సీఆర్‌పీ క్యాంపు ఏరియాలో వైద్య శిబిరం

కొత్తగూడెం : సీఆర్‌పీ క్యాంపు ఏరియాలో మంగళవారం ప్రజల ఆరోగ్య పరిరక్షణను లక్ష్యంగా చేసుకుని ప్రత్యేక హెల్త్‌ క్యాంపును నిర్వహించారు. ఈ సందర్భంగా స్థానిక ప్రజలకు వ్యక్తిగత పరిశుభ్రత, ఆరోగ్య పరిరక్షణపై అవగాహన కల్పించడంతో పాటు వర్షాకాలంలో తీసుకోవాల్సిన జాగ్రత్తలను వివరించారు. వర్షాకాలంలో పరిసరాలను పరిశుభ్రంగా ఉంచుకోవడం, తాగునీటిని శుభ్రంగా వినియోగించడం, ఆహారాన్ని పరిశుభ్రంగా తీసుకోవడం, చేతులను తరచుగా శుభ్రం చేసుకోవడం వంటి వ్యక్తిగత పరిశుభ్రత చర్యలపై ప్రజలకు అవగాహన కల్పించారు. వర్షాల కారణంగా దోమల వృద్ధి పెరిగే అవకాశం ఉన్నందున పరిసరాల్లో నీరు నిల్వ ఉండకుండా చూసుకోవాలని, దోమల నివారణకు తగిన చర్యలు తీసుకోవాలని సూచించారు. బీపీ, షుగర్‌ పరీక్షలు హెల్త్‌ క్యాంపుకు వచ్చిన ప్రజలకు వైద్య సిబ్బంది ప్రాథమిక ఆరోగ్య పరీక్షలు నిర్వహించారు. ముఖ్యంగా బీపీ, షుగర్‌ పరీక్షలు చేసి, అవసరమైన వారికి ఆరోగ్య సూచనలు అందించారు. పరీక్షల అనంతరం అవసరమైన మందులను ఉచితంగా పంపిణీ చేశారు. అలాగే దగ్గు, జలుబు, మోషన్స్‌ తదితర సాధారణ ఆరోగ్య సమస్యలతో శిబిరానికి వచ్చిన వారికి అవసరమైన మందులను అందజేశారు. ఆరోగ్య సమస్యలు తీవ్రతరం కాకుండా ప్రారంభ దశలోనే వైద్య సిబ్బందిని సంప్రదించాలని ప్రజలకు సూచించారు. వర్షాకాలంలో అప్రమత్తత అవసరం వర్షాకాలంలో నీటి ద్వారా, దోమల ద్వారా వ్యాపించే వ్యాధుల పట్ల ప్రజలు అప్రమత్తంగా ఉండాలని ఆరోగ్య సిబ్బంది సూచించారు. ఇంటి పరిసరాల్లో నీరు నిల్వ ఉండకుండా జాగ్రత్తలు తీసుకోవాలని, తాగునీటిని కాచి లేదా శుద్ధి చేసి వినియోగించాలని తెలిపారు. జ్వరం, విరేచనాలు, దగ్గు, జలుబు వంటి ఆరోగ్య సమస్యలు తలెత్తినప్పుడు నిర్లక్ష్యం చేయకుండా సమీప ఆరోగ్య కేంద్రాన్ని సంప్రదించాలని సూచించారు. ప్రజలకు ఆరోగ్యంపై అవగాహన కల్పించడంతో పాటు వారికి అవసరమైన వైద్య సేవలను అందించడం ద్వారా హెల్త్‌ క్యాంపు ప్రజలకు ఉపయోగకరంగా నిలిచింది. ఈ ఆరోగ్య శిబిరంలో వి. శ్రీనివాసరావు (పబ్లిక్‌ హెల్త్‌ మేనేజర్‌), కె. రాజేశ్వరి, కె. కవిత, బి. తార (ఏఎన్‌ఎంలు), అలివేలు (ఏడబ్ల్యూటీ), వరలక్ష్మి (ఏడబ్ల్యూ ఆయా) పాల్గొన్నారు.