అంగన్‌వాడీ సేవలకు బీజేపీ సత్కారం.. చిన్నారులకు కానుకలు

తాండూరు (వికారాబాద్ జిల్లా) ప్రధాని నరేంద్ర మోదీ జన్మదినాన్ని పురస్కరించుకుని బీజేపీ చేపట్టిన సేవా సంకల్ప అభియాన్లో భాగంగా తాండూరు పట్టణం 33వ వార్డు అంగన్‌వాడీ కేంద్రం–1లో ‘అంగన్ మిలన్ సేవ’ కార్యక్రమం ఘనంగా నిర్వహించారు. స్థానిక వార్డు కౌన్సిలర్ డి. శ్రీకాంత్ రెడ్డి ఆధ్వర్యంలో జరిగిన ఈ కార్యక్రమంలో బీజేపీ జిల్లా అధ్యక్షుడు యు. రమేష్ కుమార్ పాల్గొని అంగన్‌వాడీ సిబ్బందిని సన్మానించారు.అంగన్‌వాడీ కేంద్రాల్లో చిన్నారుల సంరక్షణ, పోషణ, ప్రాథమిక విద్యకు అంకిత భావంతో సేవలందిస్తున్న సిబ్బందిని ఈ సందర్భంగా అభినందించారు. అనంతరం చిన్నారులకు పుస్తకాలు, స్వీట్లు పంపిణీ చేశారు. ఈ సందర్భంగా రమేష్ కుమార్ మాట్లాడుతూ.. ప్రధాని మోదీ జన్మదినం సందర్భంగా సెప్టెంబర్ 17 నుంచి అక్టోబర్ 17 వరకు ప్రజల భాగస్వామ్యంతో సేవా కార్యక్రమాలు నిర్వహిస్తున్నట్లు తెలిపారు. ఇందులో భాగంగా సెప్టెంబర్ 25 నుంచి అక్టోబర్ 7 వరకు ప్రతి అంగన్‌వాడీ కేంద్రాన్ని సందర్శించి, అక్కడి సిబ్బందిని సన్మానించి వారి సేవలకు కృతజ్ఞతలు తెలియజేస్తున్నామని పేర్కొన్నారు. “అంగన్‌వాడీ సిబ్బంది సేవలు సమాజానికి ఎంతో విలువైనవి. చిన్నారుల భవిష్యత్తుకు పునాది వేసే కేంద్రాల్లో వారు చేస్తున్న సేవలను గుర్తించి గౌరవించడం ప్రతి ఒక్కరి బాధ్యత” అని రమేష్ కుమార్ అన్నారు. కేంద్ర ప్రభుత్వ పథకాలు, ప్రజలకు అందుతున్న సేవలను కూడా ఈ సందర్భంగా ప్రజలకు వివరించారు.ఈ కార్యక్రమంలో బీజేపీ పట్టణ అధ్యక్షుడు నగారం మల్లేశం, బిజెపి నాయకులు కృష్ణ ముదిరాజ్, జిల్లా కార్యదర్శి భద్రేశ్వర్ తదితర నాయకులు, కార్యకర్తలు పాల్గొన్నారు.