అక్రమ షట్టర్లకు పంచాయతీ నంబర్లు..!

పెద్ద శంకరంపేట,:పెద్ద శంకరంపేట గ్రామపంచాయతీ పరిధిలో అనుమతులకు విరుద్ధంగా నిర్మించిన 21 వాణిజ్య షట్టర్లకు పంచాయతీ 22 ఇంటి నంబర్లు కేటాయించి, దాదాపు ఒక ఎకరా ఖాళీ స్థలంలో ఎలాంటి నిర్మాణం లేకున్నా అక్రమంగా ఇంటి నెంబర్ కేటాయించి, విద్యుత్‌ మీటర్లకు అనుమతులు ఇచ్చారంటూ గ్రామ సర్పంచ్‌ జంగం రేణుక అధికారులకు ఫిర్యాదు చేయడం చర్చనీయాంశంగా మారింది. గ్రామపంచాయతీ అనుమతులు లేకుండా నిర్మాణాలు చేపట్టడంతో పాటు పంచాయతీకి రావాల్సిన ఆదాయానికి నష్టం వాటిల్లిందని ఆమె ఫిర్యాదులో పేర్కొన్నారు. ఫిర్యాదు వివరాల ప్రకారం.. శంకరంపేట గ్రామపంచాయతీ పరిధిలోని నారాయణఖేడ్‌ రహదారి ప్రాంతంలో దాదిగారి రాధాకృష్ణకు సంబంధించిన స్థలంలో గతంలో గృహ నిర్మాణ అనుమతి కోసం రుసుము చెల్లించి అనుమతి తీసుకున్నట్లు పేర్కొన్నారు. అనంతరం కోర్టు వ్యవహారం కారణంగా నిర్మాణ పనులు కొంతకాలం నిలిచిపోయాయని, తిరిగి నిర్మాణం కోసం దరఖాస్తు చేసిన సమయంలో వ్యాపార దుకాణాల షట్టర్లకు అనుమతి లేదని సంబంధిత శాఖ నుంచి అనుమతులు తీసుకురావాలని సూచించినట్లు తెలిపారు. అయినప్పటికీ గ్రామపంచాయతీ అనుమతి లేకుండానే 21 వ్యాపార షట్టర్ల నిర్మాణాలు పూర్తయ్యాయని సర్పంచ్‌ ఫిర్యాదులో ఆరోపించారు. ఆయా షట్టర్లకు సంబంధించి పంచాయతీ నుంచి ఇంటి నంబర్లు కేటాయించడంతో పాటు విద్యుత్‌ మీటర్లకు అనుమతులు ఇచ్చినట్లు పేర్కొన్నారు. ఖాళీ స్థలానికీ నంబర్‌ కేటాయింపుపై అభ్యంతరం షట్టర్ల వెనుక ఉన్న సుమారు ఎకరం ఖాళీ స్థలంలో ఎలాంటి నిర్మాణం లేకపోయినా, సంబంధిత అనుమతులు లేకుండానే ఇంటి నంబర్‌ కేటాయించి పన్ను రశీదు జారీ చేసినట్లు సర్పంచ్‌ ఆరోపించారు. ఈ వ్యవహారం తో గ్రామపంచాయతీకి రావాల్సిన ఆదాయానికి నష్టం వాటిల్లే అవకాశం ఉందని పేర్కొన్నారు. నూతన గృహ నిర్మాణం కొరకు దరఖాస్తు పెట్టుకున్న వారికి డబ్బులు ఇవ్వందే పనిచేయడం లేదంటూ దరఖాస్తుదారులు సర్పంచ్ గారికి వినతి పత్రం సమర్పిం చారని పేర్కొన్నారు. విచారణ జరిపి చర్యలు తీసుకోవాలని వినతి పంచాయతీ అనుమతులు లేకుండా నిర్మించిన షట్టర్లకు నంబర్లు కేటాయించడం, విద్యుత్‌ మీటర్లకు అనుమతులు ఇవ్వడం, ఖాళీ స్థలానికి సైతం నంబర్‌ కేటాయించిన అంశాలపై సమగ్ర విచారణ జరిపించాలని సర్పంచ్‌ అధికారులను కోరారు. నిబంధనలకు విరుద్ధంగా వ్యవహరించిన వారిపై చట్టపరమైన చర్యలు తీసుకోవడంతో పాటు పంచాయతీ ఆదాయానికి జరిగిన నష్టాన్ని పరిశీలించాలని ఫిర్యాదులో విజ్ఞప్తి చేశారు. ఈ వ్యవహారం పై అధికారులు పూర్తిస్థాయి విచారణ చేపట్టి వాస్తవాలను వెలుగులోకి తీసుకురావాల్సిన అవసరం ఉందని స్థానికులు కోరుతున్నారు.