ఫలించిన కోర్పోలు రైతుల ప్రయత్నాలు

చౌటకూర్, : చౌటకూర్ మండల పరిధిలోని కోర్పోలు గ్రామ రైతులు ఎదుర్కొంటున్న విద్యుత్ సమస్యలపై చేసిన ప్రయత్నాలు ఫలించాయి. పంటలు చివరి దశకు చేరుకున్న సమయంలో సరైన వర్షాలు లేకపోవడంతో పాటు విద్యుత్ కోతలు, విద్యుత్ సరఫరాలో అంతరాయాలతో రైతులు తీవ్ర ఇబ్బందులు ఎదుర్కొంటున్నారు. ఈ నేపథ్యంలో గ్రామ రైతులు గత మూడు రోజులుగా తమ సమస్యలను విద్యుత్ శాఖ ఉన్నతాధికారుల దృష్టికి తీసుకెళ్లి పరిష్కరించాలని కోరారు.రైతులు యాది రెడ్డి, అనిల్ రెడ్డి కదిరాబాద్, గొల్ల పాండు, పుట్టి మోహన్, సారా రాజు కుమార్, పుట్టి మల్లేశం, రమేష్ ముదిరాజ్ తదితరుల ఆధ్వర్యంలో విద్యుత్ శాఖ ఏఈ శ్రీ సాయి రాఘవ, ఏఈ శ్రీనివాస్, డీఈ శ్రీనివాస్, ఏడీ శ్రీనివాస్‌లను కలిసి గ్రామంలో నెలకొన్న విద్యుత్ సమస్యలను వివరించారు. పంటలకు సాగునీరు అందించేందుకు విద్యుత్ సరఫరా సక్రమంగా ఉండాల్సిన అవసరం ఉందని, తరచూ అంతరాయాలు ఏర్పడటం వల్ల పంటలకు నష్టం వాటిల్లే పరిస్థితి ఉందని అధికారులకు విన్నవించారు.రైతుల సమస్యలను అర్థం చేసుకున్న విద్యుత్ శాఖ అధికారులు సకాలంలో స్పందించి కోర్పోలు గ్రామానికి రెండు ఏబీ స్విచ్ బ్రేకర్లను మంజూరు చేశారు. మంజూరైన పరికరాలను గురువారం గ్రామంలో ఏర్పాటు చేసే పనులు చేపట్టారు. దీంతో విద్యుత్ సరఫరాలో ఏర్పడే సమస్యలను కొంతమేర నియంత్రించడంతో పాటు రైతులకు సాగునీటి సరఫరా మెరుగుపడే అవకాశం ఉందని రైతులు తెలిపారు.గతంలో గ్రామానికి ట్రాన్స్‌ఫార్మర్ మంజూరు చేసి సహకరించినందుకు విద్యుత్ శాఖ ఏఈ సాయి రాఘవకు గ్రామ రైతులు, సర్పంచ్ ప్రత్యేకంగా కృతజ్ఞతలు తెలిపారు. ఈ సందర్భంగా ఏఈ సాయి రాఘవను శాలువాతో సన్మానించారు. రైతుల సమస్యలను పరిష్కరించేందుకు విద్యుత్ శాఖ అధికారులు స్పందించిన తీరును రైతులు అభినందించారు.అయితే గ్రామంలో విద్యుత్ సమస్యలు పూర్తిగా పరిష్కారం కావాలంటే మరిన్ని చర్యలు తీసుకోవాలని రైతులు కోరారు. గృహ అవసరాల కోసం ప్రత్యేకంగా మరో విద్యుత్ లైన్ ఏర్పాటు చేయాలని, మరో రెండు ఏబీ స్విచ్ బ్రేకర్లను మంజూరు చేయాలని అధికారులను విజ్ఞప్తి చేశారు. అలాగే గ్రామంలో విద్యుత్ సరఫరాకు సంబంధించిన సమస్యలను పరిష్కరించడంలో ఇబ్బందులు ఎదురవుతున్నాయని, లైన్‌మన్ విజయభాస్కర్‌ను వీలైనంత త్వరగా మార్చాలని కోరారు.రైతుల సమస్యలపై అధికారులు మరింత వేగంగా స్పందించి శాశ్వత పరిష్కారం చూపాలని, పంటలు చేతికొచ్చే సమయంలో విద్యుత్ సరఫరాలో ఎలాంటి అంతరాయాలు లేకుండా చూడాలని రైతులు కోరారు. సమస్యలు పరిష్కరించకపోతే భవిష్యత్‌లో రైతులు ఆందోళనకు దిగాల్సి వస్తుందని వారు స్పష్టం చేశారు.విద్యుత్ శాఖ అధికారులు స్పందించి ఏబీ స్విచ్ బ్రేకర్లు ఏర్పాటు చేయడం పట్ల కోర్పోలు గ్రామ రైతులు, సర్పంచ్ హర్షం వ్యక్తం చేస్తూ ఏఈ సాయి రాఘవతో పాటు విద్యుత్ శాఖ అధికారులకు కృతజ్ఞతలు తెలిపారు. రైతుల సమస్యల పరిష్కారానికి ఇదే విధంగా నిరంతరం సహకరించాలని కోరారు.