జనరల్‌ ఫండ్‌ వినియోగంపై అభ్యంతరాలు

బెల్లంపల్లి, మంచిర్యాల జిల్లా:  బెల్లంపల్లి మున్సిపాలిటీలో జనరల్‌ ఫండ్‌ నిధుల వినియోగంపై పలువురు బీఆర్‌ఎస్‌ కౌన్సిలర్లు అభ్యంతరం వ్యక్తం చేశారు.
మున్సిపల్ సమావేశం అనంతరం విలేకరులతో మాట్లాడారు 
పాలకవర్గం అనుమతులకు సంబంధించిన స్పష్టత లేకుండానే కొన్ని పనులకు జనరల్‌ ఫండ్‌ నుంచి నిధులు ఖర్చు చేస్తున్నారంటూ వారు ఆరోపించారు. ఇప్పటికే పూర్తయిన పనులకు బిల్లులు చెల్లించాల్సి ఉండగా, ఇతర పనులకు నిధులు కేటాయించడంపై ప్రశ్నలు లేవనెత్తారు.మూడు నెలలుగా తమ వార్డులకు నిధులు అందడం లేదని పలువురు బీఆర్‌ఎస్‌ కౌన్సిలర్లు పేర్కొన్నారు. దీంతో వార్డుల్లో ప్రజలు ఎదుర్కొంటున్న సమస్యలను పరిష్కరించడంలో ఇబ్బందులు ఎదురవుతున్నాయని తెలిపారు. పట్టణంలోని పలు ప్రాంతాల్లో పందులు, కుక్కల సంచారం, పారిశుధ్య సమస్యలు ఉన్నాయని, వీటి నియంత్రణకు మున్సిపల్‌ అధికారులు తగిన చర్యలు తీసుకోవాలని కోరారు.అలాగే పట్టణంలో బెల్ట్‌ దుకాణాల నియంత్రణకు తీసుకున్న చర్యలపై అధికారులు వివరాలు వెల్లడించాలని కౌన్సిలర్లు డిమాండ్‌ చేశారు. యువత మాదకద్రవ్యాల వైపు ఆకర్షితులు కాకుండా అరికట్టేందుకు సంబంధిత శాఖలతో కలిసి ఎలాంటి చర్యలు చేపట్టారో వివరించాలని కోరారు. ప్రజలకు సంబంధించిన ప్రాథమిక సమస్యలకు ప్రాధాన్యం ఇవ్వాల్సిన అవసరంఉందని వారు పేర్కొన్నారు.
సమావేశ చిత్రీకరణపై ప్రశ్నలు
మున్సిపల్‌ సాధారణ సమావేశానికి మీడియాను అనుమతించకపోవడంపై కూడా కొందరు కౌన్సిలర్లు అభ్యంతరం వ్యక్తం చేశారు. సమావేశం ప్రారంభమైన అనంతరం కొందరు వ్యక్తులు మొబైల్‌ ఫోన్లతో సమావేశాన్ని చిత్రీకరించడంపై వారు ప్రశ్నలు లేవనెత్తారు. మీడియాకు అనుమతి ఇవ్వని పరిస్థితుల్లో ఇతర వ్యక్తులకు సమావేశాన్ని చిత్రీకరించేందుకు అవకాశం ఎలా కల్పించారో స్పష్టం చేయాలని కోరారు.సమావేశంలో చిత్రీకరించిన వీడియోలు అనంతరం సామాజిక మాధ్యమాల్లో ప్రచారం కావడంపైనా కౌన్సిలర్లు అభ్యంతరం వ్యక్తం చేశారు. సమావేశానికి సంబంధించిన చిత్రీకరణకు ఎవరి అనుమతి ఉందనే విషయాన్ని అధికారులు వెల్లడించాలని కోరారు.
అధికారుల వివరణ ఇవ్వాలని డిమాండ్‌
జనరల్‌ ఫండ్‌ నిధులను ఏయే పనులకు, ఎలాంటి అనుమతులతో ఖర్చు చేస్తున్నారనే వివరాలను ప్రజలకు, కౌన్సిలర్లకు స్పష్టంగా తెలియజేయాలని బీఆర్‌ఎస్‌ కౌన్సిలర్లు కోరారు. నిధుల వినియోగం, పనులకు ప్రాధాన్యత కేటాయింపు, మున్సిపల్‌ సాధారణ సమావేశంలో చిత్రీకరణకు అనుమతుల వ్యవహారంపై అధికారులు స్పష్టత ఇవ్వాలని డిమాండ్‌ చేశారు.పట్టణంలోని వార్డులవారీగా పెండింగ్‌లో ఉన్న సమస్యలను గుర్తించి, అందుబాటులో ఉన్న నిధులను ప్రజల అవసరాలకు అనుగుణంగా వినియోగించాలని వారు కోరారు. జనరల్‌ ఫండ్‌ ఖర్చులపై పారదర్శకత పాటించాలని, కౌన్సిలర్లకు పూర్తి వివరాలు అందించాలని డిమాండ్‌ చేశారు.