జేఎన్‌టీయూహెచ్ సుల్తాన్‌పూర్‌ కళాశాలలో టీసీఎస్ ఐయాన్ జాబ్ అచీవర్ ప్రోగ్రామ్‌పై అవగాహన కార్యక్రమం

చౌటకూర్ : సంగారెడ్డి జిల్లా చౌటకూర్ మండలం పరిధిలోని సుల్తాన్‌పూర్‌లోని జేఎన్‌టీయూహెచ్ యూనివర్సిటీ కాలేజ్ ఆఫ్ ఇంజినీరింగ్‌లో శిక్షణ, ఉపాధి విభాగం ఆధ్వర్యంలో టీసీఎస్ ఐయాన్ జాబ్ అచీవర్ ప్రోగ్రామ్‌ పై అవగాహన కార్యక్రమాన్ని నిర్వహించారు. ఈ కార్యక్రమానికి కళాశాలలో ఇంజినీరింగ్‌ మూడో, నాలుగో సంవత్సరం చదువుతున్న విద్యార్థులు హాజరయ్యారు. ఈ సందర్భంగా కళాశాల ప్రిన్సిపల్ డాక్టర్ ఎస్. విశ్వనాథ రాజు మాట్లాడుతూ, ప్రస్తుత పోటీ ప్రపంచంలో విద్యార్థులు కేవలం విద్యా పరిజ్ఞానానికే పరిమితం కాకుండా, పరిశ్రమలకు అవసరమైన సాంకేతిక నైపుణ్యాలు, ఉద్యోగ సామర్థ్యాలను పెంపొందించుకోవాలని సూచించారు. నైపుణ్యాభివృద్ధికి ప్రాధాన్యమిస్తూ, ఉద్యోగ అవకాశాలను అందిపుచ్చుకునేందుకు విద్యార్థులు నిరంతరం కృషి చేయాలని తెలిపారు.అనంతరం కళాశాల ప్లేస్‌మెంట్ అధికారి డాక్టర్ ఎం. శైలజ మాట్లాడుతూ, విద్యార్థులకు ఉద్యోగ అవకాశాలపై అవగాహన కల్పించడంతో పాటు, పరిశ్రమల అవసరాలకు అనుగుణంగా వారిని తీర్చిదిద్దడంలో ఇటువంటి కార్యక్రమాలు కీలక పాత్ర పోషిస్తాయని పేర్కొన్నారు. ఈ అవగాహన సదస్సులు విద్యార్థుల కెరీర్ పురోగతికి, క్యాంపస్ నియామకాల్లో మెరుగైన అవకాశాలు పొందేందుకు దోహదపడతాయని తెలిపారు.కార్యక్రమానికి టీసీఎస్ ఐయాన్ ప్రతినిధులు, విషయ నిపుణులు  లీనా, శ్రీ నరేంద్ర, శ్రీ చైతన్య ముఖ్య అతిథులుగా హాజరయ్యారు. వారు విద్యార్థులకు జాబ్ అచీవర్ ప్రోగ్రామ్ ప్రాముఖ్యతను వివరించారు. ప్రెజెంటేషన్‌ ద్వారా ప్రస్తుత ఉద్యోగ రంగంలో నెలకొన్న పోటీ, ఉద్యోగ అవకాశాలను గుర్తించడం, అవసరమైన నైపుణ్యాలను అభివృద్ధి చేసుకోవడం, ఉద్యోగ సాధనకు అనుసరించాల్సిన విధానాలపై అవగాహన కల్పించారు. విద్యార్థులు తమ లక్ష్యాలకు అనుగుణంగా నైపుణ్యాలను పెంపొందించుకుంటూ, ఉద్యోగ నియామక ప్రక్రియలకు ముందస్తుగా సిద్ధం కావాలని నిపుణులు సూచించారు. పరిశ్రమల అవసరాలను అర్థం చేసుకుని, తమ ప్రతిభను మెరుగుపరుచుకోవడం ద్వారా మెరుగైన కెరీర్ అవకాశాలను సాధించవచ్చని వివరించారు.ఈ కార్యక్రమంలో కళాశాల అధ్యాపకులు, శిక్షణ, ఉపాధి విభాగం ప్రతినిధులు, మూడో మరియు నాలుగో సంవత్సరం విద్యార్థులు పాల్గొన్నారు.ఈ అవగాహన కార్యక్రమం విద్యార్థులకు ఉద్యోగ అవకాశాలపై స్పష్టతనివ్వడంతో పాటు, భవిష్యత్తులో తమ కెరీర్‌ను సమర్థవంతంగా నిర్మించుకునేందుకు ఉపయోగపడింది.