మాధవనగర్ కాలనీలో ఘనంగా  గణేష్ నిమజ్జనోత్సవం

పెద్ద శంకరంపేట్ : పెద్ద శంకరంపేట పట్టణంలోని మాధవనగర్ కాలనీలో శ్రీ వినాయక ఉత్సవ కమిటీ ఆధ్వర్యంలో నిర్వహించిన గణేష్ నవరాత్రి ఉత్సవాలు శుక్రవారం అత్యంత వైభవంగా ముగిసాయి. తొమ్మిది రోజుల పాటు విశేష పూజలు అందుకున్న లంబోదరునికి కాలనీవాసులు, భక్తులు ఘనంగా వీడ్కోలు పలికారు. ఉత్సవాల ముగింపు సందర్భంగా నిర్వహించిన గణేష్ లడ్డూ వేలం పాట భక్తుల ఉత్సాహం మధ్య కోలాహలంగా సాగింది. మొదటి లడ్డూ ప్రసాదాన్ని హైదరాబాద్ (మేడ్చల్) కు చెందిన గజం సాయికిరణ్ రూ. 3,09,999/- ల అత్యధిక మొత్తానికి దక్కించుకున్నారు. అలాగే అదే కాలనీలో ఏర్పాటు చేసిన రెండవ లడ్డూ ప్రసాదాన్ని కాలనీకి చెందిన సాంబయ్యగారి ప్రభాకర్ రూ. 66,666/- లకు వేలంలో సొంతం చేసుకున్నారు. లడ్డూ ప్రసాదాన్ని వేలంలో దక్కించుకున్న గజం సాయికిరణ్, సాంబయ్యగారి ప్రభాకర్‌లను ఉత్సవ కమిటీ సభ్యులు శాలువా, పూలమాలలతో ఘనంగా సన్మానించి అభినందనలు తెలిపారు. ఆ బొజ్జ గణపయ్య అనుగ్రహంతో కాలనీ ప్రజలంతా ఆయురారోగ్యాలు, అష్టైశ్వర్యాలతో వర్ధిల్లాలని ఈ సందర్భంగా భక్తులు ఆకాంక్షించారు. ఈ కార్యక్రమంలో మాధవనగర్ కాలనీ ఉత్సవ కమిటీ అధ్యక్షుడు రాగం శ్రీనివాస్, కమిటీ సభ్యులు కందుకూరి రవీందర్,దాదిగారి గంగాధర్, సాంబయ్యగారి ప్రభాకర్, ఉప్పల భానుప్రకాష్, పెంటయ్య సార్, డాక్టర్ సంగమేశ్వర్ రెడ్డి, చెకిలం సంతోష్ కుమార్, పాల గంగారెడ్డి మరియు కాలనీ వాసులు, మహిళలు, యువకులు పెద్ద సంఖ్యలో పాల్గొన్నారు.