున్న నేపథ్యంలో, వారి కుటుంబాలను ఆదుకోవడంతో పాటు, జలమండలిలో పనిచేస్తున్న వేలాది మంది ఔట్‌సోర్సింగ్ ఉద్యోగుల పని పరిస్థితులు, ఉద్యోగ భద్రత, జీతాల చెల్లింపులు, పని ఒత్తిడి తదితర అంశాలపై ప్రభుత్వం సమగ్రంగా విచారణ జరిపి తక్షణ చర్యలు చేపట్టాలని డిమాండ్ చేసింది.నేరేడ్‌మెట్–మౌలాలి ప్రాంతానికి చెందిన శ్రీహరి, పెద్దాపూర్‌కు చెందిన వినయ్, అలాగే అంత్యక్రియలు పూర్తికాకముందే మరో మీటర్ రీడర్‌గా కుత్బు లాపూర్ లో పనిచేస్తున్న   కిరణ్ గుండెపోటుతో మృతి చెందడం తీవ్ర విషాదకరమని జేఏసీ నాయకులు ఆవేదన వ్యక్తం చేశారు. ఒకరి మృతిని జీర్ణించుకోకముందే మరొకరి మృతి సంభవించడం ఉద్యోగుల్లో తీవ్ర ఆందోళనకు కారణమైందని తెలిపారు.మృతి చెందిన వారిలో ఇద్దరు మీటర్ రీడర్లు ఉన్నారని, ఉద్యోగులపై ఉన్న పని ఒత్తిడి, పని పరిస్థితులు, ఉద్యోగ భద్రత తదితర అంశాలను ప్రభుత్వం సమగ్రంగా పరిశీలించాల్సిన అవసరం ఉందని జేఏసీ పేర్కొంది. అయితే, ఈ మృతులకు పని ఒత్తిడే ప్రత్యక్ష కారణమని ముందస్తుగా నిర్ధారించకుండా, సమగ్ర విచారణ ద్వారా వాస్తవ కారణాలను వెలుగులోకి తీసుకురావాలని డిమాండ్ చేసింది.IFMSలో వివరాలు నమోదు చేయకుండా జీతాలు నిలిపివేయడం సరికాదుజలమండలిలో పనిచేస్తున్న ఔట్‌సోర్సింగ్ ఉద్యోగుల వివరాలను IFMS పోర్టల్‌లో నమోదు చేయకుండా, జీతాల చెల్లింపులో జాప్యం చేయడం ద్వారా ఉద్యోగులపై మరింత ఆర్థిక, మానసిక ఒత్తిడి పెరుగుతోందని జేఏసీ ఆరోపించింది.ఇప్పటికే ఉద్యోగ భద్రతపై అనిశ్చితి, పెరుగుతున్న పని భారం, సిబ్బంది కొరత, సరైన సౌకర్యాల లేమి వంటి సమస్యలను ఎదుర్కొంటున్న ఉద్యోగులకు జీతాల విషయంలో కూడా ఇబ్బందులు కల్పించడం బాధాకరమని పేర్కొంది.ఉద్యోగి కుటుంబాన్ని పోషించుకోవడానికి జీతంపైనే ఆధారపడుతుంటే, జీతం సకాలంలో అందకపోవడం ఉద్యోగిపై తీవ్ర ఆర్థిక, మానసిక ప్రభావాన్ని చూపుతుందని జేఏసీ నాయకులు తెలిపారు.కమిషన్ ఆధారిత విధానాలతో ఉద్యోగ భద్రతకు ముప్పుమీటర్ రీడర్ల విషయంలో కమిషన్ల ఆధారంగా కొత్త టెండర్ విధానాలను తీసుకురావడం, ప్రస్తుతం పనిచేస్తున్న ఉద్యోగులను తొలగించే పరిస్థితులు కల్పించడం వెంటనే నిలిపివేయాలని జేఏసీ డిమాండ్ చేసింది. ఏళ్ల తరబడి సంస్థ కోసం పనిచేస్తున్న ఉద్యోగులను కేవలం టెండర్లు, కాంట్రాక్టులు, కమిషన్ విధానాల పేరుతో తొలగించడం అన్యాయమని పేర్కొంది. కొత్త విధానాల పేరుతో ఉద్యోగుల ఉపాధిని దెబ్బతీయకుండా, ఇప్పటికే అనుభవం కలిగి విధులు నిర్వహిస్తున్న ఉద్యోగులకు పూర్తిస్థాయి ఉద్యోగ భద్రత కల్పించాలని కోరింది. ఉద్యోగ భద్రత లేకుండా, నిరంతర పని ఒత్తిడిలో విధులు నిర్వహించే పరిస్థితి కొనసాగితే ఉద్యోగుల మానసిక, శారీరక ఆరోగ్యంపై ప్రతికూల ప్రభావం పడే అవకాశం ఉందని జేఏసీ ఆవేదన వ్యక్తం చేసింది. మృతుల కుటుంబాలను ప్రభుత్వం ఆదుకోవాలి, విధి నిర్వహణలో ఉన్న సమయంలో మృతి చెందిన ఉద్యోగుల కుటుంబాలు రోడ్డున పడకుండా ప్రభుత్వం వెంటనే ప్రత్యేక చర్యలు తీసుకోవాలని జేఏసీ డిమాండ్ చేసింది. మృతుల కుటుంబాలకు కేవలం సానుభూతి ప్రకటనలు కాకుండా ఆర్థిక భరోసా, కుటుంబ సభ్యుడికి ఉద్యోగం, భవిష్యత్ జీవనానికి భద్రత కల్పించాలని కోరింది. హైదరాబాద్ జలమండలి చైర్మన్‌గా రాష్ట్ర ముఖ్యమంత్రి శ్రీ ఎ. రేవంత్ రెడ్డి గారు ఉన్నందున, ఈ విషయంలో ముఖ్యమంత్రి ప్రత్యేకంగా జోక్యం చేసుకుని ఔట్‌సోర్సింగ్ ఉద్యోగుల సమస్యలకు శాశ్వత పరిష్కారం చూపాలని జేఏసీ విజ్ఞప్తి చేసింది.