కాంగ్రెస్‌లో మళ్లీ చర్చ...

సూర్యాపేట : నల్లగొండ,ఖమ్మం,వరంగల్ పట్టభద్రుల ఎమ్మెల్సీ అభ్యర్థిగా రాంరెడ్డి సర్వోత్తమ్‌రెడ్డిని కాంగ్రెస్ అధిష్ఠానం ప్రకటించిన నేపథ్యంలో సూర్యాపేట కాంగ్రెస్‌లో మరో ఆసక్తికర చర్చ మొదలైంది. సర్వోత్తమ్‌రెడ్డి, మార్కెట్ కమిటీ చైర్మన్ కొప్పుల వేనారెడ్డి మధ్య కొంతకాలంగా దూరం ఉందన్న ప్రచారం నేపథ్యంలో.. ఎమ్మెల్సీ ఎన్నికల సమయంలో వీరిద్దరూ మళ్లీ కలిసి పనిచేస్తారా..? అన్న ప్రశ్న కార్యకర్తల్లో వినిపిస్తోంది. దివంగత మాజీ మంత్రి రాంరెడ్డి దామోదర్‌రెడ్డితో 40 ఏండ్ల చరిత్ర కలిగిన వేనారెడ్డికి సుదీర్ఘ రాజకీయ అనుబంధం ఉందని స్థానిక కాంగ్రెస్ వర్గాల్లో చర్చ ఉంది. అయితే సర్వోత్తమ్‌రెడ్డి రాజకీయంగా క్రియాశీలకంగా మారిన తర్వాతకొన్ని అంశాల్లో ఇరువురి మధ్య దూరం ఏర్పడిందన్న ప్రచారం కొనసాగుతోంది. ఈ విభేదాలపై ఇరువురి నుంచి స్పష్టమైన బహిరంగ ప్రకటన వెలువడినట్లు ధృవీకరణ లేదు.ఇప్పుడు సర్వోత్తమ్‌రెడ్డి ఎమ్మెల్సీ బరిలోకి దిగడంతో పాత రాజకీయ సంబంధాలు, ప్రస్తుత పార్టీ సమీకరణాలపై చర్చ మొదలైంది. ఎన్నికల సమయంలో స్థానిక నాయకులు, కార్యకర్తల సమన్వయం అవసరమైన నేపథ్యంలో వేనారెడ్డి పాత్ర ఎలా ఉంటుందన్నది ఆసక్తికరంగా మారింది.సర్వోత్తమ్‌రెడ్డి వేనారెడ్డిని కలిసి ఎన్నికల ప్రచారంలో సహకారం కోరుతారా..? గత విభేదాలను పక్కన పెట్టి ఇద్దరూ ఒకే వేదికపై కనిపిస్తారా..? లేక తమ తమ రాజకీయ మార్గాల్లోనే కొనసాగుతారా..? అనే చర్చ కాంగ్రెస్ కార్యకర్తల మధ్య సాగుతున్నట్లు తెలుస్తోంది. గతంలో దామోదర్ రెడ్డితో కలిసి రాజకీయ కార్యక్రమాల్లో చురుగ్గా పనిచేసిన వేనారెడ్డి.. ప్రస్తుతం సర్వోత్తమ్ రెడ్డి ఎన్నికల ప్రచారానికి సహకరిస్తారా..?ఇద్దరు కలిసి పని చేస్తారా అన్నది ఆసక్తిగా మారింది.ఎమ్మెల్సీ ఎన్నికల ప్రక్రియ ముందుకు సాగుతున్న కొద్దీ వేనారెడ్డి వైఖరి కూడా చర్చనీయాంశంగా మారే అవకాశం ఉంది. సర్వోత్తమ్‌రెడ్డి ఇప్పటికే పార్టీ నేతలు,కార్యకర్తల సమన్వయంతో ఎన్నికల సన్నాహాలను ప్రారంభిస్తున్నట్లు వార్తలు వెలువడ్డాయి.