సూర్యాపేటకు జాబ్ మేళా ఎప్పుడు..?

సూర్యాపేట :సూర్యాపేట: జిల్లాలోని నిరుద్యోగ యువతకు ఉద్యోగ అవకాశాలు కల్పించేందుకు నిర్వహిస్తున్న జాబ్ మేళాలపై సూర్యాపేట జిల్లా కేంద్రంలోని యువతలో ఆసక్తి నెలకొంది. హుజూర్‌నగర్, కోదాడ నియోజకవర్గాల్లో జాబ్ మేళాలు నిర్వహిస్తున్న నేపథ్యంలో జిల్లా కేంద్రం సూర్యాపేటలో కూడా ఇలాంటి కార్యక్రమాన్ని ఎప్పుడు నిర్వహిస్తారనే ప్రశ్నలు నిరుద్యోగుల నుంచి వినిపిస్తున్నాయి.ఉద్యోగాల కోసం ఏళ్లుగా ఎదురుచూస్తున్న యువతకు జాబ్ మేళాలు ఒకే వేదికపై వివిధ సంస్థలను సంప్రదించే అవకాశం కల్పిస్తాయి. హుజూర్‌నగర్, కోదాడ ప్రాంతాల్లో నిర్వహించిన కార్యక్రమాలకు నిరుద్యోగులు హాజరై ఉద్యోగ అవకాశాలను పరిశీలించారు. అదే తరహాలో సూర్యాపేట జిల్లా కేంద్రంలోనూ జాబ్ మేళా నిర్వహిస్తే పట్టణంతో పాటు చుట్టుపక్కల మండలాల యువతకు ప్రయోజనం చేకూరుతుందని పలువురు కోరుతున్నారు. ముఖ్యంగా హుజూర్‌నగర్, కోదాడ నియోజకవర్గాల్లో జాబ్ మేళాల నిర్వహణకు ప్రాధాన్యం ఇస్తున్న నేపథ్యంలో జిల్లా కేంద్రం సూర్యాపేటలో ఇలాంటి కార్యక్రమాలు ఎప్పుడు నిర్వహిస్తారనే ప్రశ్నలు నిరుద్యోగ యువత నుంచి వినిపిస్తున్నాయి.
జిల్లా కేంద్రంలోనే ఎందుకు నిర్వహించకూడదు..?
సూర్యాపేట జిల్లా కేంద్రంగా ఉండటంతో వివిధ ప్రాంతాల నుంచి యువత ఇక్కడికి రాకపోకలు సాగిస్తుంటారు. విద్యార్హతలు, నైపుణ్యాలకు అనుగుణంగా ఉద్యోగ అవకాశాలను అందించేలా జిల్లా కేంద్రంలో ప్రత్యేక జాబ్ మేళా నిర్వహించాలని నిరుద్యోగులు కోరుతున్నారు.సూర్యాపేట నియోజకవర్గానికి ప్రస్తుతం అధికార పార్టీ ఎమ్మెల్యే లేకపోవడం వల్లే జిల్లా కేంద్రానికి తగిన ప్రాధాన్యం దక్కడం లేదనే ప్రశ్నను కొందరు స్థానిక నాయకులు లేవనెత్తుతున్నారు. సూర్యాపేట జిల్లా కేంద్రంలో కాంగ్రెస్ పార్టీ బడా నాయకులు మాజీ కార్పొరేషన్ చైర్మన్, మాజీ మంత్రి తనయుడు  ఉన్నప్పటికీ ఇలాంటి కార్యక్రమాలు చేపట్టకపోవడంతో ప్రజలలో ఆసక్తికర మాటలు వినిపిస్తున్నాయి. అంతేకాకుండా వేరే నియోజకవర్గంలో ఏర్పాటు చేసిన జాబ్ మేళాకు వెళ్లి అక్కడ ఏర్పాట్లను కార్యక్రమాలను దగ్గరుండి చూస్తున్నప్పటికీ  సూర్యాపేటలో ఎప్పుడు ఏర్పాటు చేస్తారో అని ప్రజలు, నిరుద్యోగులు, నాయకులు గుసగుసలాడుతున్నారు. జిల్లా కేంద్రంగా ఉన్న సూర్యాపేటలో కూడా భారీ స్థాయిలో జాబ్ మేళా నిర్వహిస్తే స్థానికంగా ఉన్న నిరుద్యోగ యువతకు నేరుగా అవకాశాలు అందుబాటులోకి వస్తాయని పలువురు అభిప్రాయపడుతున్నారు. హుజూర్‌నగర్, కోదాడలకు ప్రాధాన్యం లభిస్తున్న నేపథ్యంలో సూర్యాపేటకు కూడా సమాన ప్రాధాన్యం ఇవ్వాలని కోరుతున్నారు.
మంత్రి దృష్టికి యువత డిమాండ్
ఇప్పటికే హుజూర్‌నగర్, కోదాడ ప్రాంతాల్లో జాబ్ మేళాల నిర్వహణకు ప్రాధాన్యం ఇచ్చిన నేపథ్యంలో సూర్యాపేట జిల్లా కేంద్రంపైనా దృష్టి సారించాలని యువత కోరుతోంది. జిల్లా కేంద్రంలో జాబ్ మేళా నిర్వహణకు సంబంధించిన తేదీ, ఏర్పాట్లపై అధికారిక ప్రకటన కోసం నిరుద్యోగులు ఎదురుచూస్తున్నారు.
అవకాశాలు అందరికీ అందేలా..
జిల్లాలోని అన్ని నియోజకవర్గాల నిరుద్యోగులకు సమానంగా ఉద్యోగ అవకాశాలు అందేలా జాబ్ మేళాలను విస్తరించాలని యువత అభిప్రాయపడుతోంది. సూర్యాపేటలోనూ త్వరలో జాబ్ మేళా నిర్వహించి స్థానిక యువతకు ఉద్యోగ అవకాశాలు కల్పించే దిశగా చర్యలు తీసుకోవాలని కోరుతున్నారు.జిల్లా కేంద్రం ఏ పార్టీకి చెందిన రాజకీయ ప్రతినిధుల ఆధీనంలో ఉన్నా.. అభివృద్ధి, ఉపాధి అవకాశాలు మాత్రం ప్రజలందరికీ అందాల్సినవేనని స్థానికులు పేర్కొంటున్నారు. సూర్యాపేటలోనూ భారీ జాబ్ మేళా నిర్వహించడంతో పాటు జిల్లా కేంద్రానికి ప్రత్యేక అభివృద్ధి కార్యక్రమాలు ప్రకటించాలని వారు కోరుతున్నారు.