శేరిలింగంపల్లి జోన్‌లో పారిశుద్ధ్యంపై సమగ్ర సమీక్ష 

శేరిలింగంపల్లి : జోన్‌లో పారిశుద్ధ్య నిర్వహణను మరింత పటిష్టం చేయడంపై అధికారులు సమగ్ర సమీక్ష సమావేశం నిర్వహించారు. జోన్ పరిధిలోని పారిశుద్ధ్య కార్యకలాపాల పురోగతిని సమీక్షించేందుకు డిప్యూటీ కమిషనర్లు, డిప్యూటీ ఎగ్జిక్యూటివ్ ఇంజినీర్లు (SWM), అసిస్టెంట్ ఎగ్జిక్యూటివ్ ఇంజినీర్లు (SWM), SRPలు, SFAలు సమావేశంలో పాల్గొన్నారు. ఈ సందర్భంగా పారిశుద్ధ్య సిబ్బంది హాజరు, సిబ్బంది నియామకం, గ్యాంగ్‌ల పనితీరును సమీక్షించారు. GVPల (Garbage Vulnerable Points) నుంచి వ్యర్థాల తొలగింపు, SAT ఆటోల స్కానింగ్‌ పర్యవేక్షణపై అధికారులకు సూచనలు చేశారు. బల్క్ వేస్ట్, గృహ వ్యర్థాలు, నిర్మాణ–కూల్చివేత (C&D) వ్యర్థాలు, గ్రీన్ వేస్ట్‌ను సమర్థవంతంగా సేకరించి, నిబంధనల ప్రకారం తరలించి, పారవేయాలని ఆదేశించారు. అందుబాటులో ఉన్న స్వీపింగ్ మెషీన్లను సమర్థవంతంగా వినియోగించాలని, గ్రీన్ వేస్ట్ సేకరణ–నిర్వహణను మరింత బలోపేతం చేయాలని సూచించారు. అలాగే చలాన్ల జారీ, ప్రజల ఫిర్యాదులపై ప్రతిరోజూ ఫాలోఅప్, Bulk Waste Generators (BWG) రిజిస్ట్రేషన్ మరియు నిబంధనల అమలును పర్యవేక్షించాలని అధికారులకు సూచించారు. ‘No Bin, No Trade’ నిబంధనను కచ్చితంగా అమలు చేయాలని స్పష్టం చేశారు. SWM Rules, 2026లోని కీలక నిబంధనలను అధికారులకు వివరించి, క్షేత్రస్థాయిలో వాటిని కచ్చితంగా అమలు చేయాలని ఆదేశించారు. నిరంతర ఫీల్డ్ మానిటరింగ్, అధికారుల బాధ్యత, ప్రజా ఫిర్యాదుల సకాలంలో పరిష్కారం, నిర్దేశిత ఘన వ్యర్థాల నిర్వహణ నిబంధనల అమలుకు ప్రాధాన్యం ఇవ్వాలని సూచించారు. శేరిలింగంపల్లి జోన్‌లో పారిశుద్ధ్య ప్రమాణాలను మరింత మెరుగుపరచేందుకు అధికారులు నిరంతరం క్షేత్రస్థాయిలో పర్యవేక్షణ చేపట్టి, సిబ్బంది పనితీరుపై జవాబుదారీతనాన్ని పెంచాలని సమావేశంలో దిశానిర్దేశం చేశారు.