లో వోల్టేజ్ సమస్యతో రోడ్డెక్కిన రైతులు

బిచ్కుంద,  : పార్టీలకతీతంగా రైతులంతా ఒక్కటై జై కిసాన్ నినాదాలతో రైతుల సమస్యలు తీర్చాలంటూ రోడ్డెక్కారు. పంటలకు అవసరమైన విద్యుత్‌ను అందించాలని, త్రీఫేజ్ విద్యుత్ సరఫరాలో నెలకొన్న సమస్యలను పరిష్కరించాలని రైతులు డిమాండ్ చేశారు. కామారెడ్డి జిల్లా బిచ్కుంద మండలంలోని ఇస్రాత్‌పూర్, సీతారాం పల్లి, మానేపూర్, రాజాపూర్, ఎల్లారం తదితర గ్రామాలకు చెందిన రైతులు శుక్రవారం రోడ్డుపై బైఠాయించి నిరసన వ్యక్తం చేశారు. 161 జాతీయ రహదారిపై రైతులు నిరసన చేపట్టడంతో కొంతసేపు వాహనాల రాకపోకలకు అంతరాయం ఏర్పడింది. రైతులు మాట్లాడుతూ.. వ్యవసాయానికి సరైన విద్యుత్ సరఫరా లేకపోవడంతో బోర్లు పనిచేయడం లేదని, పంటలు ఎండిపోయే పరిస్థితి నెలకొందని ఆవేదన వ్యక్తం చేశారు. తక్కువ వోల్టేజ్ కారణంగా మోటార్లు కాలిపోతున్నాయని, విద్యుత్ శాఖ అధికారులు సమస్యను పరిష్కరించడంలో నిర్లక్ష్యం చేస్తున్నారని ఆరోపించారు. విద్యుత్ సమస్యను వెంటనే పరిష్కరించి రైతులకు నాణ్యమైన త్రీఫేజ్ విద్యుత్ సరఫరా చేయాలని డిమాండ్ చేశారు. సమస్య పరిష్కారం కాకపోతే ఆందోళనను మరింత ఉధృతం చేస్తామని రైతులు హెచ్చరించారు. కాగా, రైతుల ఆందోళనకు సంబంధించిన అంశంపై ఇటీవలి కాలంలో తెలంగాణలోని ఇతర ప్రాంతాల్లోనూ విద్యుత్ సరఫరా సమస్యలపై రైతుల నిరసనలు నమోదయ్యాయి.