మా మాట వినరు..సమాచారం ఇవ్వరు!

-సర్పంచుల నిరసనతో వాడివేడిగా మర్రిగూడ జనరల్ బాడీ సమావేశం

--ఇందిరమ్మ ఇళ్ల కేటాయింపులో అక్రమాలపై అధికారులను నిలదీత 

--లబ్ధిదారుల ఎంపికలో సమాచారం ఇవ్వడం లేదని ఆగ్రహం

--మా పాత్రను మీరే తీసుకోండి...జవాబు చెప్పుకోలేకపోతున్నాం 

విచారణ జరిపి చర్యలు తీసుకుంటామని ట్రైనీ కలెక్టర్ హామీ

నల్గొండ/మర్రిగూడ : మర్రిగూడ మండల పరిషత్ కార్యాలయంలో బుధవారం నిర్వహించిన సాధారణ సర్వసభ్య సమావేశం తీవ్ర నిరసనలు, ప్రజాప్రతినిధుల ఆగ్రహ జ్వాలల మధ్య వాడివేడిగా, రసాభాసగా సాగింది. గ్రామాల అభివృద్ధి, సంక్షేమ పథకాల అమలుపై చర్చించేందుకు ఏర్పాటు చేసిన ఈ సమావేశంలో అధికారుల తీరుపై సర్పంచులు తీవ్ర స్థాయిలో ధ్వజమెత్తారు.

అధికారుల ఏకపక్ష నిర్ణయాలు – పారదర్శకత శూన్యం

ప్రభుత్వం అమలు చేస్తున్న వివిధ సంక్షేమ పథకాలు, ముఖ్యంగా పేదలకు అందించే ఇందిరమ్మ ఇళ్ల కేటాయింపుల్లో ఎంపీడీవో కార్యాలయ అధికారులు తమకు ఎలాంటి ముందస్తు సమాచారం అందించడం లేదని సర్పంచులు ఆరోపించారు. గ్రామానికి మంజూరైన పథకాలు, లబ్ధిదారుల ఎంపిక ప్రక్రియలో స్థానిక ప్రజాప్రతినిధులను పూర్తిగా పక్కన పెడుతున్నారని యరుగండ్లపల్లి సర్పంచ్ సంతోష్ యాదవ్, కుదబక్ష్‌పల్లి సర్పంచ్ పందుల జయలక్ష్మి తీవ్ర అసహనం వ్యక్తం చేశారు.ముఖ్యంగా ఐదు గ్రామాల సర్పంచులకు తీవ్ర అన్యాయం
 జరుగుతోందని యరుగండ్లపల్లి సర్పంచ్ సంతోష్ అధికారులను నిలదీశారు. ఎంపీడీవో, ఎంపీవోలు క్షేత్రస్థాయి సిబ్బందిపై అనవసర ఒత్తిడి తెస్తూ తమకు తెలియకుండా నిర్ణయాలు తీసుకుంటున్నారని కుదబక్ష్‌పల్లి సర్పంచ్ పందుల జయలక్ష్మి ఆరోపించారు. "మా మాట వినకపోతే, గ్రామాల్లో మా పాత్రను మీరే నిర్వహించుకోండి" అంటూ ఆగ్రహం వ్యక్తం చేశారు.

క్షేత్రస్థాయిలో జవాబు చెప్పుకోలేకపోతున్నాం 

గ్రామాల్లో ఎదురవుతున్న తీవ్ర ప్రజా సమస్యలను పరిపాలనాధికారుల దృష్టికి తీసుకెళ్తే కనీసం పట్టించుకోవడం లేదని, తీవ్ర నిర్లక్ష్యంగా వ్యవహరిస్తున్నారని పలువురు సర్పంచులు ఆవేదన వ్యక్తం చేశారు. ప్రజాస్వామ్యంలో స్థానిక సంస్థల ప్రజాప్రతినిధులకు ఇచ్చే గౌరవం ఇదేనా అని సూటిగా ప్రశ్నించారు. అధికారుల వైఖరి వల్ల గ్రామాల్లోకి వెళ్లినప్పుడు ప్రజలకు ఏం జవాబు చెప్పాలో అర్థం కావడం లేదని వాపోయారు.

విచారణ చేపడతాం ట్రైనీ కలెక్టర్

సమావేశం రసాభాసగా మారడంతో అక్కడకు చేరుకున్న ట్రైనీ కలెక్టర్ శ్రీకాంత్ రెడ్డి వెంటనే జోక్యం చేసుకున్నారు. సర్పంచులు లేవనెత్తిన అంశాలపై స్పందిస్తూ.. మర్రిగూడ మండలంలోని ప్రతి గ్రామాన్ని స్వయంగా సందర్శించి, ఇందిరమ్మ ఇళ్ల కేటాయింపులు మరియు సంక్షేమ పథకాల ఎంపికపై క్షేత్రస్థాయిలో సమగ్ర విచారణ చేపడతామని స్పష్టం చేశారు. బాధ్యులైన అధికారులపై చట్టరీత్యా తగిన చర్యలు తీసుకుంటామని ఆయన ఖచ్చితమైన హామీ ఇవ్వడంతో సర్పంచులు తమ నిరసనను విరమించారు. దీంతో సమావేశంలో ఉత్కంఠ వాతావరణం సద్దుమణిగింది.