నత్తనడకన గ్రంథాలయ భవన నిర్మాణం

చౌటకూర్, : చౌటకూర్ మండలంలోని శివంపేట జిల్లా పరిషత్ ఉన్నత పాఠశాలలో నిర్మాణంలో ఉన్న గ్రంథాలయ భవనం పనులు నత్తనడకన సాగుతున్నాయని ఉపాధ్యాయులు ఆందోళన వ్యక్తం చేస్తున్నారు. పనులు ప్రారంభమై చాలా కాలం గడిచినా ఇప్పటికీ పూర్తి కాకపోవడంతో విద్యార్థులు, పాఠశాల సిబ్బంది ఇబ్బందులు ఎదుర్కొంటున్నట్లు తెలిపారు.స్థానిక సమాచారం ప్రకారం, నిర్మాణ పనులు చేపట్టిన కాంట్రాక్టర్‌కు ఇప్పటివరకు బిల్లులు విడుదల కాకపోవడంతో పనులు మందగించాయని తెలుస్తోంది. అయితే నిర్మాణంలో ఇప్పటికే కొన్ని చోట్ల గోడలకు పగుళ్లు (క్రాక్‌లు) కనిపిస్తున్నాయని, కొన్ని పిల్లర్ల నిర్మాణంపై కూడా సందేహాలు ఉన్నాయని ఉపాధ్యాయులు పేర్కొన్నారు. ఈ విషయాన్ని పలుమార్లు సంబంధిత కాంట్రాక్టర్ దృష్టికి తీసుకెళ్లినా ఆశించిన స్థాయిలో స్పందన లేదని ఆరోపించారు.ఈ సందర్భంగా ఉపాధ్యాయులు మాట్లాడుతూ, ఆగస్టు నెలలోపు గ్రంథాలయ భవన నిర్మాణాన్ని పూర్తి చేస్తామని కాంట్రాక్టర్ గతంలో హామీ ఇచ్చారని, కానీ ఇప్పటికీ పనుల్లో పురోగతి కనిపించడం లేదన్నారు. గ్రామ సర్పంచ్ కూడా పలుమార్లు ఫోన్ ద్వారా పనులు వేగవంతం చేయాలని సూచించినప్పటికీ, కాంట్రాక్టర్ మాటలకే పరిమితమవుతున్నారని తెలిపారు.పాఠశాలలో విద్యార్థుల అవసరాలను దృష్టిలో ఉంచుకొని సంబంధిత అధికారులు వెంటనే స్పందించి, పెండింగ్ బిల్లుల సమస్యను పరిష్కరించడంతో పాటు నిర్మాణ పనులను నాణ్యతతో త్వరగా పూర్తి చేయించాలని ఉపాధ్యాయులు, గ్రామస్థులు కోరుతున్నారు. అలాగే నిర్మాణ నాణ్యతపై కూడా సంబంధిత ఇంజినీరింగ్ అధికారులు సమగ్రంగా పరిశీలించి తగిన చర్యలు తీసుకోవాలని వారు విజ్ఞప్తి చేశారు.