-దండారి నృత్యాలు డోలీ చప్పులతో ఘన స్వాగతం

*-గతంలో చేసిన సేవలను కొనియాడిన బాదిగూడ గ్రామస్తులు..
 
రాథోడ్ బాపురావుకు అండగా ఉంటామని వెల్లడి*

గుస్సాడిలు గ్రామస్తుల తో కలిసి దండారి నృత్యలు చేసిన బోథ్ మాజీ ఏమ్మెల్యే 

 ఆదిలాబాద్ బ్యూరో : ఆదివాసీ సంస్కృతి, సంప్రదాయాలకు ప్రతీకగా నిలిచే దండారి ఉత్సవాలు గిరిజన గ్రామాల్లో ఉత్సాహభరితంగా కొనసాగుతున్నాయి. ఈ నేపథ్యంలో ఇచ్చోడ మండలం బాదిగూడ గ్రామంలో నిర్వహించిన దండారి ఉత్సవాల్లో తెలంగాణ రక్షణ సేన  పార్టీ జిల్లా అధ్యక్షులు బోథ్ మాజీ ఎమ్మెల్యే రాథోడ్ బాపురావు  పాల్గొని సందడి చేశారు. గ్రామానికి చేరుకున్న ఆయనకు స్థానికులు ఘనంగా స్వాగతం పలికారు. *గ్రామస్తులతో కలిసి ఉత్సవాల్లో పాల్గొని ఆదివాసీ సంప్రదాయాల పట్ల తనకున్న అభిమానాన్ని చాటుకున్నారు. ఈ సందర్భంగా ముందుగా గిరిజనుల ఆరాధ్య దైవం, ఆదివాసీ హక్కుల కోసం పోరాడిన వీరుడు కొమురం భీం విగ్రహానికి రాథోడ్ బాపురావు  పూలమాలలు వేసి ఘనంగా నివాళులర్పించారు. కొమురం భీం ఆశయాలు, పోరాట స్ఫూర్తిని స్మరించుకున్నారు. ఆదివాసీల ఆత్మగౌరవం, సంస్కృతి, సంప్రదాయాల పరిరక్షణకు ప్రతి ఒక్కరూ కృషి చేయాలని ఈ సందర్భంగా పేర్కొన్నారు. అనంతరం గ్రామస్తులు, స్థానిక నాయకులు, యువకులతో ఆయన ఆత్మీయంగా ముచ్చటించారు. గతంలో ఎమ్మెల్యేగా పనిచేసిన సమయంలో  రాథోడ్ బాపురావు  గ్రామీణ ప్రాంతాల అభివృద్ధికి అందించిన సహకారాన్ని గ్రామస్తులు గుర్తుచేసుకున్నారు. ప్రజల సమస్యలను తెలుసుకుంటూ, గ్రామాల అవసరాలకు అనుగుణంగా అభివృద్ధి కార్యక్రమాలకు ప్రాధాన్యత ఇచ్చారని కొనియాడారు. ప్రజలకు అందుబాటులో ఉంటూ, ఆపద సమయంలో అండగా నిలిచిన నాయకుడిగా ఆయనను అభివర్ణించారు. ఎమ్మెల్యేగా ఉన్న సమయంలో గ్రామీణ ప్రాంతాల ప్రజలతో ఏర్పరచుకున్న అనుబంధాన్ని గ్రామస్తులు ప్రత్యేకంగా ప్రస్తావించారు. పదవిలో ఉన్నా లేకపోయినా ప్రజలతో కలిసిమెలిసి ఉండే స్వభావం ఆయనకు ఉందని పేర్కొన్నారు. రాజకీయాలకు అతీతంగా గ్రామ ప్రజలతో సత్సంబంధాలు కొనసాగించడం అభినందనీయమని అన్నారు. ఈ సందర్భంగా గ్రామస్తులు తమ మద్దతును స్పష్టంగా ప్రకటించారు. గతంలో తమ గ్రామానికి, ప్రాంతానికి చేసిన సేవలను మరువలేమని, భవిష్యత్తులోనూ మాజీ ఏమ్మెల్యే రాథోడ్ బాపురావు  వెంటే ఉంటామని వెల్లడించారు. ఆయనకు తమ సంపూర్ణ సహకారం అందిస్తామని భరోసా ఇచ్చారు. గ్రామస్తుల అభిమానానికి మాజీ ఎమ్మెల్యే రాథోడ్ బాపురావు కృతజ్ఞతలు తెలిపారు. దండారి ఉత్సవాలు కేవలం వేడుకలు మాత్రమే కాకుండా ఆదివాసీ సమాజ ఐక్యతకు, తరతరాలుగా వస్తున్న సంస్కృతి పరిరక్షణకు వేదికలుగా నిలుస్తాయని పలువురు అభిప్రాయపడ్డారు. సంప్రదాయ నృత్యాలు, ఆచార వ్యవహారాల ద్వారా గిరిజనుల జీవన విధానం, కళా వైభవం ప్రతిబింబిస్తాయని పేర్కొన్నారు. బాదిగూడ గ్రామంలో జరిగిన ఈ కార్యక్రమం ఆదివాసీ సంప్రదాయాల పట్ల ఉన్న గౌరవంతో పాటు మాజీ ఎమ్మెల్యే రాథోడ్ బాపురావుకు గ్రామస్తులతో ఉన్న అనుబంధాన్ని మరోసారి చాటిచెప్పింది. ఉత్సవాల సందర్భంగా గ్రామంలో పండుగ వాతావరణం నెలకొంది. స్థానికులు, యువత, గిరిజన పెద్దలు ఉత్సాహంగా పాల్గొన్నారు.ఈ కార్యక్రమం లో గ్రామ పటేన్లు, మండల్ కన్వీనర్ షేక్ భిలాల్ బాయ్, మైనార్టీ మండల చైర్మన్ షేక్ ఫారీద్, సిరికొండా మండల్ కన్వీనర్ సతీష్ జాదవ్, గులాబ్, జైనున్ హస్సేన్ ,అత్తహుళ్ల కలిమ్,  గ్రామ పెద్దలు గ్రామస్తులు తదితరులు పాల్గొన్నారు.