మర్రిగూడ మండలంలో విషాదం.

నల్గొండ జిల్లా, మర్రిగూడ మండలం ఖుదాబక్షిపల్లి గ్రామానికి చెందిన ప్రముఖ ప్రజాసేవకుడు, సామాజిక కార్యకర్త మరియు స్టార్ హెల్త్ ఇన్సూరెన్స్ అడ్వైజర్ అయిన నీల భాస్కర్ గత కొన్ని రోజులుగా అనారోగ్యంతో ఆసుపత్రిలో చికిత్స పొందుతూ గురువారం రాత్రి మృతి చెందారు.ఆయన అకాల మరణ వార్త ఖుదాబక్షిపల్లి గ్రామస్తులతో పాటు, స్టార్ హెల్త్ ఇన్సూరెన్స్ వనస్థలిపురం బ్రాంచ్ కార్యాలయ సిబ్బందిని తీవ్ర దిగ్భ్రాంతికి గురిచేసింది.

సమాజ సేవలో భాస్కర్ ముద్ర

నీల భాస్కర్ కేవలం ఒక ఇన్సూరెన్స్ అడ్వైజర్‌గానే కాకుండా, నిస్వార్థ ప్రజాసేవకుడిగా స్థానికంగా విశేష సేవలందించారు. ఖుదాబక్షిపల్లి గ్రామంలో ‘యువభారత్ యూత్’ సంఘాన్ని స్థాపించి, పాఠశాల విద్యార్థులకు వివిధ పోటీలు నిర్వహించి బహుమతులు అందజేశారు. అలాగే, యువభారత్ యూత్ వేదికగా గ్రామ ప్రజలకు, పేదలకు, వృద్ధులకు అనేక సేవా కార్యక్రమాలు చేపట్టి ప్రజల మన్ననలు పొందారు. గ్రామంలోని వృద్ధులకు చేతికర్రలు, ఆర్థిక సహాయం అందించి అందరిచేత మంచి వ్యక్తిగా ప్రశంసలు అందుకున్నారు.

వైద్య రంగంలోనూ సేవలు

స్టార్ హెల్త్ ఇన్సూరెన్స్ అడ్వైజర్‌గా బాధ్యతలు నిర్వర్తిస్తూ, కేవలం వ్యాపార దృక్పథం కాకుండా ఎందరో కస్టమర్లకు, ప్రజలకు కష్టకాలంలో అండగా నిలిచి మెరుగైన వైద్య సేవలు అందేలా తోడ్పాటునందించారు. సమాజం పట్ల నిరంతరం తపన ఉండే గొప్ప వ్యక్తి అకాల మరణం చెందడం పట్ల పలువురు రాజకీయ, సామాజిక నాయకులు తీవ్ర సంతాపం వ్యక్తం చేశారు. భాస్కర్ మరణం ఖుదాబక్షిపల్లి గ్రామ ప్రజలకు, ఆయన కుటుంబ సభ్యులకు, మిత్రులకు తీరని లోటని పలువురు పేర్కొన్నారు. ఆయన చేసిన సేవలు గ్రామ ప్రజల గుండెల్లో ఎప్పటికీ చిరస్థాయిగా నిలిచిపోతాయని కొనియాడారు.ఈ దుఃఖ సమయంలో కుటుంబ సభ్యులను ఓదార్చి,నాయకులు మరియు శ్రేయోభిలాషులు తమ ప్రగాఢ సానుభూతిని తెలిపారు. భగవంతుడు వారి ఆత్మకు శాంతి చేకూర్చాలని, కుటుంబ సభ్యులకు మనోధైర్యాన్ని ప్రసాదించాలని ప్రార్థించారు.