బిజినపల్లి మండలంలో ఘనంగా చాకలి ఐలమ్మ 131వ జయంతి వేడుకలు

నాగర్ కర్నూల్  : నాగర్ కర్నూల్ జిల్లా బిజినపల్లి మండల కేంద్రంలోని మహాత్మా జ్యోతిరావు పూలే - డా.బి.ఆర్.అంబేద్కర్ చౌరస్తాలో తెలంగాణ వీరవనిత చాకలి ఐలమ్మ 131వ జయంతి వేడుకలను బీసీ, ఎస్సీ, ఎస్టీ సంఘాల నాయకులు గురువారం ఘనంగా నిర్వహించారు.ముందుగా పూలే, అంబేద్కర్ విగ్రహాలకు పూలమాలలు వేసిన అనంతరం, చాకలి ఐలమ్మ చిత్రపటానికి పూలమాల వేసి జయంతి వేడుకలు ఘనంగా నిర్వహించిన్నారు.

ఐలమ్మ పోరాటం - స్ఫూర్తి:
ఈ సందర్భంగా వక్తలు ఐలమ్మ జీవితాన్ని గుర్తు చేసుకున్నారు. భూమి కోసం, భుక్తి కోసం, వెట్టిచాకిరీ విముక్తి కోసం నిజాం కాలంలో రజాకార్లకు, విసునూర్ దేశ్‌ముఖ్ రామచంద్రారెడ్డి దౌర్జన్యానికి ఎదురు తిరిగిన ధీరవనిత ఐలమ్మ అని కొనియాడారు.1919లో వరంగల్ జిల్లా క్రిష్ణాపురంలో రజక కుటుంబంలో పుట్టిన ఐలమ్మ, తన భూమిని లాక్కోవాలని చూసిన దొరలపై కర్ర, రాళ్లతోనే తిరుగుబాటు చేసి తెలంగాణ సాయుధ పోరాటానికి నాంది పలికిందని, ఆమె తెగువ నేటి మహిళా లోకానికి, బహుజన సమాజానికి ఆదర్శమని అన్నారు.ఈ జయంతి వేడుకలకు బీసీ సంఘం మండల అధ్యక్షులు, జిల్లా, రాష్ట్ర నాయకులు పెద్ద సంఖ్యలో హాజరయ్యారు. ముఖ్య వక్తలుగా రాష్ట్ర నాయకులు పచ్చిపాల.సుబ్బయ్య, మేకల శివ యాదవ్,హాజరై ప్రసంగించారు.