కొత్తగూడెం, : రోడ్డు ప్రమాదాల నివారణతో పాటు ట్రాఫిక్ నిబంధనలపై ప్రజల్లో అవగాహన కల్పించేందుకు కొత్తగూడెం టూ టౌన్ పోలీసులు ప్రత్యేక చర్యలు చేపట్టారు. ఇందులో భాగంగా గురువారం రామవరం ప్రధాన రహదారి కూడలిలో టూ టౌన్ ఎస్ఐలు రాజశేఖర్, జీవన్ రాజ్ ఆధ్వర్యంలో విస్తృత వాహన తనిఖీలు నిర్వహించారు.ఈ తనిఖీల సందర్భంగా ద్విచక్ర, త్రిచక్ర, నాలుగు చక్రాల వాహనాలను ఆపి డ్రైవింగ్ లైసెన్స్, వాహన రిజిస్ట్రేషన్ సర్టిఫికెట్ (ఆర్సీ), పొల్యూషన్ అండర్ కంట్రోల్ (PUC) సర్టిఫికెట్, ఇన్సూరెన్స్ పత్రాలు, వాహనాల నంబర్ ప్లేట్లు, ఇతర చట్టబద్ధమైన ధ్రువీకరణ పత్రాలను క్షుణ్ణంగా పరిశీలించారు. పత్రాలు సక్రమంగా ఉన్నాయా లేదా అనే విషయాన్ని తనిఖీ చేయడంతో పాటు ట్రాఫిక్ నిబంధనలను పాటించేలా వాహనదారులకు సూచనలు చేశారు.ఈ సందర్భంగా ఎస్ఐలు మాట్లాడుతూ, ప్రతి వాహనదారుడు చెల్లుబాటు అయ్యే అన్ని ధ్రువీకరణ పత్రాలను ఎల్లప్పుడూ వెంట ఉంచుకోవాలని సూచించారు. డ్రైవింగ్ లైసెన్స్ లేకుండా వాహనాలు నడపడం, ఇన్సూరెన్స్, ఆర్సీ, పొల్యూషన్ సర్టిఫికెట్ లేకుండా వాహనాలను వినియోగించడం, నిబంధనలకు విరుద్ధంగా నంబర్ ప్లేట్లు ఏర్పాటు చేయడం లేదా నంబర్ ప్లేట్లు లేకుండా వాహనాలు నడపడం చట్టరీత్యా నేరమని తెలిపారు.అలాగే మైనర్లకు వాహనాలు ఇవ్వడం, వారు వాహనాలు నడపడం అత్యంత ప్రమాదకరమని పేర్కొన్నారు. మైనర్లు వాహనాలు నడుపుతూ పట్టుబడితే వాహనాలను సీజ్ చేయడంతో పాటు సంబంధిత వాహన యజమానులు, తల్లిదండ్రులపై కూడా మోటారు వాహనాల చట్టం ప్రకారం కఠిన చర్యలు తీసుకుంటామని హెచ్చరించారు.రోడ్డు భద్రత ప్రతి ఒక్కరి బాధ్యత అని, ట్రాఫిక్ నిబంధనలు పాటించడం ద్వారా ప్రమాదాలను గణనీయంగా తగ్గించవచ్చని ఎస్ఐలు పేర్కొన్నారు. ప్రజలు పోలీసులకు సహకరించి నిబంధనలు పాటించాలని, తమ ప్రాణాలతో పాటు ఇతరుల ప్రాణాలను కూడా కాపాడే బాధ్యతాయుతమైన డ్రైవింగ్ అలవాటు చేసుకోవాలని సూచించారు.ఈ వాహన తనిఖీల కార్యక్రమంలో టూ టౌన్ పోలీస్ స్టేషన్ సిబ్బంది పాల్గొన్నారు.
.jpeg)
