ఎల్‌నినో ప్రభావంతో వ్యవసాయంపై ప్రతికూల ప్రభావం.

కామారెడ్డి/ బాన్సువాడ :ఎల్‌నినో ప్రభావం కారణంగా రానున్నమూడు, నాలుగు సంవత్సరాల్లో వాతావరణ పరిస్థితుల్లో మార్పులు చోటుచేసుకునే అవకాశం ఉందని, దీని ప్రభావం వ్యవసాయ రంగంపై పడే అవకాశం ఉన్నందున రైతులు ఇప్పటి నుంచే ముందస్తు జాగ్రత్తలు తీసుకోవాలని బాన్సువాడ నియోజకవర్గ మున్నూరు కాపు సంఘం యూత్ అధ్యక్షుడు భాస్కర్ సూచించారు. ప్రస్తుతం రైతులు పండించిన పంటను మొత్తం ఒకేసారి విక్రయించకుండా, తమ కుటుంబ అవసరాలకు సరిపడా కొంత ధాన్యాన్ని నిల్వ చేసుకోవాలని ఆయన కోరారు. మిగిలిన ధాన్యాన్ని మార్కెట్ పరిస్థితులను బట్టి దశలవారీగా విక్రయించు కోవడం ద్వారా మెరుగైన ధర పొందే అవకాశం ఉంటుందన్నారు. వాతావరణ మార్పుల కారణంగా వర్షపాతం, ఉష్ణోగ్రతలు, పంటల దిగుబడుల్లో అనిశ్చితి ఏర్పడే అవకాశం ఉన్నందున రైతులు పంటల ఎంపికలోనూ జాగ్రత్తలు పాటించాలని సూచించారు. నీటి లభ్యత, నేల స్వభావం, మార్కెట్ డిమాండ్‌ను దృష్టిలో పెట్టుకొని పంటల సాగుపై వ్యవసాయ అధికారుల సలహాలు తీసుకోవాలని అన్నారు. అలాగే పంట ద్వారా వచ్చిన ఆదాయాన్ని పూర్తిగా ఖర్చు చేయకుండా కొంత మొత్తాన్ని భవిష్యత్ అవసరాల కోసం పొదుపు చేసుకోవాలని భాస్కర్ సూచించారు. విత్తనాలు, ఎరువులు, పురుగుమందులు, వ్యవసాయ పనుల ఖర్చులు పెరిగే అవకాశం ఉన్న నేపథ్యంలో రైతులు ఆర్థికంగా ముందస్తు ప్రణాళికతో వ్యవహరించాల్సిన అవసరం ఉందన్నారు. రైతులు ధాన్యం నిల్వ చేసుకునే సమయంలోతేమ లేకుండా, పురుగులు, ఎలుకల బారిన పడకుండా తగిన జాగ్రత్తలు తీసుకోవాలని సూచించారు. వ్యవసాయ శాఖ అధికారులు అందించే సూచనలు, వాతావరణ హెచ్చరికలను ఎప్పటికప్పుడు తెలుసుకుంటూ సాగు నిర్ణయాలు తీసుకోవాలని కోరారు. ప్రస్తుత పంట ఆదాయాన్ని భవిష్యత్ భద్రతకు ఉపయోగించుకోవడం ద్వారా రైతు కుటుంబాలు ఆర్థికంగా స్థిరంగా ఉండేందుకు అవకాశం ఉంటుందని భాస్కర్ పేర్కొన్నారు.