గురువారం గ్రామ, వార్డు సభలు

మల్యాల, భారత ఎన్నికల సంఘం ఆదేశాల మేరకు ఓటరు జాబితాల ప్రత్యేక సమగ్ర సవరణ లో భాగంగా ఈ నెల 27న జిల్లాలోని అన్ని పోలింగ్ కేంద్రాల పరిధిలో గ్రామసభలు, వార్డుసభలు నిర్వహించనున్నట్లు జిల్లా కలెక్టర్, జిల్లా ఎన్నికల అధికారి బి. సత్యప్రసాద్ తెలిపారు. గ్రామీణ ప్రాంతాల్లోని గ్రామ పంచాయతీ భవనాల్లో, పట్టణాల్లో సంబంధిత పోలింగ్ కేంద్రాల్లో ఈ సభలు జరుగుతాయని పేర్కొన్నారు. ​ఈ సభల్లో బూత్ స్థాయి అధికారులు, ఎన్నికల పాఠశాల సభ్యులు పాల్గొని ముసాయిదా ఓటరు జాబితాలోని పేర్లను ప్రజల సమక్షంలో చదివి వినిపిస్తారని వెల్లడించారు. ​కొత్త ఓటర్ల నమోదు (ఫారం-6): 2026 అక్టోబర్ 1 నాటికి 18 సంవత్సరాలు నిండే యువతీ యువకులు డిక్లరేషన్‌తో పాటు అవసరమైన ధ్రువీకరణ పత్రాలు జతచేసి ఫారం-6 ద్వారా దరఖాస్తు చేసుకోవాలి. ​మార్పులు, చేర్పులు (ఫారం-8): పేరు, వయస్సు, చిరునామా, ఫొటో తదితర వివరాల్లో తప్పులుంటే సవరణ కోసం తగిన ఆధారాలతో ఫారం-8 సమర్పించాలి. ​తొలగింపులు/అభ్యంతరాలు (ఫారం-7): అర్హత లేని వ్యక్తుల పేర్లు జాబితాలో ఉంటే అదే నియోజకవర్గానికి చెందిన ఓటర్లు ఫారం-7 ద్వారా అభ్యంతరాలు తెలపవచ్చు. ​ప్రజలు, ముఖ్యంగా యువత ఈ అవకాశాన్ని సద్వినియోగం చేసుకొని ఓటరు జాబితాలో తమ పేర్లను సరిచూసుకోవాలని కలెక్టర్ కోరారు. సభల నిర్వహణలో ఈఆర్వోలు, ఏఈఆర్వోలు, బీఎల్‌ఓలు, మున్సిపల్, పంచాయతీ అధికారులు సమన్వయంతో పనిచేయాలని ఆదేశించారు.