జర్నలిస్టుల సమస్యలు పరిష్కరించాలి

పెద్దపల్లి:  జర్నలిస్టుల హక్కులు, భద్రతను పరిరక్షిస్తూ వారి దీర్ఘకాలిక సమస్యలను పరిష్కరించాలని టీయూడబ్ల్యూజే-ఐజేయూ నాయకులు డిమాండ్‌ చేశారు. ఐజేయూ జాతీయ కార్యవర్గ నిర్ణయం మేరకు మహాత్మాగాంధీ జయంతిని పురస్కరించుకుని శుక్రవారం పెద్దపల్లి జిల్లా కేంద్రంలో ‘జర్నలిస్టుల డిమాండ్స్‌ డే’ నిర్వహించారు. తొలుత గాంధీజీ విగ్రహానికి పూలమాల వేసి  నివాళులర్పించారు. విధి నిర్వహణలో ప్రాణాలు కోల్పోయిన జర్నలిస్టుల స్మారకార్థం రెండు నిమిషాలు మౌనం పాటించారు. నల్లబ్యాడ్జీలు ధరించి నిరసన తెలిపి, అనంతరం కలెక్టరేట్‌కు చేరుకుని అధికారులకు వినతిపత్రం సమర్పించారు. టీయూడబ్ల్యూజే-ఐజేయూ జిల్లా అధ్యక్షుడు మల్లవర్జుల వంశీ విద్యానంద్, ప్రధాన కార్యదర్శి నారాయణదాసు అశోక్‌ మాట్లాడుతూ.. జర్నలిస్టుల రక్షణకు ప్రత్యేక కేంద్ర చట్టం తీసుకురావాలని, డిజిటల్‌ యుగానికి అనుగుణంగా సమగ్ర మీడియా కమిషన్‌ ఏర్పాటు చేయాలని కోరారు. పెండింగ్‌లో ఉన్న వేతన సవరణలను చేపట్టి నూతన వేతన మండలిని ఏర్పాటు చేయాలని డిమాండ్‌ చేశారు. జర్నలిస్టులకు ఇళ్లు, ఇళ్ల స్థలాలు, హెల్త్‌ కార్డులు కల్పించాలని, ఆర్టీసీ బస్సుల్లో ఉచిత ప్రయాణ సౌకర్యం కల్పించడంతో పాటు రైల్వే పాసులను పునరుద్ధరించాలని కోరారు. సమస్యలను పరిష్కరించకపోతే భవిష్యత్తులో జిల్లావ్యాప్తంగా శాంతియుత ఆందోళనలు చేపడతామని హెచ్చరించారు. కార్యక్రమంలో టీయూడబ్ల్యూజే-ఐజేయూ ప్రతినిధులు, ప్రింట్‌, ఎలక్ట్రానిక్‌, డిజిటల్‌ మీడియా జర్నలిస్టులు పాల్గొన్నారు.