కౌన్సిల్‌ సమావేశం.. 14 అంశాలకు ఆమోదం

బెల్లంపల్లి, ఆగస్టు 31: బెల్లంపల్లి పురపాలక సంఘ కౌన్సిల్‌ సమావేశంలో ఎజెండాలో పొందుపరిచిన 14 అంశాలకు కౌన్సిల్‌ ఆమోదం తెలిపింది. సోమవారం మున్సిపల్‌ చైర్‌పర్సన్‌ అధ్యక్షతన సమావేశం నిర్వహించారు. పట్టణ అభివృద్ధి, రోడ్ల విస్తరణ, పండుగల ఏర్పాట్లు, పారిశుద్ధ్యం, తాగునీటి సరఫరా, వీధి దీపాలు, కార్యాలయ మౌలిక వసతులకు సంబంధించిన పలు ప్రతిపాదనలపై చర్చించి ఆమోదించారు.

విద్యుత్‌ స్తంభాల తొలగింపునకు రూ.9.58 లక్షలు
3 టౌన్‌ పోలీస్‌స్టేషన్‌ నుంచి ఎస్‌సీసీఎల్‌ పిరమిడ్‌ సెంటర్‌ వరకు చేపడుతున్న రోడ్డు విస్తరణ పనులకు అడ్డుగా ఉన్న విద్యుత్‌ స్తంభాలను తొలగించేందుకు టీజీఎన్‌పీడీసీఎల్‌కు రూ.4,60,425 చెల్లించేందుకు కౌన్సిల్‌ అనుమతించింది. అలాగే ఏసీపీ కార్యాలయం నుంచి గాంధీ చౌరస్తా వరకు రోడ్డు విస్తరణకు అడ్డుగా ఉన్న విద్యుత్‌ స్తంభాల తొలగింపునకు రూ.4,98,018 ఖర్చు చేసేందుకు ఆమోదం తెలిపింది.

బతుకమ్మ, దసరా ఏర్పాట్లకు రూ.5 లక్షలు
సద్దుల బతుకమ్మ, దసరా పండుగల సందర్భంగా పోచమ్మ చెరువు, గొంతమ్మ గుట్ట, జాతికుంట చెరువు, మైకోస్టేషన్‌ క్వారీ, అంబేడ్కర్‌నగర్‌ చెరువు తదితర ప్రాంతాల్లో లైటింగ్‌, స్ట్రిప్‌ లైటింగ్‌, స్టేజ్‌, ఎల్‌ఈడీ స్క్రీన్ల ఏర్పాటుకు రూ.5 లక్షలు కేటాయించారు. 1 నుంచి 34 వార్డుల్లో మహిళలు బతుకమ్మ ఆడే ప్రదేశాలు, వివిధ వీధుల్లోనూ లైటింగ్‌ ఏర్పాట్లు చేయనున్నారు.

వినాయక నిమజ్జనానికి రూ.3 లక్షలు
వినాయక నిమజ్జనం సందర్భంగా పోచమ్మ చెరువు కట్ట వద్ద లైటింగ్‌, స్టేజ్‌, సౌండ్‌, బారికేడింగ్‌, నీటి ఏర్పాట్లతో పాటు విగ్రహాల నిమజ్జనానికి అవసరమైన క్రేన్లను అద్దెకు తీసుకునేందుకు రూ.3 లక్షలు ఖర్చు చేయడానికి కౌన్సిల్‌ ఆమోదం తెలిపింది.

పారిశుద్ధ్యం, తాగునీటికి ప్రాధాన్యం
పారిశుద్ధ్యం, తాగునీటి సరఫరా పనుల నిర్వహణ కోసం అద్దె ప్రాతిపదికన జేసీబీని తీసుకునేందుకు రూ.1.50 లక్షలు కేటాయించారు. పండుగల సందర్భంగా పారిశుద్ధ్య నిర్వహణ, చెరువుల్లో గడ్డి, చెత్త తొలగింపు తదితర పనులకు రూ.98 వేలు ఖర్చు చేయడానికి అనుమతి ఇచ్చారు. ఎల్‌ఈడీ వీధి దీపాల మరమ్మతులకు అవసరమైన పీసీబీల కొనుగోలుకు రూ.లక్ష కేటాయించారు.

కార్యాలయ మౌలిక వసతులకు రూ.13.50 లక్షలు
మున్సిపల్‌ కార్యాలయ భవన నిర్మాణం అనంతరం మిగిలిన రూ.13.50 లక్షల నిధులను కార్యాలయ మౌలిక సదుపాయాల అభివృద్ధికి వినియోగించేందుకు కౌన్సిల్‌ ఆమోదం తెలిపింది. ఇంజనీరింగ్‌ విభాగంలో కొత్త కంప్యూటర్‌ కొనుగోలుకు రూ.లక్ష కేటాయించేందుకు అనుమతించింది.అలాగే బంగారు మైసమ్మ సమీపంలోని పంప్‌హౌస్‌లో మోటార్ల మరమ్మతులకు ఇప్పటికే ఖర్చయిన రూ.72,950ను చెల్లించేందుకు, ఎస్‌సీసీఎల్‌ పార్క్‌ ఫెన్సింగ్‌ పునరుద్ధరణకు రూ.లక్ష కేటాయించేందుకు ఆమోదం తెలిపింది. స్టేషనరీ, అత్యవసర పనులు, జిరాక్స్‌ తదితర అవసరాలకు రూ.60 వేలు ఖర్చు చేయడానికి అనుమతి ఇచ్చారు.మున్సిపాలిటీ పరిధిలోని 15,160 రెవెన్యూ గృహాలు, 7,098 నీటి కనెక్షన్లకు 2025–26 ఆర్థిక సంవత్సరానికి సంబంధించిన ఇంటిపన్ను, నీటి సరఫరా డిమాండ్‌ నోటీసుల ముద్రణకు అయిన ఖర్చును చెల్లించేందుకు కూడా కౌన్సిల్‌ ఆమోదం తెలిపింది. ప్రజాపాలన సభల ఫ్లెక్సీలు, ముఖ్యమంత్రి, శాసనసభ్యుల ఫొటో ఫ్రేమ్‌లకు సంబంధించిన రూ.40,650 బిల్లుల చెల్లింపునకు అనుమతి ఇచ్చింది. మొత్తంగా పట్టణ రోడ్ల విస్తరణ, విద్యుత్‌ స్తంభాల తొలగింపు, పండుగల ఏర్పాట్లు, పారిశుద్ధ్యం, తాగునీరు, వీధి దీపాలు, కార్యాలయ మౌలిక వసతులకు సంబంధించిన 14 అంశాలకు కౌన్సిల్‌ ఆమోదం తెలిపినట్లు పేర్కొన్నారు..