జలసిరిలో భాగంగా ఫారం పాండ్‌ నిర్మాణం.. రైతు అంజయ్యకు అభినందనలు

చౌటకూర్ : సంగారెడ్డి జిల్లా చౌటకూర్ మండలంలోని పోసాన్‌పల్లి గ్రామ పంచాయతీ పరిధిలో రైతు అంజయ్య నిర్మించుకున్న ఫారం పాండ్‌ను బుధవారం ఎంపీడీవో కే. శంకర్, డీఎల్‌పీవో అనిత పరిశీలించారు. ప్రభుత్వం చేపట్టిన జలసిరి కార్యక్రమంలో భాగంగా ఫారం పాండ్‌ను నిర్మించుకున్న రైతు అంజయ్యను అధికారులు ఈ సందర్భంగా అభినందించారు.ఈ సందర్భంగా ఎంపీడీవో కే. శంకర్ మాట్లాడుతూ గ్రామీణ ప్రాంతాల్లో వర్షపు నీటిని ఒడిసిపట్టి భూగర్భ జలాలను పెంపొందిం చేందుకు ఫారం పాండ్లు ఎంతో ఉపయోగపడతాయని తెలిపారు. రైతులు తమ పొలాల్లో ఫారం పాండ్లను నిర్మించుకోవడం ద్వారా వర్షపు నీటిని నిల్వ చేసుకోవడంతో పాటు, అవసరమైన సమయంలో వ్యవసాయానికి వినియోగించుకోవచ్చని పేర్కొన్నారు. ఫారం పాండ్ల వల్ల భూగర్భ జలమట్టాలు పెరిగి, సాగునీటి సమస్య కొంతవరకు తీరుతుందని వివరించారు. రైతు అంజయ్యను ఆదర్శంగా తీసుకుని గ్రామంలోని ఇతర రైతులు కూడా ఫారం పాండ్ల నిర్మాణానికి ముందుకు రావాలని సూచించారు. వీటిలో నీటిని నిల్వ చేసుకోవడమే కాకుండా చేపల పెంపకం చేపట్టి అదనపు ఆదాయం పొందే అవకాశం ఉందన్నారు. ప్రభుత్వం అందిస్తున్న ఈ అవకాశాలను రైతులు సద్వినియోగం చేసుకుని నీటి సంరక్షణకు సహకరించాలని కోరారు. ఈ కార్యక్రమంలో ఎంపీఓ సువర్ణ, ఏపీవో రామ్మోహన్, పంచాయతీ కార్యదర్శి అశోక్‌తో పాటు పలువురు గ్రామస్తులు పాల్గొన్నారు.