ఎంక్వయిరీ లేకుండానే మెమోలు...

సూర్యాపేట : అంగన్వాడీ కేంద్రం వ్యవహారంలో అధికారుల తీరుపై విమర్శలు వెల్లువెత్తుతున్నాయి. కేంద్రం నిర్వహణ, టీచర్ సమయపాలన తదితర అంశాలపై వార్తలు వెలువడిన నేపథ్యంలో అధికారులు స్పందించినప్పటికీ..పూర్తి స్థాయిలో ఎంక్వయిరీ నిర్వహించకుండానే ఆ టీచర్ ను గుట్టుచప్పుడుగా ఆఫీసుకు పిలిచి మెమోలు జారీ చేశారనే ఆరోపణలు వినిపిస్తున్నాయి.
వాస్తవాలు తెలుసుకోకుండానే మెమోలు ఎందుకు..?
ఏదైనా ఆరోపణపై ముందుగా క్షేత్రస్థాయిలో విచారణ చేపట్టి, సంఘటనకు సంబంధించిన వాస్తవాలను సేకరించాలి. సంబంధిత సిబ్బంది వివరణ తీసుకున్న అనంతరం నిబంధనల ప్రకారం చర్యలు తీసుకోవాల్సి ఉంటుంది. అయితే ఇక్కడ అందుకు భిన్నంగా వ్యవహరించారనే విమర్శలు వస్తున్నాయి. దీంతో అసలు సమస్య ఏమిటి..? ఎవరి తప్పిదం ఉంది..? అనే విషయాలు పక్కనపెట్టి మెమోలతో సరిపెట్టుకున్నారా అనే ప్రశ్నలు తలెత్తుతున్నాయి.
వార్తలపై స్పందన.. కానీ విచారణ ఏది..?
అంగన్వాడీ కేంద్రంలో టీచర్ సమయపాలన, చిన్నారులు ఎదురుచూడాల్సిన పరిస్థితి తదితర అంశాలపై వరుసగా వార్తలు రావడంతో అధికారులు స్పందించాల్సిన పరిస్థితి ఏర్పడింది. అయితే వార్తల్లో వచ్చిన అంశాలను స్వయంగా పరిశీలించి, కేంద్రాన్ని ఆకస్మికంగా తనిఖీ చేసి, తల్లిదండ్రులు,స్థానికుల నుంచి వివరాలు సేకరించి వాస్తవాలను నిర్ధారించాల్సి ఉండగా.. ఎంక్వయిరీ లేకుండానే మెమోలు జారీ చేయడం చర్చనీయాంశంగా మారింది.
సూపర్‌వైజర్ పర్యవేక్షణపై కూడా ప్రశ్నలు..
కేంద్రాల పనితీరును పర్యవేక్షించాల్సిన సూపర్‌వైజర్ బాధ్యతలపైనా ప్రశ్నలు తలెత్తుతున్నాయి. కేంద్రంలో పరిస్థితులు ఎలా ఉన్నాయి..? టీచర్ సమయానికి విధులకు హాజరవుతున్నారా..? చిన్నారులకు అవసరమైన సేవలు అందుతున్నాయా..? అనే అంశాలను అధికారులు ఎప్పటికప్పుడు పరిశీలించాల్సి ఉంటుంది. కానీ ఫిర్యాదులు, వార్తలు వచ్చిన తర్వాతే చర్యలకు దిగడం పర్యవేక్షణ వ్యవస్థపై అనుమానాలకు తావిస్తోంది.
ఉన్నతాధికారులు సమగ్ర విచారణ చేపట్టాలి..
అంగన్వాడీ కేంద్రం వ్యవహారంపై ఉన్నతాధికారులు నిష్పక్షపాతంగా సమగ్ర విచారణ చేపట్టి వాస్తవాలను వెలుగులోకి తేవాలని పలువురు కోరుతున్నారు.అసలు కేంద్రంలో ఏం జరిగింది..? అధికారుల స్పందన ఎందుకు ఇలా ఉంది..? ఎంక్వయిరీ లేకుండానే మెమోలు జారీ చేయడానికి కారణమేంటి..? అనే ప్రశ్నలకు ఉన్నతాధికారులు స్పష్టత ఇవ్వాల్సిన అవసరం ఉందనే అభిప్రాయాలు వ్యక్తమవుతున్నాయి.