మంగపేట, : అక్షరాలు నేర్పించే అక్షర దేవాలయం అది. రేపటి పౌరులను తీర్చిదిద్దాల్సిన ఆవరణ అది. కానీ, అక్కడ చదువుల తల్లి పాఠాల కంటే ముందే.. మద్యపాన వ్యసనం దర్శనమిస్తోంది! గుడి, బడి పరిసరాల్లో మద్యం దుకాణాలు ఉండకూడదనే ప్రభుత్వ నిబంధనలు ఇక్కడ పూర్తిగా తుంగలో తొక్కేశారు. మంగపేట మండలం చేరుపల్లి గ్రామంలో పాఠశాల పక్కనే వెలిసిన బెల్టు షాపులు స్థానికంగా తీవ్ర కలకలం రేపుతున్నాయి.
బడి పక్కనే 'బెల్టు' ధమాకా!
చేరుపల్లిలోని పాఠశాల ప్రాంగణానికి కూతవేటు దూరంలోనే ఏకంగా రెండు బెల్టు షాపులు ఏర్పాటు చేసి యథేచ్ఛగా మద్యం విక్రయాలు సాగిస్తున్నారు. ఉదయం విద్యార్థులు పుస్తకాలతో బడికి వస్తుంటే, వీధి చివర మద్యం బాటిళ్లతో అసాంఘిక మూకలు దర్శనమిస్తున్నాయి. చదువుకునే వాతావరణం దెబ్బతినడమే కాకుండా, చిన్నారి మనస్సులపై ఈ దృశ్యాలు తీవ్ర దుష్ప్రభావం చూపుతున్నాయని తల్లిదండ్రులు ఆవేదన వ్యక్తం చేస్తున్నారు.
పగలు విక్రయాలు.. రాత్రికి బడే 'మద్యం అడ్డా'!
ఇక రాత్రి వేళల్లో పరిస్థితి మరింత ఘోరంగా తయారైంది. ఈ రెండు బెల్టు షాపుల్లో మద్యం కొనుగోలు చేస్తున్న కొందరు అకతాయిలు, అడ్డూ అదుపూ లేకుండా నేరుగా బడి ఆవరణలోకి చొరబడుతున్నారు. పాఠశాల ప్రాంగణాన్నే ఒక బహిరంగ 'బార్'గా మార్చేసి రాత్రంతా తాగి తండననాలు ఆడుతున్నారు. ఉదయాన్నే బడికి వచ్చే చిన్నారులకు, ఉపాధ్యాయులకు కాలిపోయిన సిగరెట్ పీకలు, పగిలిన మద్యం సీసాలు ఎదురవుతుండడం తీవ్ర దిగ్భ్రాంతికి గురిచేస్తోంది. "బడి ముందే మద్యం అమ్ముతుంటే పిల్లలకు ఏం చదువు వస్తుంది? రాత్రివేళల్లో తాగుబోతులు బడిలో కూర్చుని అలజడి సృష్టిస్తున్నారు. అధికారులకు తెలిసినా పట్టించుకోకపోవడం దారుణం."
స్థానిక గ్రామస్థుల ఆవేదన
అధికారుల ఉదాసీనతపై మండిపాటు
నిబంధనల ప్రకారం పాఠశాలలు, దేవుని గుడులకు నిర్ణీత దూరంలో మద్యం విక్రయాలు జరగకూడదు. కానీ, చేరుపల్లిలో కళ్లముందే బెల్టు షాపులు నిర్వహిస్తున్నా సంబంధిత ఎక్సైజ్, పోలీసు అధికారులు చోద్యం చూస్తున్నారనే విమర్శలు వెల్లువెత్తుతున్నాయి. అధికారులు ఇప్పటికైనా నిద్రమత్తు వీడి, చేరుపల్లి బడి పక్కన ఉన్న బెల్టు షాపులను తక్షణమే తొలగించి, పాఠశాల ప్రాంగణంలో అక్రమంగా మద్యం సేవించే వారిపై కఠిన చర్యలు తీసుకోవాలని స్థానిక ప్రజలు, విద్యార్థుల తల్లిదండ్రులు గట్టిగా డిమాండ్ చేస్తున్నారు
.jpeg)
